Keynetic: “gure teknologiak enpresa industrial bateko gailu konektatu guztiak kontrolatzen ditu”
Jon Matías eta Jokin Garay, Keynetic Technologies startuparen sortzaileak
Jon Matías eta Jokin Garay telekomunikazioko ingeniariek eratu zuten Keynetic Technologies, UPV/EHUko Ingeniaritza Telematikoko Ikerketa Taldean sortutako spin-offa. Biek ala biek esperientzia zabala dute ikerketan eta bezero industrialentzako aholkularitzan, eta ezagutza hori aplikatu dute zibersegurtasuneko konponbide berrien garapenean. Bind 4.0 azeleragailuak hautatuetako bat izan da Keynetic Technologies, eta proiektu bana du martxan Danobat Group eta Batz S.Coop. enpresekin.
Zibersegurtasunaren barruan, zertan espezializatuta dago Keynetic Technologies?
Jon Matías: Produktu propio bat garatu dugu, zeinak sareetako segurtasuna bermatzen baitu Software bidez Definitutako Sareak izeneko teknologia bat erabiliz. Teknologia horrek aldatu egin du sareak ulertzeko eta kontrolatzeko modua. Hala, bezeroak berak definitu dezake zein ekipo eta zertarako konekta daitezkeen elkarrekin edo nork erabil dezakeen (edo ez) konektatutako makina bakoitza.
Jokin Garay: Espezialistak ez direnentzat oso zaila eta konplexua izan da beti sare bat konfiguratzea. Oro har, gailuak azpiegitura baten bitartez konektatzen ziren elkarrekin, baina barra libreko eredu bati jarraiki, hau da, sarera konektatu eta posible izaten zen barruan zegoen edonorekin komunikatzea. Horrek segurtasun arazo asko zekartzan; konponbide murritzagoak ere bazeuden, baina sarea hain zen konplexua, ezen ez baitziren batere eraginkorrak, eta ez ziren behar hainbat egokitzen enpresaren premietara.
Zertan datza zuek eskaintzen duzuen konponbidea?
Jon Matías: Software bat garatu dugu sareko ekipamendua modu zentralizatuan gobernatzeko, enpresa bakoitzaren politiken arabera. Egin dezagun analogia bat mundu fisikoarekin: zer da enpresa batera iristean aurkitzen dugun lehenbiziko gauza? Segurtasuneko garita. Hango langileak identifikazioa eskatzen dizu, galdetzen dizu norekin duzun hitzordua edo zergatik zoazen bisitan, eta horren arabera kudeatzen du zure sarrera, hau da, ez dizu uzten sartzen instalazio guztietara. Guk sareko segurtasun zaintzailearen papera betetzen dugu, makina edo ekipo bakoitza zeri konektatzen zaion kontrolatzen dugu. Eta horrek asko mugatzen ditu eraso arriskuak.
Jokin Garay: Horri esker, enpresak uneoro jakin dezake nor konektatzen den bere sarera eta zertarako, eta hori guztia ez du definitzen parametro teknikoen bidez, baizik eta bere politiken arabera, hots, ulertu eta kudeatu ditzakeen terminoei jarraiki. Adibidez, esan dezake arratsaldeko zazpietatik aurrera ez dela inor konektatuko, edo erasoren bat badago, makinen sarerako sarbide guztiak paralizatuko direla.
Zuen konponbidea sektore industrialerako baino ez da?
Jokin Garay: Ez, sare bat duen edozein enpresatan aplikatu daiteke. Baina enpresa industrialak orain hasi dira beren makinak konektatzen, eta horregatik, sareko azpiegiturak instalatuta dauzkaten beste enpresa batzuek baino segurtasun premia handiagoak dituzte. Gainera, birus batek askoz inpaktu handiagoa du produkzio lantegi batean bulego batean baino, horregatik, sektore industriala oso sentsibilizatuta dago. Baina teknologia hori enpresaren bulegoetan ere aplikatzen da.
Zertan dautza Bind 4.0 ekimenaren barruan martxan dauzkazuen proiektuak?
Jon Matías: Danobat enpresak makina konektatuak fabrikatzen ditu, eta erakusle bat nahi du frogatzeko konexio horiek guztiz seguruak direla. Hortxe sartzen gara gu, eta gure zeregina da erakustea sareko azpiegitura ongi babestuz gero, makinen konektagarritasuna segurua dela.
Eta Batz S.Coop enpresaren kasuan?
Jokin Garay: Batz bere sarea berregituratzen ari den fabrikatzaile bat da, eta prozesu hori aprobetxatu nahi du segurtasunez hornitzeko. Sare osoa barne hartuko duen konponbide integrala nahi du, sistema bakar batetik kudeatzeko nola konektatzen diren bulegoko erabiltzaileak eta lantegiko makinak. Hala, posible da kontrolatzea nola konektatzen diren sarera pertsona eta makina guztiak.
Lotutako albisteak
Biotz: “Roca Salvatellarekin egindako akordioak berrikuntza teknologikoaren balio-kate osoa batzen du”
Gipuzkoako enpresak Kataluniakoarekin aliantza bat itxi du bere talentu digitala indartzeko eta nazioarteko merkatu berrietan bere presentzia zabaltzeko.
Surphasek merkatuan parekorik ez duen teknologia garatzen du eta gatzgabetzeko planten eraginkortasuna handitzea lortzen du
Donostiako ETEak, Europako Batzordearen 2,5 milioiko dirulaguntza lortuta, iragazkien egoera aurreikusten du denbora errealean; hala, geldialdi teknikoen % 60 murrizten du
Kimaiwi: “Gure proposamen teknologikoa balioztatzean eta nazioarteko turismo-industriaren aurrean proiektatzean zentratu gara”
Startup arabarrak online irtenbideak garatzen ditu turismo-sektorearentzat, eta hazkunde eta babes handia izan du bere bederatzi hilabeteko bizitzan.
NAW: “Gure abantaila lehiakorra 10 urte bitarteko kirol-oinetako minimalista eskaintzea da”
Silvia Echeverríak, NAWren sortzaileak, oinetako minimalistak postura-osasunean eta garapen biomekanikoan haurtzarotik helduarora arte nola eragin dezakeen azaltzen du.
Isabel Urbano: “Novia Salcedo Fundazioarekin praktiketan dauden gazteen %60k kontratu bat lortzen dute”
Novia Salcedo Fundazioak 45 urte inguru eman ditu ikasketa-ingurunetik lan-mundurako trantsizioa errazten, prestakuntza praktiko ez-laboraleko programen bidez.
AIDTEC Solutions :“Ekintzaileak zaindu egin behar ditugu”
Nekazaritza jasangarriagoa lortzeko soluzioetan espezializatutako startuparen sortzaileetako bat da Izaskun Oribe
Marijo Pagalday (Mondragon Korporazioa): “Gure helburua balio kate osoa hartzen duen 360º digitalizazioa eskaintzea da”
Mondragon Korporazioko Ingeniaritza eta Zerbitzuen saila 9 kooperatiba autonomok osatzen dute, eta elkarrekin koordinatuta daude. Kooperatiba horiek 3.000 lanpostu inguru sortzen dituzte zuzenean, eta 300 milioi euroko fakturazioa dute.
Alex Rayón (Brain & Code): “Teknologia mugikorrekiko eta Adimen Artifizialarekiko elkarbizitza naturalizatu behar dugu”
Hezkuntza teknologiko irisgarria bultzatzen duen enpresako CEOak Digital Open Knowledge DOK jardunaldian parte hartu du. Bertan, eraldaketa digitala eta adimen artifiziala aldaketa-azeleragailu gisari buruz hitz egin du.
Elkarrizketa ‘glo910’-eko Ixone Elosegui eta Miren García-Chazarrari
"glo, logoan ikusten den bezala, 910 bezala ere irakur daiteke, 10 emakumetik 9k zelulitisa duelako, eta hortik dator markaren izena eta gure lehen gailua, glo910"
Europako NIS2 zuzentarauak zibersegurtasuneko neurriak ezartzera behartzen ditu dagoeneko ETEak
Cybertix euskal zentro teknologikoak tresna automatiko eta aplikatzeko erraz bat garatu du zuzentarau horren eskakizunak betetzeko