Urriaren 28tik 30era, Deustuko Unibertsitateak FOROTECH Ingeniaritzaren eta Teknologiaren Astearen zortzigarren edizioa antolatu du, unibertsitatea, enpresa eta ikasleak elkartu eta ingeniaritza eta teknologia herritarrengana hurbiltzeko, ikerketarako eta garapen teknologikorako bokazioak sustatzeko, batez ere Emakumeen artean.
Forotech-en barruan, gainera, Emakume Teknologoarentzako Ada Byron nazioarteko Sariaren Espainiako ediziokoa banatzen da, emakumeen lana zientzia eta teknologiaren esparruan erakusteko, I + G arloko emakumeen bokazioak sustatzeko eta hazkuntza ekonomikorako eta gizartearen etorkizunerako balio gisa teknologiak duen garrantzia plazaratzeko. Sariak nazioartean duen garrantzia sendotu egin da, azaroaren amaieran emango baita Argentinako Córdoban bigarrenez saria, iazko Mexikoko edizioari erreleboa harturik.
Urriaren 29an izango da Ada Byron saria emateko ekitaldia. Aurtengoan ere bi saridun izango ditu: bata, senior kategorian, zazpigarren ediziora heldu dena, eta, bestea, 35 urtetik beherakoen kategorian iaztik ematen dena. Ekitaldia Unibertsitateko Paraninfoan izango da formatu erdipresentzialean eta online ere eskainiko da streaming-ean.
Forotech 2020ren berrikuntzetako bat LabsLand izango da, ikastetxeentzat eta unibertsitateentzat hezkuntzako laborategietarako Internet bidezko sarbidea eskaintzen duen startup bat. Teknologia horri esker, planeta osoko ikastetxeak eta unibertsitateak urrutitik konektatu daitezke ekipamenduetara eta online jarri daitezke sare guztirako. Deustuko Unibertsitateko ikasle ohi baten proiektu horrek kontinente guztietako 14 herrialdetan ditu laborategiak.
Forotech 2020ren barruan, LabsLand lehiaketan ikastetxeek (Bizkaia eta Gipuzkoakoek, baita Latinoamerikako beste herrialde batzuetakoek ere) izena eman ahal dute programazioko eta robotikako oinarrizko kontzeptuak ikasteko eta beren kodeak robot errealetan probatzeko etxetik, baina Bilbon, Hego Afrikan, Costa Rican edo Kolonbian kokatuta.
ForoTech 2020k erakunde hauek ditu babesle: Microsoft, Siemens Gamesa Renewable Energy, Ejie (Eusko Jaurlaritzaren informatika elkartea), Emakunde, Bizkaiko Foru Aldundia, Bilboko Udala, Bilbaotik, Ihobe, Vidrala, NTS, Spri Taldea, Innolab, DanobatGroup, Eusko Jaurlaritza, Bilbao Ekintza, Donostia Sustapena eta Euskaltel Fundazioa; eta beste erakunde hauek laguntzen dute: DeustoTech, Deusto FabLab, Deusto EarningLab, Innobasque, BasqueHealthCluster, Bilboko Gaztedi Musikalak. Alzola Ura eta LabsLand.
info+: www.forotech.deusto.es
