IndeusBerri: industria eta euskara uztartzen dituen informazioaren topagunea

Hizkuntzen kudeaketako praktika onak, IKT Astea Tolosaldean, Zibersegurtasun jardunaldia eta Programa Xantaiagilea dira gaur albiste.

Hizkuntzen Kudeaketaren inguruko praktika onak ezagutzera emango dituen topaketa, Tolosaldea Garatzenek antolatutako Teknologia berriak erabiltzen ikasteko ikastaroa, Zibersegurtasuna enpresatan jardunaldia, eta Industria Berriaren Hiztegiko berba berri bat: Programa Xantaiagile. Hauek dira IndeusBerrik gaur nabarmentzen dituen albisteak.

Urriaren 20an “Zibersegurtasuna enpresan” jardunaldia. Zibersegurtasuna gero eta kezka handiagoa eragiten duen gaia da erakunde guztientzat. Arrazoiak asko dira: enpresaren jarduera geldiaraziko duen eraso bat jasateko arriskua murriztea, isilpeko informaziorako sarbidea babestea, dokumentazioa galtzea saihestea, etab. Jardunaldi honetan zibersegurtasuneko mehatxuen egoera zein den ikusiko dugu.

Teknologia berriak zure enpresa, komertzio, ostatu edo jatetxean aplikatzen ikasteko ikastaroak Tolosaldea garatzenek antolatuta. Urriaren 17an hasi eta 21era bitartean 13 ikastaro egingo dira hainbat gai desberdin aztertuko dituztenak: LinkedIn, Power BI, Eraldaketa digitala, Zibersegurtasuna eta Prozesuen automatizazioa bestek beste. Ikastaro guztiak doakoak dira, baina izena-ematea beharrezkoa da, lekuak mugatuak baitira. Nahi adina ikastarotan eman daiteke izena.

Hizkuntzen kudeaketako bere praktika onak aurkeztuko ditu SPRIk Euskalduna Jauregian urriaren 24an. Hizkuntza Politikarako Sailburuordetzak eta Euskalitek antolatu dute praktika onak partekatzeko 2.topaketa, erakundeek hizkuntzen kudeaketan egiten dutena aztertzeko. Ekitaldi honetan, hainbat sektoretako erakundeen hizkuntza-kudeaketako jardunbide egokiak entzuteko eta Euskaliteko web bilatzailean dagoeneko jasota dauden praktikak ezagutzeko aukera izango da.

Programa Xantaiagile Industria Berriaren Spri Hiztegian. Programa informatiko kaltegarria, zeinaren bidez ziberkriminalak ekipo infektatua kontrola baitezake eta haren erabiltzailearen informazioa 'bahitu', sistema eragilearen zenbait zati edo fitxategi irakurtezin bihurturik, dagokion deszifratze-pasahitza sartu arte. Ziberkriminalak diru-kantitate zehatz bat eskatzen du pasahitz horren truke.