Madari, jasangarritasuna bultzatzen duten zuku naturalak

Duela bi urte jaio zen Zumos Madari, Anais Diezen eta Jonatan Vazquezen proiektu gisa. Bi gaztek denda bat ireki zuten Bilboko Alde Zaharrean, unean bertan egindako ‘smoothieak’ eta zuku naturalak saltzeko. Harrera ona ikusita, ekintzaileek Basaurin beren lantegia sortzea erabaki zuten, zukuak botilaratu eta errazago banatzeko xedearekin. Gaur egun, edariak Penintsula osora eta Balearretara iristen dira online dendaren bidez, Eup! plataformaren bidez. Batez ere, HORECA sektorean aritzen dira bere bezeroak (hotelak, jatetxeak eta kafetegiak). 

“Gure zukuak %100 naturalak dira, eta fruta dute osagai bakar gisa. Ez dute ez kontserbatzailerik, ez koloratzailerik, ez azukre erantsirik. Gainera, 8 hilabeteko iraungipena dute, hoztu beharrik gabe. Esan dezakegu ezaugarri horiek dituzten merkatuko bakarrak garela”, adierazi dute Madariko arduradunek. Nabarmentzekoa da, halaber, enpresak erabiltzen duen lehengaia zuzenean erosten zaiela ekoizleei, eta, gainera, baztertu egiten dela dendetan eta supermerkatuetan, ez baitu betetzen agintariek ezarritako kalibrea edo itxura. Lanean ari dira, halaber, produktu berriak garatzeko, “gure mamia erabat berrerabiltzeko eta, hartara, elikagaien hondamenari aurre egiteko”, gaineratu dute. 

Duela gutxi, EIT Food-en EWA (Empowering Women in Agrifood) programan parte hartzeko aukeratutako hamarretako bat izatea lortu du Madarik. Programa horren helburua da nekazaritzako elikagaien sektoreko emakumeen ekimenari laguntzea. “Programa honen bidez, produktua ezagutarazi nahi dugu, eta arrakastaz merkaturatzeko tresna egokiak lortu. Tresna horiek dira, alde batetik, elikadura-sektoreko adituen aholkularitza, prozesu horretan lagundu eta gidatu gaitzaketena, eta, bestetik, eskala handiagoan ekoizteko finantziazioa”, adierazi dute Anais Diezek eta Jonatan Vazquezek. 

Enpresaren hurrengo helburua bere prozesuak ahalik eta gehien automatizatzeko makineria lortzea da. “Ostalaritzan oso zaila da zuku naturalak aurkitzea, unean bertan zukututako laranja-zukutik haratago. Uste osoa dugu Madarik ase dezakeela behar hori, produktu gozo, natural eta osasungarria eskainiz”, adierazi dute. Hori dela eta, enpresak hazten jarraitu nahi du bere ekoizpen-ahalmenaren arabera, eta beti fruta eta barazkiekin egindako produktu berriak sortuz. 

SPRI Taldeak laguntza integralaren bidez berrikuntza, ekintzailetza eta barne-ekintzailetza laguntzen ditu, ideiak merkatura modu arrakastatsuan irits daitezen. Aurrera, Basque Fondo, Bind 4.0, Ekintzaile edo Barnekintzailetza ekintzailetzarako laguntza-programen bidez egiten du hori.