AI, IoT eta Robotika, industria eraginkor eta jasangarriago baterako startupen eta BINDeko enpresa liderren lankidetzarekin

BIND plataformak industriaren berrikuntzari buruzko urteko DEMO DAY 2024 ekitaldia ospatu du gaur goizean, Euskalduna Jauregian. Hitzordu honetan, startupen teknologia berritzaileak dituzten 34 proiektu baino gehiago aurkeztu dira, enpresa handietan, ETEetan eta sozietate publikoetan arrakastaz inplementatu direnak. Topaketa berezia da, industriako lider nagusiak eta berrikuntzan eta ekintzailetzan aditu ezagunak biltzen dituena, lehiakortasuna handitzeko eta industriaren eta sozietate publikoen eraldaketa digitala bizkortzeko gai diren soluzio berriak ezagutzea helburu.

Topaketan, 400 parte-hartzaile baino gehiagok ezagutu ahal izan dituzte AI, IoT, Big Data edo Robotikan oinarritutako soluzio teknologiko berriak, sektorearen erronkei erantzuteko gai direnak lau arlotan: industria adimenduna, energia garbia eta jasangarria, baita elikaduraren eta osasunaren teknologia ere.

Hizlari nagusi gisa, aurten, Carlota Mateosek parte hartu du BINDen; Carlota Mateos ekintzaile ameslaria da, hainbat enpresa arrakastatsuren sortzailea, eta Young Global Leader hautatua izan da Munduko Ekonomia Foroan, inpaktuko ekintzailetzarekin hartua duen konpromiso sendoagatik. Bere hitzaldian, ekosistema berritzailea gaur egun izaten ari den eraldaketa-prozesuari buruz hitz egin du. Ekosistema hori “produktu, zerbitzu eta prozesu disruptibo berriak sortzeko, garatzeko eta ezartzeko prozesu etengabean murgilduta dago, gizartean eragin positiboa izan dezan, paradigma alda dezan eta erronka berriak sor ditzan etengabe”. Azaldu duenez, “prozesu horrek exijentzia eta errendimendu handia eskatzen die eragileei une oro”. 

Ekitaldian zehar, bertaratuek erakusketa iraunkor bat bisitatu dute. Bertan, BINDen azken edizioan parte hartu duten startupen teknologiak ezagutu ahal izan dituzte, eta bertatik bertara egiaztatu ahal izan dute erakunde publiko, pribatu eta startupen arteko lankidetzak eskaintzen dituen aukera handiak. Izan ere, plataformaren helburu nagusia da startup disruptiboak enpresa handiekin, ETEekin eta sozietate publikoekin konektatzea eta eraldaketa digitala bizkortzea. Horretarako hiru ekimen ditu: BIND Corporate, BIND SME eta BIND GovTech. 2016an bere jarduera hasi zuenetik, 240 startup baino gehiago azeleratu dira eta 320 proiektu baino gehiago garatu dira, 9 milioi euroko fakturazioa gaindituta. Era berean, plataforma erreferente bihurtu da sektorean, industriaren eta enpresa-sarearen digitalizazioari emandako laguntzagatik. 

Industria seguruagoa eta eraginkorragoa

Ekitaldian aurkeztu diren proiektuen artean, manufaktura-prozesuetan kalitatea kontrolatzeko ahots-laguntzaile berriak, adimen artifizial sortzaileko softwareak (teknikarien lana arintzeko) eta produkzioko kudeaketa termiko adimenduneko sistemak daude, besteak beste. Guztira 34 arrakasta-kasu dira, teknologia disruptiboak erabiltzen dituztenak, tartean adimen artifiziala, IoT, teknologia murgiltzaileak, zibersegurtasuna eta robotika, eta erreferentziazko enpresek bermatutakoak dira, besteak beste Mercedez-Benz, Tubos Reunidos, Orona, GH Cranes, ArcelorMittal, Ormazabal, Ramondin eta Uvescok.

Startupen teknologien erakusketa honekin batera, berrikuntza-proiektu onenen aukeraketa baten erakustaldi eta aurkezpenak ere egin dira. Aurkeztutakoen artean, lau kasu zehatz nabarmendu behar dira, non Adimen Artifiziala, IoT eta Robotika Kolaboratiboa bezalako teknologiak aplikatu diren hainbat enpresatan eta ETE industrialetan. 

Lehen arrakasta-kasuetako bat Orona konpainiarena izan da, igogailuen, eskailera mekanikoen, arrapalen eta korridoreen diseinuan, fabrikazioan, instalazioan, mantentze-lanean eta modernizazioan espezialista den enpresarena. AIren eta robotika kolaboratiboaren Advanced Algorithms 4 Radar startuparen eskutik, soluzio bat garatu dute igogailu baten kanpoan eta barruan pertsonen presentzia detektatzeko. Teknologia hori igogailu-sistemen funtzionamenduan segurtasuna eta eraginkortasuna hobetzeko erabiltzen da, istripu-arriskua murrizteko. Proposatutako erabilera-kasuaren kontzeptua sistema bat da, sentsore bat edo gehiago irakurrita, presentziaren irakurketa argi bat lor dezakeena aurreikusitako intereseko leku bakoitzerako.

FoodTech arloan, Mondragonek, kooperazio-lanaren munduko erreferentziazko korporazioak, eta Ausolanek, jatetxe-arloko enpresak, proiektu bat egin dute AIn aditua den Lust 4 Food Brands startuparekin. Proiektu horretan, tresna bat garatu dute bezeroen eskaerak automatizatzeko eta, beraz, erosketa-esperientzia eta efizientzia operatiboa hobetzeko, eskaera egiten denetik eskaera jasotzen den arte. Biek jarri dute martxan teknologia eta gastronomia elkarrekin aritu ahal izango diren ekosistema bat. 

Bestalde, Tubos Reunidosek, altzairuzko hodien ekoizpenean espezializatutako industria-taldeak, eraginkortasun energetikoko proiektu bat garatu du karbonoaren kudeaketan, 51toCarbonZero startuparen eskutik. Biek garatu dute karbonoa murrizteko software hibrido bat eta aholkularitza-zerbitzuak, karbono-isurien neutraltasuna lortzeko helburuarekin. 

ETEek eta sozietate publikoek lideratutako berrikuntza 

Baina berrikuntza teknologikoa eta eraldaketa digitala ez dira korporazio handientzat bakarrik. BIND SME ekimenak ETEei zuzendutako arrakasta-kasuak ere aurkeztu ditu Demo Day 2024 ekitaldian. Zehazki, ingeniaritza elektronikoko startupak, Ever Smartek, ingeniaritza akustikoan espezializatutako AAcústica enpresarekin abian jarri duen soluzioa proiektu bat da. Proiektu horren bidez, PM sentsore bikoitzeko monitore bat sortu dute, eta kostu txikiko sentsore bat garatu dute, ingurumen-zarataren monitorizazio adimendunerako, IoT teknologia aplikatuta. BIND SMEren hurrengo edizioan parte hartu nahi duten ETEak oraindik garaiz daude. Ekainaren 28ra arte eman dezakete izena, hemen.

Baina korporazio handien eta ETEen arrakasta-kasuez eta aurkezpenez gain, Demo Dayk sektore publikoaren eraldaketa digitalari eskainitako gune bat ere izan du. BIND GovTech-en ekimenerako saio paralelo batean, GovTech sektorearen azken berrikuntzak aurkeztu dira, bigarren edizioko 9 soluzio teknologiko finalistekin, eta Hazi, Ihobe eta Parke sozietate publikoek startupekin lankidetzan izan dituzten arrakasta-kasuak partekatu dituzte. Sektore publikoaren digitalizazioa bultzatzea helburu duten proiektuak dira, teknologia berritzaileak erabiliz, besteak beste big data, adimen artifiziala eta zibersegurtasuna.

Topaketa hau aukera paregabea izan da euskal ekosistema industrialarekin eta berrikuntzakoarekin konektatzeko, baita enpresa handiak, ETEak eta sozietate publikoak beren eraldaketa digitala bizkortzeko erabiltzen ari diren azken soluzioen berri jakiteko ere. Bestalde, azken belaunaldiko startupek BINDen berrikuntza irekiko ekimenetan parte hartzearen eta bere ekosistemako 100 Venture Clients-ekin konektatzearen abantailak ezagutu ahal izan dituzte. 

12 erronka berrirekin teknologia bultzatzea 9. edizioan 

Topaketa honetan, BINDen bederatzigarren ediziorako deialdi berria ere zabaldu da. Urtero, euskal industriako 70 enpresa liderrek mundu osoko startup teknologiko berritzaileenak bilatzen dituzte, proiektu disruptibo berriak sortu eta etorkizunean industria eraginkorrago eta jasangarriago baterantz aurrera egin ahal izateko.

Aurten, hautagaitza aurkezteko, startupek beren teknologiak aurkeztu ahal izango dituzte parte hartzen duten enpresa handiek planteatutako 12 erronka berrietako bati edo batzuei erantzuteko, 8 jarduera-eremutan: eraginkortasun energetikoa eta ingurumen-inpaktuaren murrizketa; industria-prozesuak eraldatzea, optimizatzea eta digitalizatzea; negozioa/eskaintza garatzea azken bezeroari; metodologiak, tresnak eta antolaketa-euskarria; mobility soluzioak; eta, aurten, berritasun gisa, osasun-arloan hiru kategoria espezifiko sartu dira, diagnostikoaren, terapeutikaren eta asistentziaren arloetan soluzioak identifikatzeko.

BINDen parte izan nahi duten startupek hurrengo edizioan parte hartzeko hautagaitzak aurkeztu ahal izango dituzte, irailaren 6ra arte, programaren webgunearen bidez: www.bindplatform.com. Gainera, beharrezkoa da beren soluzio teknologikoa merkatuan edo azken garapen-fasean egotea eta enpresa partnerrei balioa eman ahal izatea.

BINDen bederatzigarren edizioaren 12 erronkak ezagutzeko, egin klik hemen.