Basque Rail Way jardunaldiak abiadura handiaren erronkak aztertuko ditu

Topaketa Donostian antolatuko da urtarrilaren 22an

Basque Rail Way Nazioarteko Trenbide Jardunaldia Europa mailako erreferente bilakatu da trenbideak maila globalean bideratu beharreko berrikuntzak eta erronkak partekatzeko. Urtarrilaren 22an, topaketa honen IV. edizioa antolatuko da Kursaal Kongresu Jauregian, Euskadiko nahiz Europar Batasuneko trenbide sektorearen ordezkari nagusien parte-hartzeaz.

Jardunaldia Eusko Jaurlaritzako Ekonomiaren Garapen eta Azpiegitura Sailak, Eusko Trenbideak-Ferrocarriles Vascos operadoreak eta Euskal Trenbide Sarea-Red Ferroviaria Vasca trenbide-kudeatzaileak antolatuko dute. Edizio honetan, hitzaldiek eta mahai-inguruek Abiadura handiko sareak martxan jartzearen erronkak izango dituzte hizpide, horixe baita topaketaren gai nagusia.

Iñigo Urkullu Lehendakaria izango da Basque Rail Way topaketako buru, Arantxa Tapia Ekonomiaren Garapen eta Azpiegitura Sailburuarekin batera. Trenbide arloko berrikuntza ardatz izango duen jardunaldi honetan, sektoreko 400dik gora profesionalek parte hartuko dutela aurreikusi da, eraikuntza eta ekipamendu enpresak, azpiegituren operadore eta kudeatzaileak, unibertsitateak eta startup teknologikoak barne hartuta.

Goizean, halaber, Francois Davenne UICko (Trenen Nazioarteko Batasuna) zuzendari nagusiak eta Libor Lochman CEReko (Europako Trenbideen Komunitatea) zuzendari exekutiboak parte hartuko dute Alex Arriola SPRI Taldeko zuzendari nagusiarekin, Andres Arizkorreta CAFeko presidentearekin eta Imanol Leza Euskotreneko zuzendari nagusiarekin batera, besteak beste. Trenbide sektoreak Europan zein Euskadin gainditu beharreko erronka berriak dira hitzaldietan eta mahai-inguruetan aztertuko diren gai nagusiak, abiadura handiak eskaintzen dituen aukerei arreta berezia emanez.

Abiadura handiko trenbide-sareen onurak eta eskualdeen garapen sozioekonomikoari egiten dioten ekarpena gizarteari ezagutzera ematea da jardunaldiaren helburu nagusia. Egun, Euskadi une erabakigarria dago, izan ere, “euskal Y”-aren obra zibileko lanak amaitu eta etorkizuneko ustiapena prestatzen hasia da.

Basque Rail Way topaketa trenbide sektorearen etorkizuneko erronkak ezagutu nahi dituzten arduradun publikoei, profesionalei, enpresei eta erakunde akademikoei zuzenduta dago. Topaketarako izen-emateak egiteko epea irekita dago jadanik jardunaldien webgunean.