Bidasoa Oarsoko Industrialdeak abian jarri ditu Irungo Hiframasa lantegi zaharra (9.850m2) eraisteko eta eraberritzeko lanak
- Hiruna mila metro koadroko okupazio-azalera duten bi pabilioi industrial berri, 6,7 milioi euroko inbertsioa eskatu dutenak.
- Pabilioietako batean kokatuko da fabrikazio industrialeko prozesuetarako zerbitzu integralak eskaintzen dituen Katealegaia enpresa, ezgaitasuna duten pertsonen inklusio soziolaborala bultzatzen duena/
Bidasoa Oarsoko Industrialdea, S.A.k (Sprilur-ek, Gipuzkoako Foru Aldundiak, Irungo Udalak eta Errenteria, Lezo, Oiartzun eta Pasaiako Udalek eskualde garapenerako Oarsoko Industrialdea, S.A. agentziaren bidez partaidetua) abian jarri ditu Irungo Hiframasa lantegi zaharraren instalazioak eraberritzeko lanak. Une honetan ezertarako erabiltzen ez den espazio industrial horrek —9.850 m2.ko okupazio-azalera eta 12.805 m2.ko eraikigarritasuna ditu— eraberritze-prozesuari ekingo dio, bere balioa berreskuratzeko eta bertan eraikitzen ari diren bi pabilioi berriak jarduera ekonomiko berrietara bideratzeko.
Ordezkari instituzionalek, hots, Eusko Jaurlaritzako Industria eta Trantsizio Energetikoko sailburuorde Mikel Amundarainek, Ekonomi Sustapen, Turismo, Landa inguruneko foru diputatu Jabier Larrañagak, Irungo alkate José Antonio Santanok, Gipuzkoako Foru Aldundiko Ekonomi sustapeneko zuzendari Iker Estensorok eta Sprilur-eko zuzendari nagusi Txaber Ourok bertara egin duten bisita batean aukera izan dute in situ ezagutzeko hasi berri diren eraberritze-lanen egoera eta bilakaera. Erakunde arteko lankidetza proiektu berri horri esker berreskuratu egingo dira une honetan inork erabiltzen ez dituen guneak, espazio industrialen eskaera gero eta handiagoa den eskualde batean.
Zaharkitutako eraikinak eraitsi ondoren, birgaitze-proiektuaren asmoa da azalera osoa atontzea eta bi pabilioi eraikitzea elkarren ondoan, zeintzuek hiruna mila metro koadro inguruko okupazio-azalera izango baitute. Pabilioiek behar diren azpiegitura-zerbitzuetako hartune guztiak izango dituzte: hornidura eta saneamendua, energia, gasa, telekomunikazioak, eta abar.
Bidasoa Oarsoko Industrialdeak lokal eta pabilioi industrialen eskaera iraunkorra izan du Bidasoa eta Oarsoaldea eskualdeetako eremu industrialetan kokatu nahi duten enpresen aldetik. Hori dela medio, pabilioiak ia esleituta egon dira eraikuntza-lanak amaitzerako. Uste da lanak 12 hilabeteko epean egingo direla, eta inbertsioa 6,7 milioi eurokoa izango da.
Interes sozialeko Katealegaia enpresa industriala izango da Irungo gune horretan eraikiko diren pabilioietako batean sartuko den lehena. Konpainiaren jarduera nagusia da serieko fabrikazio-prozesuetarako zerbitzu industrial integralak eskaintzea, baina horrez gain ezgaitasuna duten pertsonen enplegua eta inklusio soziolaborala ahalbidetzen ditu, pertsona horien zerbitzuak eskainiz eskulan espezializatua behar duten beste enpresa batzuei. Katealegaiak 4.500 metro koadroko eraikin propio bat izango du, zeinetan proiektu berritzaile bat jarriko duen martxan ogi-labe bat osorik fabrikatzeko, instalazioak bateratuz, irisgarritasuna hobetuz, osasuna zainduz eta berrikuntza teknologikoa eta robotizazioa landuz. Konpainiaren kalkuluen arabera, ekimen horrekin inklusio soziolaboraleko 26 enplegu berri sortuko dira hiru urtean, hots, egungo plantillaren %50 baino gehiago. Era berean, espazio bat gordeko da proiektu berriak garatzeko etorkizunean. Bigarren pabilioia esleitzeko dago oraindik, urte amaieran bukatuko baita horretarako prozesua.
Birgaitze eta berreskuratze industrialeko proiektu hau Sprilur eta Industrialdeak sozietateek martxan jarritako eraldaketa eta sustapen plan baten barruan sartzen da, oinarritzat hartzen dituena 2024rako Plan Estrategiko batean jasotako jarduera-ildoak. Hala, lehentasunezko helburuak dira espazioak, zerbitzuak eta azpiegiturak eskaintzea industria-jarduera bermatzeko hazkunde ekonomiko jasangarri eta inklusibo baten bidez, eta baita ere industria-lurzoruak optimizatzea, erabiltzen ez diren lur-arloak eraberrituz, birgaituz, deskontaminatuz eta berreskuratuz.
Jarduera-ildo estrategiko horiek martxan jartzeko, Sprilur Taldeak oinarritzat hartuko ditu, batetik, Industria Garatzeko eta Nazioartekotzeko Plana, hondatutako industria-lurzoruak lehengoratu eta balioan jartzeko, eta bestetik, Euskadiko ekonomia eta enplegua suspertzeko BERPIZTU programa, Lehentasunez Jarduteko Eremuak (LJE) Bultzatzeko Erakunde-Arteko Planaren eta Eskualdeetako Plan Estrategikoen (Ezkerraldea-Meatzaldea, Enkarterriak, Oarsoaldea eta Aiaraldea) bitartez. Bestalde, eskura izango ditu baita ere “Euskadi Next” 2021-2026-Berreskuratze eta Erresilientzia Programako funtsak. Programa horren helburua da industria-lurzorua lehengoratzea, zaharkituta dauden eraikinak zaharberritzea eta babesa ematea proiektu estrategiko berritzaile eta jasangarrien sorkuntzari.
Bidasoa Oarsoko Industrialdea zenbakitan
Bidasoa Oarsoko Industrialdea, S.A.k 10 enpresa-gune eta industrialde sustatu eta kudeatu ditu Bidasoan eta Oarsoaldean. Industrialdeak Programan integratutako sozietateen artetik, zalantzarik gabe hauxe da enpresa-guneen kudeaketan eta bere eskualdeko espazioen eskaera-bolumenean arrakasta-indize handienak dituen sozietateetako bat. Bere ekimenen kokaleku paregabeak, Europa hegoaldeko muga eta itinerantzia korapilotik hurbil, argi erakusten du enpresek daukaten interesa Bidasoa eta Oarsoaldea eskualdeetan kokatzeko.
Hauek dira aurreikusita dauden inbertsioak:
| AURREIKUSITAKO ENPRESA-GUNE BERRIAK | ||||
| KOKAPENA: | Aurreikusitako inbertsioa (milioi €) | Lursailaren azalera guztira
|
Gehienezko okupazioa (m²) | Eraikigarritasuna (m2) |
| Irun-Hiframasa | 3,6 | 9.850 | 6.402 | 12.805 |
| Irun-Cycobask | 3,70 | 11.300 | 5.895 | 14.690 |
| Partzela berria Arason (Irun) | 5,20 | 15.123 | 10.417 | 14.105 |
Bidasoan eta Oarsoaldean sustatutako enpresa-guneak
| KOKAPENA: | Inbertsioa (M €) | Urbanizatutako partzelen azalera | Jasotako eraikinak eta pabilioiak | Enpresak | Lanpostuak |
| Irun-Arretxe Ugalde-Pabilioiak | 20,61 | 29.284 | 62 | 446 | |
| Irun-Arretxe Ugalde-Eraikina | 5,51 | 25 | 82 | ||
| Irun-Gabiria | 11,98 | 28.505 | 39 | 332 | |
| Irun-Oianzabaleta | 3,18 | 25.835 | 5 | 250 | |
| Irun-Araso-Pabilioiak | 13,52 | 16.997 | 30 | 383 | |
| Errenteria-Masti Loidi | 1,93 | 3.755 | 9 | 43 | |
| Errenteria-Txirrita Maleo | 11,60 | 10.150 | 35 | 504 | |
| Lezo-Sagasti | 5,19 | 16.420 | 18 | 148 | |
| Oiartzun- Ugaldetxo | 1,78 | 7.877 | 23 | 163 | |
| Pasaia-Nabalaldea | 16,65 | 17.625 | 20 | 171 | |
| Errenteria-Egiburuberri | 3,27 | 1.364 | 1 | 29 | |
| Irun-Gametxo | 1,50 | 4.947 | |||
| GUZTIZKOAK | 96,71 | 30.782 | 130.273 | 267 | 2.551 |
Lotutako albisteak
Eusko Jaurlaritzak Legazpiko garai bateko Sidenorren lantegia berroneratzeko bigarren fasea jarri du abian, Urola ibaia azaleratzeko eta ingurua berrurbanizatzeko obrekin
Obrak egiteko 13 hilabeteko epea aurrez ikusi da, eta 5 milioi euroko inbertsioa egingo da
Zallako Elkartegi berriak Enkarterri eskualdeko garapen ekonomikoa eta lehiakortasuna sustatuko ditu enpresa berrien bidez
Zallako Elkartegi berriaren eraikuntza Eusko Jaurlaritzak (SPRILURen bidez) eta Bizkaiko Foru Aldundiak (AZPIEGITURAKen bidez) bultzatu dute, eta Enkarterri eskualdeko ekonomia suspertzeko hartutako konpromisoei erantzuten die, Eusko Legebiltzarrak lehentasunezko jarduketa-eremutzat (LJE) jo baitu
Xey enpresak Zumaian zuen lantegian 52.800 metro koadroko eremua egokitzeko lanak hasi ditu Sprilurrek
Sprilurrek Zumaiako Oikia industrialdean egingo duen berroneratzea degradatutako lurzoruak berreskuratzeko proiektuei lotuta dago, gero balioa emateko
Euskadiko Parke Teknologikoa Illunbera zabalduko da Donostiako Udalaren eskutik, enpresa-proiektu estrategikoak posible eginez, hala nola Columbus Venture Partners-ek gidatutakoa
Euskadiko Parke Teknologikoko presidente Jaione Ganzarainek eta Donostiako alkate Eneko Goiak gaur goizean formalizatu dute Illunbeko b.20.1 partzelaren salerosketa, eta, horrela, 2023. urtearen hasieran hasitako prozesua amaitu da.
Gueñeseko Bioekonomia Polo berria abian egongo da 2026aren hasieran, bioteknologian eta ekonomia zirkularrean oinarritutako trakzio-ekimenei harrera egiteko
Otsailean, erabilerarik ez duen 3.157 m²-ko espazio bat leheneratu eta berreraikitzeko lanei ekin die Sprilurrek, Enkarterriko etorkizuneko Bioekonomia Poloa izan dadin.