Sprilur eta Industrialdeak Sozietateek Zamudion elkartu dituzte enpresak eta eragile publikoak euren jardueraren 40. urtemuga ospatzeko
Eusko Jaurlaritzaren menpeko eta SPRI Taldean integraturiko Sprilur, S.A. eta Industrialdeak Programa (lurzoru industrialaren kudeaketarako sozietate publikoak) euren jardueraren 40. urtemugara iritsi dira. Mugarri hori ospatzeko, Euskadiko zein Estatuko enpresetako eta erakundeetako ehun ordezkari inguru elkartu dituen enpresa-jardunaldi bat egin da Bizkaiko Zientzia eta Teknologi Parkean (Zamudio).
Eusko Jaurlaritzako Ekonomi Garapen, Jasangarritasun eta Ingurumen sailburu Arantxa Tapia buru izan duen jardunaldi horretan Repsol enpresako kontseilari delegatu Josu Jon Imazek parte hartu du hitzaldi honekin: “Datozen urteetarako politika energetikoen estrategia eta joerak ekonomia globalaren testuinguruan”.
Ordezkari ugari elkartu dira hitzorduan, bai erakundeetakoak eta baita ere enpresetakoak, eta bereziki azpimarratu da eragile publiko, foru aldundi eta udalekin garatutako harremana eta lankidetza, funtsezkoak izan baitira lau hamarkadetan zehar gauzatu diren proiektu eta ekintzak aurrera eramateko.
Ospakizun jardunaldian orobat izan dira Espainiako Enpresa Poligonoen Koordinakundeko (CEPE) kideak, zeintzuek Zamudion egin baitute erakundearen Batzar Orokorra. 1998an sortutako elkarte horrek bere baitan biltzen ditu Estatu osoko enpresa-guneetako federazio zein elkarteak, eta enpresa-guneen kudeaketarekin nahiz dinamizazioarekin lotutako erakundeak, eta Sprilur eta Industrialdeak Sozietateak ere elkarteko kide dira. 90.000tik gora enpresaz osaturik dago. Administrazio publikoen eta erakunde pribatuen Estatuko nahiz maila autonomikoko lankidetzak helburutzat dauka “industrialdeak berritu eta modernizatzea, lehiakorrago izan daitezen”. Bi egunetan zehar, Katalunia, Balear Uharteak, Andaluzia edo besteak beste Kanariar Uharteetatik etorritako ordezkari publiko eta elkarteek nahiz bertako erakundeetako ordezkariek euren esperientziak partekatuko dituzte Sprilur eta Industrialdeak Sozietateekin, eta bertatik bertara ezagutu ahal izango dute Euskadiko lurzoruaren kudeaketa publikoa.
Sprilur eta Industrialdeak Programa iritsi dira euren jardueraren 40. urtemugara, lehen sozietatea 1982an sortu baitzen, enpresa-guneen kudeaketa eta sustapenerako Galeseko eredua Euskadiri egokitzeko. Industrialdeak Programa SPRIren (Eusko Jaurlaritzako Industria Saila) Azpiegitura Sailean sortu zen, eta gero Sprilur sortu zen erakunde horren eta Progesinsa-ren (Eusko Jaurlaritzaren Hirigintza Saileko lurzoru industrialaren kudeaketako sozietatea) bat-egitearen ondorioz.
Lurzoruaren kudeaketa publikoko sozietate horiek eraldaketa industrial bete-betean sortu izana lagungarri izan zen denborarekin euskal enpresa-sare oso lehiakor bat bultzatu eta sortzeko, Europan erreferente izatera iritsi dena. Gaur egun baieztatu dezakegu 130etik gora enpresa-gune eta industrialdeko sare bat osatu dugula gure herrian. Sprilur-ek eta Industrialdeak Sozietateek 12 milioi m2tik gora lurzoru industrial kudeatzen dute, azken lau hamarkadetan bi milioi m2 partzela industrial urbanizatu dira eta 1,2 milioi m2 bulego eta pabilioi eraiki dira.
Denbora horretan, Eusko Jaurlaritzak lankidetza estua garatu du Euskadiko Foru Aldundiekin eta Udalekin Sprilur-en bitartez. Gaur egun Industrialdeak Programan integratuta dauden 12 sozietateen helburu nagusia da bermatzea enpresek badutela behar adina lurzoru industrial publiko, pabilioi eta bulego, lau hamarkada hauetan espazioak behar izan baitituzte euren enpresa-jarduerak garatzeko.
Urte horietan zehar 1.097 milioi euroko inbertsioa egin da aipatutako helburuak lortzeko eta ekintza-planak garatzeko. Kudeatzen diren enpresa-guneetan 40.000 langile inguru enplegatzen dituzten 1.200 enpresa baino gehiago instalatu dira.
2021aren amaieratik aurrera jarduera-ziklo berri bat abiatu zen. Sprilur eta Industrialdeak Sozietateek lurzoruaren kudeaketa politika berri bati heldu zioten, kaltetutako eremuak birsortu eta zaharberritzeko eta erabiltzen ez ziren lurrak berraktibatzeko. Azken bi urteotan, lurrak leheneratzeko eta zaharberritzeko 20 proiektu aktibatu dira, zeintzuen bidez milioi bat metro koadro baino gehiago deskontaminatu eta jarriko baitira balioan. Mugarri garrantzitsua da lurzoruaren eraldaketa jasangarrian aurrera egiteko eta ekimen estrategikoak erakarriko dituen lurralde lehiakorrago bat lortzeko.
Jardueraren mugarriak
Laurogeiko hamarkadaren hasieran sortu zenetik ekimen berriak abiarazi ziren eta inbertitzaile estrategikoek euren enpresa-jarduerak ireki zituzten Euskadin (Daewoo, Engine Power Components, Mercedes Benz…), kalitatea eta jasangarritasuna integratuz obra eta proiektuen exekuzioko prozesu guztietan. 2000ko lehen hamarkadan hasi ziren lehenengo eraikinen birgaitze proiektuak (Azucarera) eta kaltetutako eremuak suspertzera bideratutakoak (Nerbioi ibaiertza, Pasaiako Badia).
Bestalde, proiektu europarretan lankidetzan aritzeak eta ezagutzaren kudeaketa beste eragile publiko batzuekin partekatzeak eragin handia izan zuten bere jardueretan. Ingurumen Hobekuntzako Ziurtagiria (EMAS) eskuratzea eta enpresa-guneak birgaitzeko proiektu bereziak garatzea ere mugarri garrantzitsuak izan ziren ziklo hartan.
Azken hamarkadan erosketa eta kontratazio publiko berdeko politika ezarri da, eta enpresa-guneen berrikuntzarako plan pilotu bat abiarazi da. Halaber, azken urteotan gehiago inbertitu da eta, hortaz, hainbat birgaitze-proiektu estrategiko abiarazi dira Legazpi, Urduliz, Zumaia, Burtzeña-Barakaldo, Santurtzi eta besteak beste Zumarragan. 2021ean Sprilur-ek Plan Estrategiko berri bat onartu zuen, zeinak lurzoruaren kudeaketako jarduera birformulatu baitzuen, lehentasuna emanez erabiltzen ez diren aktiboen birgaitze eta zaharberritzeari.
Ondorio gisa esan genezake erakunde arteko lankidetza-eredua erreferentziazkoa dela oraindik ere enpresa-guneen kudeaketa eta sustapenean, eta horri esker aurrera egin dugula azpiegitura jasangarriagoak lortzeko bidean, Euskadiren garapen ekonomikoa eta lurralde arteko oreka bultzatuz.
Sprilur eta Industrialdeak 40 urte programaren laburpen-bideoa eta lekukotasun instituzionalak
Lotutako albisteak
Eusko Jaurlaritzak Legazpiko garai bateko Sidenorren lantegia berroneratzeko bigarren fasea jarri du abian, Urola ibaia azaleratzeko eta ingurua berrurbanizatzeko obrekin
Obrak egiteko 13 hilabeteko epea aurrez ikusi da, eta 5 milioi euroko inbertsioa egingo da
Zallako Elkartegi berriak Enkarterri eskualdeko garapen ekonomikoa eta lehiakortasuna sustatuko ditu enpresa berrien bidez
Zallako Elkartegi berriaren eraikuntza Eusko Jaurlaritzak (SPRILURen bidez) eta Bizkaiko Foru Aldundiak (AZPIEGITURAKen bidez) bultzatu dute, eta Enkarterri eskualdeko ekonomia suspertzeko hartutako konpromisoei erantzuten die, Eusko Legebiltzarrak lehentasunezko jarduketa-eremutzat (LJE) jo baitu
Xey enpresak Zumaian zuen lantegian 52.800 metro koadroko eremua egokitzeko lanak hasi ditu Sprilurrek
Sprilurrek Zumaiako Oikia industrialdean egingo duen berroneratzea degradatutako lurzoruak berreskuratzeko proiektuei lotuta dago, gero balioa emateko
Euskadiko Parke Teknologikoa Illunbera zabalduko da Donostiako Udalaren eskutik, enpresa-proiektu estrategikoak posible eginez, hala nola Columbus Venture Partners-ek gidatutakoa
Euskadiko Parke Teknologikoko presidente Jaione Ganzarainek eta Donostiako alkate Eneko Goiak gaur goizean formalizatu dute Illunbeko b.20.1 partzelaren salerosketa, eta, horrela, 2023. urtearen hasieran hasitako prozesua amaitu da.
Gueñeseko Bioekonomia Polo berria abian egongo da 2026aren hasieran, bioteknologian eta ekonomia zirkularrean oinarritutako trakzio-ekimenei harrera egiteko
Otsailean, erabilerarik ez duen 3.157 m²-ko espazio bat leheneratu eta berreraikitzeko lanei ekin die Sprilurrek, Enkarterriko etorkizuneko Bioekonomia Poloa izan dadin.
Argi berdea Smartlog Nest zentroaren eraikuntzari, automatizazio logistikoaren ikerkuntzaren eta prestakuntzaren arloko erreferente bihurtuko du Urretxu
Andoitz Korta Eusko Jaurlaritzako Industria Sustatzeko sailburuordeak eta Jon Luqui Urretxuko alkateak Smartlog zentroaren instalazioak bisitatu dituzte, konpainiaren berrikuntza-proiektuak eta berrikuntza- eta talentu-zentro berria eraikitzeko planak bertarik bertara ezagutze aldera.
Eusko Jaurlaritzak eta Santurtziko udalak Santurtziko Etxe Uliko zabortegiaren berroneratzea azkartzeko akordioa sinatu dute
Eremuak dituen 100.000 metro karratu baino gehiago urbanizatu eta zerbitzu-azpiegiturez hornituko dira, ekonomia-jarduerak hartzeko prestatutako enpresa-eremua garatzeko
Argi berdea Sprilurren Pasaiako bulego-eraikinaren ingurua berrurbanizatzeko
Proiektuaren helburu nagusia kalitatezko hiri-espazio berri bat sortzea da, Sprilur Herrera Iparraldean eraikitzen ari den hirugarren sektoreko erabilerako eraikinaren inguruan
Sprilurrek eraiki berri bat eraikitzen ari du Ortuellako Ballonti poligonoan erabilgarri dagoen azken partzela industrialean
Urrian hasi ziren 1.633 m²-ko eraikin berria eraikitzeko lanak.
2024ko Lurzoruaren Munduko Eguna erabilerarik gabe dauden kokaguneen berreskurapenarekin ospatzen da Euskadin, bertan proiektu berriak ezartzeko
Ingurumen Jasangarritasuneko sailburuordetzaren, Sprilurren eta Ihoberen arteko lankidetzak helburutzat hartzen du lurzati batzuk merkatura itzultzea, haien berreskurapena lortu eta gero, pertsonen eta ingurumenaren osasuna erabilera berrietan bermatuz