BeClever Solutions: “Funtsezkoa da kontu pribilegiatuak babestea enpresetako erasoak murrizteko”
Datuetan, segurtasunean eta azpiegitura eta aplikazioetan zentratutako IT zerbitzu aurreratuak dira enpresa bizkaitar honen espezialitatea
BeClever Solutions konpainia cloud konponbideen kategoriako enpresa onena izendatua izan zen XXI. mendeko Teknologia Sarien Gala Nazionalaren II. edizioan, iragan otsailaren 21ean. 2011aren amaieran sortutako konpainia honek 11 laguneko plantilla du, guztiak ere eskarmentu handikoak nazioarteko proiektuetako IT zerbitzu aurreratuetan. Aiert Azuetak, enpresako zuzendari nagusiak, azaldu digu nolako lotura duten eraldaketa digitalarekin eta 4.0 Industriarekin.
Nola sortu zen BeClever Solutions?
BeClever 2011ko abenduan sortu zen. Ordura arte zerbitzu profesionalak eskaintzen genituen multinazional amerikar batentzat. Aplikazioen errendimendu-azterketekin eta datu-baseak erreplikatzeko proiektuekin lotutako zerbitzuak eskaintzen genituen Europa mailan. Eta bururatu zitzaigun: “zergatik ez dugu hau guztia etxean erreplikatzen?”, horrela erabaki genuen BeClever Solutions martxan jartzea. Produktu eta zerbitzu berritzaileak eskaini nahi dizkiegu gure bezeroei, edo gauzak modu eraginkorragoan egiteko balio dutenak. Urte hauetan gure portfolioa osatu dugu mota desberdinetako konponbideekin, eta azpiegitura eta aplikazioetan, datuetan eta segurtasunean zentratutako hiru negozio-unitate dauzkagu.
Nolako konponbideak eskaintzen dituzue 4.0 Industriaren arloan? Eman adibide bat.
Konponbide automatizatu bat garatu genuen Bizkaiko enpresa industrial batentzat, konpainian sartzen diren langile berriei zerbitzu desberdinetan alta emateko. Pertsona berri bat iristen denean, IT sailarekin hitz egin behar da sarbide-kontu bat eman diezaion ERP eta CRM sistemetara, datu-baseetara, domeinuetara edo posta elektronikora; sindikatuekin ere hitz egin behar da, langile berriari informazioa helarazteko, eta baita ere Administrazio sailarekin, nominak kudeatzeko. Gure lana da prozesu horiek automatizatzea eta informazioa babestea (informazio pertsonala eta sarbide gakoena), ez dadin iritsi hirugarren pertsonen eskuetara.
Beste proiektu batzuk ere garatu ditugu aplikazioen azterketak egiteko, hau da, errendimendua eta erabiltzailearen esperientzia ebaluatzeko: erraz erabiltzen den ala ez, eman beharreko urratsak arrazionalak diren ala ez… Nabigazio-fluxua aztertzen dugu jakiteko non erabakitzen duen erabiltzaileak aplikaziotik irtetea eta zergatik (errendimendu arazoak dituelako edo oso usagarria ez delako).
Bestalde, adituak gara datu-baseak erreplikatzeko proiektuetan. Informazio banatua duten datu-baseetan, bermatzen dugu datuak eraginkortasunez erreplikatzen direla.
Zer esperientzia duzue segurtasun eta zibersegurtasun munduetan?
IT segurtasunari dagokionez, tresna bat garatu dugu backup guztiak berehala berreskuratzeko. Backup bat baduzu eta eroritako zerbitzua berrezarri nahi baduzu, datuak beste makina batean kopiatu behar dituzu eta zerbitzua han eraiki, eta baliteke hainbat ordu behar izatea horretarako. Datuak makina horretan kopiatu beharrean, gure konponbideari esker posible dugu berehala entregatzea muntaia-puntu bat, sistema 5-10 minutuan eraiki ahal izateko. Gainera, tarteko geruza bat erabiltzen dugu datuak birtualizatzeko; hala, zerbitzua eraiki bitartean egiten diren aldaketa guztiak bereizita gordetzen dira, eta gero, behin egiaztatu ondoren dena ondo dabilela, datuak bateratu daitezke.
Eta zibersegurtasunean?
Hainbat esparrutan ari gara lanean, baina, batik bat, erabiltzaileenean. Prestakuntza ematen diegu langileei arrisku posibleak detektatu ditzaten. Erabiltzailea baita enpresa guztietako puntu ahulena. Era berean, eta erabiltzaileaz ari garela, garrantzitsua da segurtasun neurriak aplikatzea nortasunaren kudeaketan, behar dituen baimenak bakarrik izan ditzan. Horrela, inork bere nortasuna faltsutzen badu, ahalik eta min txikiena egin diezaiola.
Beste esparru bat da pribilegioak dituzten erabiltzaileena edo administratzaileena. Guk bitarteko sistema bat instalatzen dugu kontu pribilegiatu horiek seguruak izan daitezen. Nik, administratzaile izan arren, ez dut izango sarbide zuzenik datu-base batera eta baimena eskatu beharko diot bitarteko sistema bati konektatu nahi badut. Gainera, bitarteko sistema horrek saioa grabatzen du, egiten den guztia ikuskatu ahal izateko. Horrela, barruko erabiltzaileek ezin dute egin eragiketa desegokirik eta inork pertsona baten nortasuna faltsutzen badu ezingo du lortu pasahitzik.
Enpresak ohartzen dira horrelako arazoek duten garrantziaz?
Uste dut ez dituztela behar adina kontzientziatzen erabiltzaileak, esaten diete “email” jakin bat ez irekitzeko eta kito. Hori baino gehiago egin behar da. Erabiltzaileek askotan ez dakite zein datu, aplikazio edo karpetatara sartu daitezkeen. Mundu mailako analista handiak bat datoz esatean konpainiek gehiago zaindu behar dituztela langileei eta administratzaileei ematen dizkieten baimenak. Funtsezkoa da kontu pribilegiatuak babestea enpresetako erasoak murrizteko.
Nola baloratzen duzue Basque Cybersecurity Centre martxan jarri izana?
Zibersegurtasuneko Euskal Zentroak argi dauka zer eskaini nahi duen eta guk euren helburuak partekatzen ditugu. Enpresak ebanjelizatu behar ditugu zibersegurtasunaren arloan, jakinarazi behar diegu zein hornitzailek erantzun diezaioketen intzidente bati eta nolako arazoak izan ditzaketen. Zentro hori oso garrantzitsua da enpresok arriskuez ohartu gaitezen.
Lotutako albisteak
Lancor, altxatzeko motor elektrikoen fabrikazioan Europako liderra
Abanto-Zierbenako enpresak SPRI Taldearen Gaitasun Digital Profesionalen programako laguntza jaso du eta esportaziorako produktu propioak garatzearen aldeko apustua egiten du.
Rebel Tickets, sarreren birsalmentan iruzurrari eta gehiegizko prezioei aurre egiteko sortutako enpresa bizkaitarra
Gaur egun, beren publikoari baimendutako birsalmenta eskaini nahi dioten jaialdi, kontzertu eta bestelako ekitaldien sustatzaileekin lan egiten du.
Mercanza: “Bezeroa bere datuen ustiapenean espezializatua bihurtzen dugu”
Enpresak eraldaketa digital tradizionala gaindituz soluzioak eta zerbitzuak eskaintzen ditu, enpresen eraginkortasuna eta produktibitatea bultzatzeko.
Zabalgarbik denbora errealeko analisi-tresnekin modernizatu du bere azpiegitura
Besteak beste, biki digitala eta adimen artifizialean oinarritutako teknologiak ezartzeaz gain, lurrun-gainberogailu bat instalatzea du helburu enpresak, energia-eraginkortasuna eta jasangarritasun operatiboa hobetzeko ekimen estrategiko bat.
GAIAk IKT sektorearen prestakuntza-beharren diagnostikoa egin du eta merkatuaren eskaerei erantzuteko prestakuntza-ibilbideak garatu ditu
GAIAk azpimarratu duenez, sektoreko eta gobernuko erakundeen, sozietate publikoen eta hezkuntza-sistemaren parte-hartzea funtsezkoa izan da azterlanari balio erantsia emateko
Senvia Systems-ek beste enpresa batzuk gidatzen ditu haien sustapenean eta eraldaketa digitalean
Iaz sortutako enpresa gipuzkoarrak sistemetan, komunikazioetan eta zibersegurtasunean oinarritutako IT zerbitzuak eta aholkularitza eskaintzen ditu.
Akting, gizarteari balioa emateko teknologia
Gipuzkoako enpresak euskarri desberdinetarako aplikazioak garatzen ditu eta digitalizazioaren, datuen analisiaren eta prozesuen optimizazioaren aldeko apustua egiten du.
Biotz: “Roca Salvatellarekin egindako akordioak berrikuntza teknologikoaren balio-kate osoa batzen du”
Gipuzkoako enpresak Kataluniakoarekin aliantza bat itxi du bere talentu digitala indartzeko eta nazioarteko merkatu berrietan bere presentzia zabaltzeko.
Elvira, berrikuntza eta tradizioa osagai nagusi dituen istorio gastronomikoa
Harategi-urdaitegi txiki bat izatetik, gaur egun hamar establezimendu inguru ditu etxean egingo liratekeen moduan prestatutako produktuak saltzeko, online dendan ere saltzen direnak.
Zaher Taldeak bere eraginkortasun operatiboa hobetzea du helburu eraldaketa digital nabarmen baten bidez
Enpresa gipuzkoarra bere zuzendaritzaren errelebo betean murgilduta dago, galdaragintzan eta mekanizazioan aritzen da, eta nazioartekotzearen aldeko apustua ere egin du.