Eusko Jaurlaritzak eta 14 euskal enpresak ekodiseinu eta ekonomia zirkularreko estatuko aliantza publiko-pribatu garrantzitsuena adostu dute
Ekodiseinu eta ekonomia zirkularreko Estatuko aliantza publiko-pribatu garrantzitsuena da, eta hauek dira partaideak: ArcelorMittal Sestao, Batz Group, CAF, CIE Automotive, EDP España, Eroski, Grupo Campezo, Iberdrola, Kutxabank, Ormazabal Velatia, Orona S.Coop., Siemens-Gamesa Renewable Energy, Vicinay Sestao, Viuda de Sainz, Ihobe sozietate publikoa, SPRI eta Eusko Jaurlaritzako Ekonomiaren Garapen, Jasangarritasun eta Ingurumen Saila.
Gida bat aurkeztu da euskal enpresei beren ingurumen-aztarna kalkulatzen laguntzeko
Eusko Jaurlaritzako Ekonomiaren Garapen, Jasangarritasun eta Ingurumeneko sailburu Arantxa Tapiak, 14 euskal enpresarekin eta Ihobe eta SPRI sozietate publikoekin batera, ekodiseinu eta ekonomia zirkularreko lankidetza publiko-pribatuko aliantza sinatu du gaur, Basque Ecodesign Center delakoaren barruan, partaide hauekin: ArcelorMittal Sestao, Batz Group, CAF, CIE Automotive, EDP España, Eroski, Grupo Campezo, Iberdrola, Kutxabank, Ormazabal Velatia, Orona S.Coop., Siemens-Gamesa Renewable Energy, Vicinay Sestao, Viuda de Sainz, Ihobe sozietate publikoa, SPRI eta Eusko Jaurlaritza bera.
Gaur goizean Euskal Autonomia Erkidegoko eragile ekonomiko nagusien aurrean Donostian sinatutako akordioak euskal industria-sektorea eskema jasangarriagoetarantz mugitzea eragingo du, Europako Itun Berdeak eta Basque Green Deal-ek markatutako estrategiarekin bat etorriz, bere kideen dimentsio ekonomikoa kontuan hartuta. Basque Ecodesign Center-eko enpresek 56.000 milioi euroko urteko fakturazioa dute, lana ematen diete 148 mila langileri, eta 103 mila erakunde hornitzaile dituzte.
“Aliantza honek euskal industria-sarea eraldatzen lagundu nahi du, Euskadik datozen urteetako ingurumen-erronkei arrakastaz aurre egin ahal izateko” ziurtatu du Tapia sailburuak.
Gainera, think tank bat sortuko da, enpresa horiek eta Eusko Jaurlaritzak urtero gogoeta estrategikoa egiteko euskal enpresa-sarerako ekonomia zirkularreko erronkei buruz. Gogoeta horren ondorioz, Euskal Autonomia Erkidegoko ingurumen-politika hobetzeko gomendioak sortuko dira, eta mailarik goreneko enpresek konpromisoak hartuko dituzte.
“Euskadin klimaren aldetik neutroa eta zirkularra den ekonomia lortzeak industria erabat mobilizatzea eskatzen du. Hogeita bost urte behar dira –belaunaldi bat– industria-sektorea eta balio-kate guztiak eraldatzeko. 2050ean prest egon nahi badugu, erabakiak eta neurriak hartu behar dira datozen bost urteetan”, Tapia sailburuak zehaztu duenez.
Enpresen ingurumen-aztarna neurtzeko tresna
Akordio hau sinatzean, Basque Ecodesign Center-ek gida metodologiko bat eta tresna bat aurkeztu ditu erakundeek beren ingurumen-aztarna korporatiboa kalkulatu ahal izan dezaten, CIE Automotive, EDP, Iberdrola eta Vicinay Sestao enpresek jada egin duten bezala.
Basque Ecodesign Center-ek gida hau prestatzea apustu argia da ingurumen-aztarnaren kalkulua euskal enpresa-sarearen eraldaketaren ardatzean kokatzearen alde.
Tapia sailburuaren esanetan, “Tresnaren aplikazioak aukera emango die enpresei balio-katean zeharreko ingurumen-inpaktuak neurtzeko eta komunikatzeko; epe ertain eta luzerako helburu korporatiboak ezartzeko; beren prozesuen puntu kritikoak ingurumenaren ikuspegitik identifikatzeko, gerora murrizteko ekonomia zirkularreko estrategiak aplikatuz; eta erosketa berdearen irizpideak ezartzeko, bai sektore publikoan, bai pribatuan, ingurumen-inpaktu txikiagoa duten aukerak egin ahal izateko”.
Enpresa baten ingurumen-aztarna korporatiboa ondasunak edo zerbitzuak eskaintzen dituen enpresa baten ingurumen-portaeraren irizpide anitzeko neurria da, eta bizi-ziklo osoaren ikuspegia du. Aukera ematen du enpresaren jarduerekin lotutako ingurumen-prozesuak eta -inpaktuak xehetasunez ezagutzeko eta kuantifikatzeko, inpaktu-foku nagusiak identifikatzeko eta ingurumenaren arloan hobetzeko aukera nagusiak definitzeko.
Gainera, ingurumen-aztarna korporatiboa oso metodologia egokia da enpresaren ingurumen-jardunaren hobekuntzen jarraipena egiteko barneko nahiz kanpoko helburu bati dagokionez, enpresek beren finantza-helburuekin jokatzen duten bezala. Era berean, oso euskarri erabilgarria izan daiteke enpresaren beraren barneko hainbat instalazio edo eremu geografikoren ingurumen-jarduna konparatzeko.
Informazioaren ikuspegitik, ingurumen-aztarna korporatiboa funtsezko erreferentzia da enpresak kontsumitzaileekin, inbertsiogileekin, agintari publikoekin eta gizartearekin oro har ingurumenaz komunikatzeko.
Basque Ecodesign Center-ek aurkeztutako gidak ingurumen-adierazle hori ahalik eta modurik efizienteenean kalkulatzen lagundu nahi die euskal enpresei. Edozein motatako enpresek aplika dezakete metodologia hau, baina administrazio publikoko erakundeek, irabazi-asmorik gabeko erakundeek eta bestelako organismo batzuek ere bai.
Lotutako albisteak
MEPRO Medical Reproductive Solutions, gizarte-helburu teknologia: ugalkortasun maskulinoa berritzen
Gure helburua osasun-profesionalei eta bikoteei antzutasunaren erronkei aurre egiteko tresna berritzaile, seguru eta eraginkorrak eskaintzea da
Kontsulta irekia: Spri Taldearen laneko prebentzio-zerbitzuak definitzeko zure aukera
Sprik merkatuko aurretiazko kontsulta jarri du abian, lan-arriskuen prebentzioaren eta osasunaren zaintzaren sektorearen benetako beharretara egokitutako lizitazioa diseinatzeko. Horren bidez, operadore ekonomikoen ekarpenak bildu nahi dira, kontratazio-prozesu lehiakor, garden eta merkatuko jardunbide egokienekin lerrokatua egituratzeko.
Aloka, profesionalen artean ikus-entzunezko materiala alokatzeko plataforma
Gipuzkoako startup-ak hainbat ekipo eskaintzen ditu, hala nola kamerak, grabagailuak, mikrofonoak, droneak. Mobile World Congress-eko 4YFN biltzarrean parte hartu zuen, SPRI Taldeak kudeatutako stand batekin, webgunea inbertsore eta bezero potentzialei aurkezteko.
Metagra, mende erdiko berrikuntza automobilgintzarako hotzeko estanpazioan
Bergarako enpresa pieza konplexuen fabrikazioan sendotu da, jasangarritasunaren eta berrikuntzaren alde eginez.
Sustatu berrikuntza-proiektuak zure enpresan Fast Track Innobideak ekimenarekin
Fast Track Innobideak Euskadiko enpresa berritzaileen kopurua handitzeko eta sustatzeko sortu zen. Merkatuan ondasun edo zerbitzu berriak sartu dituzten edo enpresan negozio-prozesuak hobetzen dituzten berrikuntza-jarduerak babesten ditu, enpresa lehiakorrago bihurtzeko.
Jon Ander Egaña: “BASQUE FOOD CLUSTERrek elikadura euskal industriaren sektore estrategiko gisa kokatzea lortu du”
Elikatze-katearen euskal elkartea 150 enpresa eta erakunde baino gehiagoren lehiakortasuna hobetzeko lanean ari da, berrikuntzaren garapenarekin, lankidetza-proiektuekin eta teknologien integrazioarekin.
Siteco, 30 urte automatikoki ordaintzeko makinak ekoizten
Arabako enpresak administrazio publikoarekin eta ostalaritza sektorearekin egiten du lan, eta urteak daramatza nazioarteko merkatuan.
Mecanizados Patro enpresak “fidagarritasuna, segurtasuna eta eraginkortasuna” eskaintzen ditu trenbide-sektorean
Serie laburretarako eta luzeetarako pieza espezifikoak fabrikatzen ditu enpresa arabarrak, doitasun handiko lan-tresna eta makinekin.
Lorra, lau hamarkada inguru Bizkaiko nekazaritzako elikagaien kooperatibismoaren funtsezko zutabe gisa
Gaur egun, erakundearen lehentasuna zahartutako sektore honetako erretiroak ordezkatzea da, belaunaldi-erreleboaren bidez.
NudgeXperience Bilbon: CX eta Portaera Zientzien ekitaldia
Zuzendariei eta gerenteei, Cx-eko arduradunei eta berrikuntza eta marketineko profesionalei zuzendua