Peruk SPRI Taldearen esperientzia aintzatetsi du garapen-agentzien eredu gisa

Peruko gobernuak sustaturiko proiektu honentzat esperientzia arrakastatsu gisa aitortu dute nazioarteko adituek euskal agentzia hau

Aste honetan, Peruko ordezkaritza instituzional bat etorri da Euskadira SPRI Taldearen esperientzia bertatik bertara ezagutzera, 37 urtez euskal industria-politika sustatu eta bideratu duen eskualde-garapeneko agentzia baita SPRI. Perun proiektu hau garatzeko ardura duten hango agintariek jardunbide egoki gisa identifikatu dute eskualde-agentzia honen esperientzia, eta “in situ” ezagutu nahi dute.

Bi egunetan, Peruko ordezkaritza (eskualde-garapenari loturiko tresnak eta mekanismoak diseinatzeko ardura duten funtzionarioek osatua) SPRI Taldeko arduradunekin bildu da, informazioa jasotzeko, eta aztertzeko nola ezar daitekeen hemengo esperientzia Andeetako herrialdean diseinatzen ari diren ereduan. Bileretan gai hauek landu dira: agentzien gobernantza-mekanismoak, agentziaren zeregina RIS3 estrategian, antolaketa-egitura, harremana tokiko agentziekin eta sareko lana Europako beste agentzia batzuekin, koordinazioa sektore pribatuarekin (ETEak) eta gobernu arteko agintarien zeregina, Eskualdeko Garapen Agentzien diseinuan eta ezarpenean.

Gaur egun, KHEE erakundean sartzeko prozesuan dago Peru. Kooperazio eta Hazkunde Ekonomikorako Erakundeak (KHEE) eginiko diagnostikoen artean, gomendio bat dago, hau da, Peruk lurralde mailako garapena sustatzeko tresnak ezartzea. Horietako tresna bat Eskualdeko Garapen Agentziak dira.

Testuinguru horretan, Peruko gobernuko Deszentralizazio Idazkaritzak Eskualdeko Garapen Agentzien Nazioarteko Mintegia antolatu zuen irailean. Mintegi horretan, agerian geratu zen tresna horrek zuen garrantzia lurraldeetatik abiatuta aurrerapena bizkortzeko, ikusirik Europako eta Latinoamerikako esperientziak. Mintegiak nazioarteko 11 aditu bildu zituen. Horiek hainbat lan-aukera proposatu zituzten proiektuan arrakasta lortzeko, eta, era berean, parte hartzen zuten herrialdeekin (Kolonbia, Espainia, Alemania, Argentina eta Txile) lan-agenda bat proposatu zuten, nazioarteko esperientziak aprobetxatzeko Peruren kasurako. Adituek agenda honetan proposatu zuten Europako zenbait garapen-agentzia bisitatzea, eta horien artean dago SPRIra antolaturiko bisita.

Estatuko garapen-agentziarik zaharrena da SPRI. Duela 37 urte sortu zen birmoldaketa-prozesuan bete-betean, eta, gaur egun, eredugarria da 4.0 industrian eta biozientziei eta energiari aplikaturiko teknologian. Kontuan izateko eredu bihurtu da lurralde-garapeneko nazioarteko testuinguruan.

Lotutako albisteak

22 uztaila, 2024 Berrikuntza

Jabones El Abra: “Produktu litro bakoitzeko plastiko gutxiago erabiltzen duen ontzi ekologiko bat garatu dugu Hazinnovari esker”

Irakurri gehiago

18 uztaila, 2024 Berrikuntza

Mikel Jauregi industria klusterrekin elkartu da eta Euskadiren espiritu aitzindaria aldarrikatu du etorkizuneko erronkei eta aukerei aurre egiteko

Irakurri gehiago

12 uztaila, 2024 Berrikuntza

Biotz sendotu egin da Orklirekin aliantza estrategikoa itxi ondoren

Irakurri gehiago

9 uztaila, 2024 Berrikuntza

Erhardt Serikaten teknologia kuantikoak konponbide berritzaileak ematen dizkie logistikaren sektoreko arazoei

Irakurri gehiago

2 uztaila, 2024 Berrikuntza

‘Belk+’, mugikortasunerako laguntza pertsonaleko lehen exoeskeleto adimenduna

Irakurri gehiago

Joan blog-era