SPRIk eta SPRILURek Kudeaketa Aurreratuaren Zilarrezko eta Brontzezko A sariak lortu dituzte, hurrenez hurren
SPRI-Enpresa Garapenerako Euskal Agentziak Zilarrezko A – Kudeaketa Aurreratuari Euskal Saria lortu du. Bestetik, SPRI Taldeari atxikita, euskal enpresarentzako azpiegitura-irtenbideak hornitzen dituen SPRILUR sozietateak brontzezko A saria lortu du. Sari hauek kudeaketa arloko jardunbideetan zein intereseko taldeen (bezeroak, langileak, akziodunak eta gizartea, oro har) asebetetze orekatuaren bilaketan nabarmendu diren erakunderik aurreratuenak aldarrikatzen dituzte. Aintzatespenak abenduaren 18an banatuko dira, Gasteizeko Europa Jauregian, 18:30etatik aurrera.
SPRI, Eusko Jaurlaritzak abian dituen enpresa-ehunaren mesedeko politikei lotutako programa eta zerbitzuez baliatuta, euskal enpresei laguntza eta bultzada ematea xede duen Ekonomiaren Garapen eta Azpiegitura Sailaren menpeko sozietatea da. Bestalde, SPRILURek enpresa-sustapena bultzatzea du helburu, jarduera ekonomikoetarako azpiegitura-irtenbideen eragile publiko gisa, euskal enpresen lehiakortasuna, enplegua eta inbertsioa errazteko asmoz. Horretarako, industrialdeak, enpresa-eremuak eta proiektu estrategikoak kudeatu eta garatzen ditu, horien zaharkitzapena saihestuz.
SPRIk eta SPRILURek Kudeaketa Aurreratuaren Eredua erabiltzen dute beraien kudeaketa-sistema ebaluatu eta hobetzeko, eta EUSKALITeko Ebaluazio Klubeko kideek landutako kanpo-ebaluazioaren ondoren jaso dituzte sariak.
Kudeaketa Aurreratuari Euskal Saria
Kudeaketa Aurreratuaren Euskal Saria sortu da, EAEko erakundeen artean Kudeaketa Aurreratuaren garrantzia lehiakortasunaren funtsezko elementu gisa bultzatzeko eta zabaltzeko.
Kudeaketa-sistemaren etengabeko hobekuntza eta aurrerapenarekin konpromisoa erakusten duten Euskadiko enpresa, hezkuntza-zentro, osasun-zentroek eta bestelako erakundeek, publikoek zein pribatuek, erdiesten dituzte Eusko Jaurlaritzak EUSKALITen bitartez ematen dituen aintzatespen horiek.
Sari hauek helburu bikoitza dute:
- Kudeaketa arloko erakunderik aurreratuenak identifikatzea, besteentzako erreferentzia izan daitezen.
- Erakunde horiek egindako ahalegina nahiz kudeaketan lortutako aurrerapen maila publikoki aitortzea.
Aintzatespen hauek lortzeko, erakundeak bere kudeaketa sistemaren garapen maila jakin bat duela erakutsi behar du. Horretarako, EUSKALITek Kudeaketa Aurreratuaren Eredua erreferentetzat hartzen duten Kanpo Kontraste eta Kanpo Ebaluazio zerbitzuak eskaintzen ditu
Zerbitzu bietan, erakundetik kanpoko aditu independenteek kudeaketari buruzko azterketa orokorra eta sistematikoa egiten dute, horretan lortutako aurrerapen mailari buruzko ikuspegi objektiboa erakutsiz, baita indarguneak eta hobetzeko alderdiak ere, erakundeek egin beharreko hausnarketa eta autoebaluazio ariketen “ispilua” izan daitezen.
Azterketa hau egiteaz arduratzen den EUSKALITeko Ebaluazio Klubak modu altruistan elkarlanean aritzen diren 2.000 zuzendarik eta teknikarik baino gehiagok osatzen dute, kudeaketaren arloko ezaguerak eta esperientziak partekatzen dituztelarik.
Lotutako albisteak
Lorra, lau hamarkada inguru Bizkaiko nekazaritzako elikagaien kooperatibismoaren funtsezko zutabe gisa
Gaur egun, erakundearen lehentasuna zahartutako sektore honetako erretiroak ordezkatzea da, belaunaldi-erreleboaren bidez.
NudgeXperience Bilbon: CX eta Portaera Zientzien ekitaldia
Zuzendariei eta gerenteei, Cx-eko arduradunei eta berrikuntza eta marketineko profesionalei zuzendua
Innobideak Prestakuntza prestatu zure lantaldea balioan lehiatzeko eta ez prezioan
Euskadiko ETEen % 60k berrikuntzaren alde egiten du, baina gehienek kostua murrizteko edo kalitatea hobetzeko egiten dute eta ez dute benetako abantaila lehiakorra sortzen merkatuan. Alabaina, berrikuntza ez da etorkizunean mantentzeko tresna soila, etorkizunean liderra izateko estrategia baizik. Horretarako, gakoa teknologia ez ezik, pertsonak, estrategia eta egokitzeko gaitasuna ere badira.
Utilmaik tresna industrial aurreratuak diseinatzen ditu ekoizpen industriala optimizatzeko
Bizkaiko enpresak berrikuntza eta ezagutza teknikoa uztartzen ditu funtsezko sektoreetan mekanizazio-prozesuak hobetzeko, hala nola garraioan, makineria astunean eta aeronautikan.
Imanol Rego, Innobasque Berrikuntzaren Euskal Agentziako presidente berria
Manuel Salaverriaren lekukoa hartu du. Salaverriak euskal ekosistema publiko pribatuaren balioa sustatzen jakin du, Euskadi garatzeko bide estrategiko gisa