Albisteak 21 ekaina, 2024

Dive Medical eta NX Technologies protagonistak 22024ko Toribio Echevarria Sarietan

Sealteknik, Manex 4.0 - HRE Automation eta ALFA MIMtech-ek beste sari nabarmen batzuk lortu dituzte sari hauen 34. edizioan

Bio/Osasuna eta Mugikortasun sektoreetan proiektuak dituzten bi startup nabarmendu dira Toribio Echevarria-Ekintzailetza Berritzailearen Euskadi Sarien 34. edizioan. Sariak banatu dira Eibarren, Euskadiko ekintzailetza, enpresa, zientzia, hezkuntza eta erakunde arloko ordezkariak bildu dituen ekitaldian.

Dive Medical, ‘Startup eta Enpresa Proiektuen’ kategorian, eta NX Technologies, ‘Enpresa Berritzailearen’ kategorian, irabazleak aukeratu dituzte, beren proposamenaren planteamendu berritzaileagatik eta merkatuari balio diferentea emateko duten ahalmenagatik. NX Technologies enpresaren kasuan, enpresak “Nazioartekotzeari Laguntzeko” Saria ere jaso du. Bestalde, Sealteknik, Manex 4.0 – HRE Automation eta ALFA MIMtech-ek ere berezko protagonismoa izan dute sari horien banaketan, Eibarko Udalak emandako “Eibarko Enpresa” eta “Espezializazio Estrategikoa” aparteko sariak eta “Iñaki Goenaga” Aintzatespena jaso baitituzte.

Bost sinadurak, gaurtik aurrera, sari horien 34 urteetan saritutako enpresen zerrendari gehituko zaizkio, eta horiek erreferentzia gisa finkatu dira Euskal Autonomia Erkidegoko ekintzailetzaren eremuan. Saritutako proiektuek jasotzen duten zenbateko ekonomikoa alde batera utzita, arduradunek nabarmendu nahi izan dute beren enpresa-garapenerako bultzada eta beren ideiak hazten jarraitzeko motibazioa.

Ildo beretik mintzatu dira ekitaldian parte hartu duten erakundeetako ordezkariak, eta azpimarratu dute administrazioek zer eginkizun betetzen duten ekintzaileei beren proiektuak garatzeko tresnak, laguntza, aholkularitza eta baliabideak emateko orduan.

Sariak banatzeko ekitaldian, Jon Iriberri Kirolaren Euskal Eskolako arduradunak hartu du parte. Bere esperientziatik agerian utzi du berrikuntzak eta ekintzailetzak Sportech industrian duten balioa eta garrantzia, kirolari egokitutako teknologiaren irismena eta sakontasuna azpimarratuz.

2024ko enpresa irabazleak

Startupak eta enpresa-proiektuak

Dive Medical, Eye Tracking eta Adimen Artifizialean oinarritutako teknologia propioa, hitzik gabeko pazienteen funtzio bisuala baloratzeko.

Enpresa berritzailea

NX Technologies, trakzio-unitatera bideratutako mugikortasun elektrikoko soluzioetarako balio erantsi handiko produktuak garatzen ditu, baita energia biltegiratzeko soluzioak ere.

Nazioartekotzeari laguntzea

NX Technologies, trakzio-unitatera bideratutako mugikortasun elektrikoko soluzioetarako balio erantsi handiko produktuak garatzen ditu, baita energia biltegiratzeko soluzioak ere.

Eibarko Udalaren Sari Berezia – Eibarko Enpresa

Sealteknik, Kableak eta hodiak babesteko zigilatze-teknologia.

Eibarko Udalaren Sari Berezia – Espezializazio Estrategikoa

Manex 4.0 – HRE-Automation, Hidraulika industrialaren sektoreko ekipoen monitorizazioa digitalizatzea.

“Iñaki Goenaga” Aintzatespena

ALFA MIMtech, 2004an sortu zen ehun urtetik gorako ALFAren hedapen gisa, eta MIM teknologia berritzailea fusionatu zuen, pieza metalikoen fabrikazioan aro berri bat sortzeko, erremintetarako, sektore medikorako, burdineriarako, sarrailagintzarako, tresneria medikorako, luxuzko artikuluetarako, kirol-armetarako eta musika-tresnetarako prestazio handiekin, besteak beste. Konplexutasun handiko piezak eta propietate mekaniko handiak teknologia mota horren bidez fabrikatzen dituzten Espainiako bi enpresa bakarretako bat da.

Toribio Echevarria Sarien aurtengo edizioak 26 hautagaitza jaso ditu. Horietatik 13, Bio/Osasuna, Mugikortasuna, Energia, Industria, Foodtech, IKT eta Kirolaren teknologien sektoreetan jarduten dutenak, ekintzailetzan eta enpresa-garapenean esperientzia handia duten pertsonek osatutako epaimahai batek aukeratu zituen finalista gisa. Proposamen guztietan bereziki baloratu dira enpresa-ikuspegia eta berrikuntza bultzatzeko gaitasuna. Lehiaketa honen historian zehar 800 ideia eta enpresa proiektu baino gehiago aztertu dira, 45 milioi euroko inbertsioarekin.

Bultzada

Toribio Echevarria Sariak duela 34 urte sortu ziren, ekintzaileen lana aitortzeko eta ekintzailetza berritzailea eta enpresa-proiektu berrien sorrera bultzatzeko.

Bi kategoria nagusitan egiten dira urtero deialdiak: Startupak eta Enpresa Proiektuak. Horietako bakoitzak 10.500 euroko zuzkidura ekonomikoa du, eta laguntza, finantzaketa, aholkularitza, mentoring eta prestakuntza programak eskuratzeko aukera. Halaber, nazioartekotze-prozesuan laguntza behar duten enpresa-ekimenei zuzendutako sari bat dago, bai eta Eibarko Udalak emandako aparteko beste bi sari ere, 10.500 eurorekin eta BIC Gipuzkoaren bidezko prestakuntza espezializaturako sarbidearekin.

Toribio Echevarria Sariak Eibarko Udalak eta BIC Gipuzkoak bultzatutako ekimena da, eta bertan parte hartzen dute Eusko Jaurlaritzako Ekonomiaren Garapen, Jasangarritasun eta Ingurumen Saileko Eraldaketa Digitaleko eta Ekintzailetzako Zuzendaritzak eta Gipuzkoako Foru Aldundiko Ekonomia Sustapeneko eta Proiektu Estrategikoetako saila. Era berean, SPRI, APD, Gipuzkoako Ganbera, Elkargi, Debegesa eta Confebask, Adegi, Cebek eta SEA enpresaburuen elkarteek ere laguntzen dute.