Euskadi herrialde teknologiko eta berritzaile gisa agertu da Mobile World Congress 2025ean
Euskadi herrialde teknologiko eta berritzaile gisa agertu da Bartzelonan martxoaren 3tik 6ra egiten ari den Mobile World Congress 2025ean, hots, teknologia berrien eta konektagarritasunaren epizentro globalean. Euskadi – Basque Country standa startupetarako Four Years From Now (4YFN) ekosistema-eremuan kokatuta eta “Innovation Land” goiburuaren inguruan antolatuta dago, eta 16 euskal startupen ahalmen berritzaile eta teknologikoak aurkeztea du helburu. Euskadik azokan parte hartzeko aukera Eusko Jaurlaritzak (SPRI Taldea Enpresen Garapenerako Euskal Agentziaren bitartez) eta foru-aldundiek bultzatu dute, eta bere ekosistema berritzailea, teknologikoa eta ekintzailetzakoa erakustea du helburu, baita ekosistema horrek hainbat sektoretan (hala nola Clean Energy & Sustainability, Health Tech, Sportstech eta Intelligent Industry izenekoetan) eskaintzen dituen soluzio berriak ere.
Mobile World Congress-era joaten direnek Euskadiko standa bisitatu (8.1 hall-eko 8.1B11n) eta Up!Euskadi berrikuntza-plataforma ezagutu dezakete. Plataforma horrek 900 startup baino gehiago, 700 enpresa teknologiko eta ikerketa-zentroen sare handi bat biltzen ditu, eta erakundeen babes handia jasotzen du. Izan ere, sektoreko eragile guztiak eraginpean hartzen dituen lankidetza publiko-pribatu bati esker, euskal ekintzailetza-ekosistema berrikuntza eta lehiakortasuna bultzatzeko nazioarteko arrakasta-eredu bihurtu da.
Euskal agenda trinkoa izango da hiru egun hauetan, eta hainbat harreman instituzional egingo dira. Besteak beste, topaketak egingo dira Acció – Agencia para la Competitividad de la Empresa de Catalunya izeneko agentziarekin, baita bilera batzuk ere, nazioartean erreferentzia diren enpresa teknologikoekin, startupekin, inbertsio-taldeekin eta hainbat herrialdetako berrikuntza- eta ekintzailetza-ordezkariekin.
Euskadiko ordezkaritzako burua Eusko Jaurlaritzako Teknologia, Berrikuntza eta Eraldaketa Digitaleko sailburuorde Jaione Ganzarain da, eta, harekin batera, Gipuzkoako Ekonomia Sustapeneko eta Proiektu Estrategikoetako diputatu Ane Insausti; Bizkaiko Foru Aldundiko Ekonomia Sustatzeko diputatua, Ainara Basurko; eta Arabako Foru Aldundiko Ekonomiaren Garapen eta Berrikuntzako zuzendari Ander Larrinaga.
Haiez gain, Eusko Jaurlaritzaren aldetik ere bertaratu dira Ekintzailetza eta Nazioartekotzearen zuzendari Ane Miren de Ariño; Eraldaketa Digitalaren zuzendari Elixabete García; Teknologia eta Berrikuntzako zuzendari Alberto Fernández. Haiekin batera, Gipuzkoako Foru Aldundiko Ekonomia Sustapeneko zuzendari Unai Andueza; Gipuzkoako Foru Aldundiko Proiektu Estrategikoetako zuzendari nagusi Koldo Peciña; eta Joseba Mariezkurrena, Bizkaiko Foru Aldundiko Ekintzailetza, Talentu eta Enpresa Lehiakortasuneko zuzendari nagusia.
16 euskal startupek aurkeztuko dituzte beren soluzioak 4YFN eremuan
Euskadi – Basque Country standaren esparruan, Gipuzkoa, Araba eta Bizkaiko 16 startupek hainbat sektoretan (hala nola energian, osasunean, hezkuntzan eta industrian) landu dituzten soluzio berritzaileak erakutsiko dituzte egun hauetan 4YFN eremuan.
Zehazki, energiaren eta jasangarritasunaren esparruan Bizkaiko Aresar Manufacturing startupak hiri-zerbitzuetarako eta azken miliako logistikarako ibilgailu komertzial elektrikoak garatzen ditu. Bestalde, Arabako Seaquenz enpresak abiaziorako eta energia eolikorako produktu elektrikoak garatzen ditu.
Haiez gain, bost euskal startupek eraman dituzte topaketa horretara osasunaren eta kirolaren arloetan berritzeko beren soluzio berriak. Haien artean, Bizkaiko Fisify enpresak adimen artifiziala erabiltzen du min muskulueskeletikoak prebenitzeko. Gipuzkoako Miramoon Pharma startupak, berriz, gaixotasun neurodegeneratibo eta arraroetarako sendagaiak egiten ditu, Arabako Naiz Band enpresak kirolarientzako sare sozial bat garatu du, eta Gipuzkoako Pozik enpresak adimen artifizial bidezko psikometria eta gaixotasun mentalen prebentzioa landu ditu. Azkenik, Arabako Psifiacos startupak elikadura-jokabidearen nahasmenduak dituzten pertsonen detekzio eta jarraipenerako software bat garatu du.
Hezkuntzaren eta talentuaren eskuratzearen sektorean, bi startupek aurkeztuko dituzte beren soluzioak. Arabako Amazinglers startupak talentu gazteak lan-merkatuan txertatzeko plataforma bat garatu du, eta Bizkaiko Konexio enpresak, berriz, atari digital bat sortu du enpresetan profil teknologikoak txertatzeko.
Industria adimendunari eta ecommerce-ari dagokienez, bertaratzen direnek sei proiektu teknologiko berri ezagutu ahal izango dituzte. Zehazki, Arabako Kimaiwi Digital Innovations startupak turismoaren sektorerako online soluzioak garatzen ditu, Gipuzkoako Neety startupak adimen artifiziala aplikatzen du enpresen salmenta-prozesua automatizatzeko, Arabako Novaut enpresa berriak osagaietan eta ordezko piezetan espezializatutako marketplace industrial bat sortu du, Bizkaiko Riskless Integral startupak enpresen segurtasuna automatizatzeko soluzioak diseinatzen ditu, eta Gipuzkoako Woonderwoo startupak online denden kudeaketa optimizatzeko soluzioak sortzen ditu.
Era berean, plataforma digitalak aurkeztuko dira, hala nola Gipuzkoako Aloka (ikus-entzunezko ekipamendua alokatzen duena) eta Yorsio (higiezinen jabekidetzako lehen plataforma garatu duena) izenekoak.
Agenda eta startupak, erakundeak eta inbertitzaileak konektatzeko guneak
4YFN nazioarteko konexioak eta lankidetzak sendotzeko, ekosistemak ezagutzeko eta mundu osoari teknologia berriak aurkezteko lekua da. Euskadik, bere erakusketa- eta networking-gunean, nazioartean erreferentzia diren konpainia teknologikoak, startupak, inbertsio-taldeak eta hainbat herrialdetako berrikuntza- eta ekintzailetza-ordezkariak artatuko ditu. Gainera, topaketaren barruan, berrikuntzaren euskal ekosistemako eragile guztiek eta startupek hainbat networking-jardunalditara joateko eta inbertsio- eta berrikuntza-saioetan parte hartzeko aukera izango dute, hala nola CaixaBank-en Investor Matchmaking eta Banco Santander-en Side Event izenekoetan. Bestalde, Banco Sabadell erakundeak antolatutako Berrikuntza Publikoko gunean, Arabako eta Gipuzkoako foru-aldundietako ordezkariek programa berritzaileak aurkeztuko dituzte, hala nola Ziur, Mubil, Quantum eta Govtech izenekoak. Bizkaiko Foru Aldundiak atzo aurkeztu zuen Biqain teknologia kuantikoaren inguruko bere industria-estrategia Telefonicaren gunean.
Lotutako albisteak
Eusko Jaurlaritzak startup disruptiboen talentua eskuratzeko aukera emango die EAEko ETEei
SPRIk BIND SMEren 5. edizioa ireki du, EAEko ETEek startup berritzaileekin elkarlanean jardun eta haien lehiakortasuna hobetzeko. Deialdia uztailaren 4ra arte egongo da zabalik. Hautatutako ETEek teknologia disruptiboetara eta talentu berritzailera sarbidea izango dute, IA, jasangarritasuna edo Smart Factory bezalako arloetan soluzioak garatzeko.
EatAmigo, ostalaritzako eskaerak automatizatzeko AA erabiltzen duen tresna
Gipuzkoako enpresak jatetxeekin, ostalaritza kateekin eta elikagai banaketa enpresekin egiten du lan estatu mailan, eta duela gutxi Mexikon lortu du lehen bezeroa.
ESGI 188 (European Study Group with Industry) Bilbon izango da 2025eko maiatzaren 26tik 30era
Enpresek problema matematikoak aurkezten dituzte azterketa-taldeak konpon ditzan, askotan modelizazio edo optimizazio moduan.
Zinemaldia Startup Challenge 2025
Izen-ematea: apirilaren 15etik ekainaren 2ra arte
NudgeXperience Bilbon: CX eta Portaera Zientzien ekitaldia
Zuzendariei eta gerenteei, Cx-eko arduradunei eta berrikuntza eta marketineko profesionalei zuzendua
Wake Up! Albiste ekintzaile batzuk sarean 250324
Euskadiko talentu ekintzaile guztia. Wake up! -ek komunikabide eta sareko blog desberdinek argitaratutako albisteen hautaketa txiki bat egunero partekatzen du Linkedinen: ideiak, proiektuak, negozioak, startupak, enpresak etab.
Zabalik dago MAKE IN! Ekintzailetza Industriala programaren 4. ediziorako izen-emate epea
Apirilaren 25a izango da programan izena emateko azken eguna
Wake Up! Albiste ekintzaile batzuk sarean
Euskadiko talentu ekintzaile guztia. Wake up! -ek komunikabide eta sareko blog desberdinek argitaratutako albisteen hautaketa txiki bat egunero partekatzen du Linkedinen: ideiak, proiektuak, negozioak, startupak, enpresak etab.
Foodtech Startup Forum 2025: elikagaien industriarako berrikuntzaren eta teknologiaren arloko punta-puntako irtenbideak
Elikagaien eta edarien sektorerako proiektu, irtenbide edo negozio eredu iraultzaileak aurkeztu nahi dituzten startupek apirilaren 1era arte ikustarazi ahal izango dute bere hautagaitza
WonderShop, WordPress-erako (“WP”) diseinatutako plugina, online denden jabeei katalogoen kudeaketa errazten die
Garatzen eta merkaturatzen duena WoonderSoft da. Enpresa gipuzkoarrak nazioarteko asmoak ditu eta bere produktuak interesa piztu du beste herrialde batzuetan.