Albisteak 30 Marzo, 2022

Green Deal Youth Challenge: Powerful Tree, Hobeen eta Dryfing, Gasteizko Udalaren deialdiko startup garaileak

“Talentua erakarri eta berrikuntzan eta ekonomia berdean oinarritutako enpresen sorrera sustatu, Gasteiz Green Dealen filosofiarekin bat zetozenak"

Gasteizko Villa Suso Jauregian jokatu zen joan den ostiralean Gasteiz Green Deal Youth Challenge-ren finala. Nazioarteko udal-deialdi horren helburua da 18 eta 35 urte bitarteko pertsonek bultzatutako proiektu original eta berritzaileak sustatu eta laguntzea, bai eta ekonomia berdean, talentuan eta berrikuntzan oinarritutako ekimenak bultzatzea ere.

Zazpi enpresa finalistek beren proiektuak erakutsi zituzten epaimahaiaren aurrean, eta epaimahai horrek, ondoren, aukeratutako ekimenen berri eman zuen. Hiru izan ziren azkenean saritutako proposamenak: Powerful Tree, Hobeen eta Dryfing. Proiektu irabazleek 16 asteko azelerazio-prozesua izango dute, eta mentoreen eta adituen laguntza izango dute aurrera egiteko.

Zehazki, Powerful Tree-n energia berriztagarriak garatzen dituzte, laboreak 4.0 nekazaritzan teknifikatzen dituzte eta landare-ongizatearen kontzeptua aldarrikatzen dute. Hobeen, bestalde, etxeetara bideratutako energia-eraginkortasuneko plataforma bat da. Azkenik, Dryfing uretako kirolen sektoreko neoprenozko jantziak garbitu, desinfektatu eta lehortzeko makinen diseinu, fabrikazio eta merkaturatze bat da.

“Talentua erakarri eta berrikuntzan eta ekonomia berdean oinarritutako enpresen sorrera sustatu nahi genuen, Gasteiz Green Dealen filosofiarekin bat zetozenak. Itun horrekin, hiri berdetik ekonomia berdera igaro nahi dugu. Eta horregatik bultzatzen dugu prozesu hau, gaur egun aukera ematen baitigu Gasteizek arlo horretan erreferente izaten jarrai dezan lagundu nahi duten gazteen ideiak ezagutzeko. Zorionak “, esan zuen Gorka Urtaran alkateak ekitaldi pribatu honen aurkezpenean.

Adituek osatutako epaimahai batek enpresa finalistek egindako aurkezpenak aztertu zituen, eta, horien guztien artetik, aipatutako hiru startupak aukeratu ziren, azelerazio-programa honetan parte hartzeko aukera izango dutenak. Lau hilabeteko ibilbidea izango da, eta hautatutako proiektuek lehen mailako «mentoring» bat izango dute. Onenek, gainera, inbertsio bat izango dute beren negozioak abian jartzeko.

Horrela, Gasteizko Udalaren ekimen hau erakunde publiko batek bultzatutako startupak bizkortzeko lehen programetako bat da, eta BerriUP enpresaren laguntza teknikoa izaten ari da, esperientzia handia baitu arlo horretan.