RPK-k “estrategikoa” irizten dio Arabako bi startup-etan daukan partaidetzari
Enpresa arloan esan ohi den bezala, “batasunak indarra dakar”, eta pandemia garai honetan esamolde herrikoi hori premia bihurtu da enpresentzat, premia ia estrategiko bat. Zentzu horretan, RPK kooperatiba aspaldi ohartu zen helburu bat azkar lortzeko hobe dela bakarrik ibiltzea, baina urrun bidaiatzeko eta helburu handiagoetara iristeko bidaideak izatea dela onena. Eta horretan ari da RPK konpainia arabarra, zeinak erabaki baitu bere zorro industriala dibertsifikatzea “arrautza guztiak saski berean ez sartzeko”, Ricardo Romo zuzendari kudeatzaileak dioen bezala.
Egoitza Gamarrako industrialdean duen RPK kooperatibak lau hamarkada luzeko historia du eta ia 200 langile enplegatzen ditu; historikoki, automozio sektorearekin lotutako konpainia bat da, eta lantegiak ditu atzerriko hainbat herrialdetan, hala nola, India, Txina eta Mexikon. Nahiz eta automozio sektoreak une latzak bizi dituen, eurei gauzak ondo doazkie.
Aspaldi ikusi zenuten beste enpresa batzuetan parte-hartze industriala izatea ihesbide bat izan zitekeela eta, hainbat egoeratan, salbamendurako bide bat ere bai. Zein enpresatan zentratu zarete?
Momentuz, erabaki dugu bi ETEren egituran sartzea: Optimus 3D, fabrikazio gehigarrian espezializatutako enpresa, eta Biogenetics, genomikaren arloan eta elikagaien trazagarritasunean espezializatutako talde bioteknologikoa. Horrelako aliantzak oso garrantzitsuak dira guretzat, automozioaren sektorea aldakorra eta heldua delako, eta oso exijentea aldi berean. Ikuspuntu horretatik, uste dugu dibertsifikazioa funtsezkoa dela etorkizunerako.
Zuen sektorean badago automozio “berdeago” bateranzko joera; horrek ere markatuko zizuen bidea ezta?
Jakina. Denok dakigu nazioarteko organismoek proiektu eta helburu oso anbiziotsuak dituztela eskuartean, esaterako deskarbonizazioa, zeinak inpaktu handia izango baitu, besteak beste, automozioan, bai gidaketari dagokionez -gidaketa autonomoa nagusituko da-, eta baita ere beste hainbat alderdiri dagokionez (elektrifikazioa, eredu berriak…). Gaur egun gure lantegietan ekoizten ditugun malguki asko konbustioko motorretarako egiten dira, eta beraz, hemendik urte gutxira desagertu egingo dira. Hori gertatzen denean -denbora beharko da baina iritsiko da-, beste lan batzuk egin beharko ditugu. Horregatik hasi behar dugu gauzak planifikatzen. Ezin da zain egon azken unera arte.
Zeri erreparatzen diozue startup batean parte hartzeko aukera planteatzen duzuenean?
Aitortu behar dut gogoeta-prozesu honen hasieran zalantza asko izan nituela, baina denborarekin ohartu naiz benetan gai zirraragarria dela. Silicon Valley-ra (Estatu Batuak) bidaiatu genuenean deskubritu genuen joera hori, eta SPRI Taldearen eta BIC Araba zentroaren eskutik ekarri genuen Euskadira; eurek jarri gintuzten harremanetan gurekin bat etor zitezkeen enpresa eta startup-ekin. Lehen txandan lau kasu aurkeztu zizkiguten, eta prozesu azkar baten ostean bi aukeratu genituen, gorago aipatu ditugun Óptimus 3D eta Biogenetics.
Zerk konbentzitu zintuzten kasu bakoitzean?
Optimus 3D startup-aren kasuan erabakigarria izan zen Fernando Ohárriz eta Alberto Ruiz sustatzaileen ibilbidea (esperientzia handiko ingeniariak biak, eta sekulako gaitasuna dutenak fabrikazio gehigarriaren arloan); eta Biogenetics taldearen kasuan, zeinaren buru Javier Gamboa baitago, haren kooperatiba-filosofia eta gizartean duen inpaktua, hori oso garrantzitsua baita guretzat. Gainera, ohartu ginen Biogenetics-ek baduela gaitasuna elikagaien trazagarritasuneko enpresa-proiektu oso interesgarri bat garatzeko eta, bide horretatik, pertsonen bizitza hobetzeko.
Optimus 3D startup-arekin duzuen harremana 2017an hasi zen. Zein emaitza lortu dituzue harrezkero?
Haiekin dugun harremana duela hiru urte hasi zen, eta oso gustura gaude emaitzekin. Gure aldetik, harremanetan jarri ditugu RPK-rentzat erreferentziazkoak diren hainbat bezerorekin (adibidez Porsche), eta haiek fabrikazio gehigarrian oinarritutako portfolio zabalago bat garatzen lagundu digute. Horrek plus gehigarri bat ematen digu time market-ari dagokionez, hau da, aukera ematen digu piezak azkarrago eta eraginkorrago merkaturatzeko modu tradizionalean merkaturatu beharko bagenitu baino.
Aztertu duzue beste enpresa batzuetan parte hartzeko aukera?
Une honetan gogoeta estrategikoko prozesu batean murgilduta gaude, aukera bila gabiltza. Covid-19aren krisia, adibidez, aukera bat bihurtu da ekarri duen sufrimendua gorabehera, eta gu enpresa eta gaitasun desberdinak aztertzen ari gara. Eta enpresa helduez ari naiz, ez startup-ez, horiek ere interesatzen zaizkigu eta. Hori bera egin genuen duela zortzi urte Errioxako enpresa batekin, baina fase aurreratuago batean, hiru milioi euroko fakturazioarekin sartu ginen eta gaur egun hirukoiztu egin dugu kopuru hori. Uste dugu ekarpen handia egin diezaiekegula beste enpresa batzuei, eta datorren urteari begira gure asmoa da konpainia berriak nahiz startup-ak sartzen jarraitzea RPK-n edo lankidetza bat sinatzea beste konpainia batzuekin. Proiektua handitu nahi dugu, eta horretan ari gara.
Enpresa arloa alde batera utzita, nola itxiko duzue aurtengo ekitaldia, jakinik automozioa dela pandemiaren kolpea gogorren jasan duen sektoreetako bat?
Zorionez, urtea nahiko ona izaten ari da gertatzen ari dena gorabehera, eta indartsu gaude aurrera jarraitzeko. Aurten ez dugu asko irabaziko, baina ongi amaituko dugu urtea eta, gauzak dauden moduan, hori oso pozgarria da.
Lotutako albisteak
Surphasek merkatuan parekorik ez duen teknologia garatzen du eta gatzgabetzeko planten eraginkortasuna handitzea lortzen du
Donostiako ETEak, Europako Batzordearen 2,5 milioiko dirulaguntza lortuta, iragazkien egoera aurreikusten du denbora errealean; hala, geldialdi teknikoen % 60 murrizten du
Kimaiwi: “Gure proposamen teknologikoa balioztatzean eta nazioarteko turismo-industriaren aurrean proiektatzean zentratu gara”
Startup arabarrak online irtenbideak garatzen ditu turismo-sektorearentzat, eta hazkunde eta babes handia izan du bere bederatzi hilabeteko bizitzan.
NAW: “Gure abantaila lehiakorra 10 urte bitarteko kirol-oinetako minimalista eskaintzea da”
Silvia Echeverríak, NAWren sortzaileak, oinetako minimalistak postura-osasunean eta garapen biomekanikoan haurtzarotik helduarora arte nola eragin dezakeen azaltzen du.
Isabel Urbano: “Novia Salcedo Fundazioarekin praktiketan dauden gazteen %60k kontratu bat lortzen dute”
Novia Salcedo Fundazioak 45 urte inguru eman ditu ikasketa-ingurunetik lan-mundurako trantsizioa errazten, prestakuntza praktiko ez-laboraleko programen bidez.
AIDTEC Solutions :“Ekintzaileak zaindu egin behar ditugu”
Nekazaritza jasangarriagoa lortzeko soluzioetan espezializatutako startuparen sortzaileetako bat da Izaskun Oribe