INDEUS, Industriaren Euskal Plataformak bere lantaldeak bildu ditu eta kide berri bati ongietorria eman
Arabako Parke Teknologikoak hartu zuen ekainaren 23an Industriaren Euskal Plataformako lantaldeen batzarra eta topaketa honetan LEYCOLAN enpresari ongietorria eman zitzaion. Usurbilen kokatutako enpresa, energia sektorekoa da eta argiteria kudeatzeko soluzio berritzaileak eskaintzen ditu.
Lantaldeen batzarreko lehen atalean Metapostari buruzko informazioa jaso zuten bertaratu zirenek: Postontzi digital adimendunaren kontzeptuan oinarrituta, dokumentuak kudeatzeko prozesuak arindu eta sinplifikatzen dituen plataforma eskaintzen du erakunde honek, bereziki sinadura elektronikoa, dokumentuen entrega bermatua eta dokumentuen legezko zaintza. Ondoren LKS Next Legal enpresaren txanda izan zen, enpresentzat dituzten zerbitzuak aurkezteko. Bai batak zein besteak euren zerbitzuak euskaraz ere eskaintzen dituzte.
Aurkezpenok bukatuta, INDEUSek dituen hiru lantaldeetan bildu ziren kideak, hau da, Inguru Digitala, Euskarazko Produktuak eta Atariko lantaldeetan, bakoitzari zegozkion gaiak aztertu eta hurrengo urratsak erabakitzeko, batez ere urte hasieran finkatutako bi arloak nabarmenduz:
- Enpresetan derrigorrezko ikuskaritzak egiten dituzten enpresekin lanean jarraitzea ikuskaritzok euskaraz egiteko aukera bermatzeko.
- Euskadiko erakunde publiko eta pribatu askok erabiltzen dituzten softwareetan hizkuntza-eskaintzan euskara txertatzea eskatzeko kanpaina abiarazi.
- Trebakuntza desberdinak euskaraz egiteko dauden arazoei konponbide bila.
Aurten bost urte bete ditu INDEUS Industriaren Euskal Plataformak eta dagoeneko 32 enpresek egin dute bat ekimenarekin. Urte amaierarako kopurua handitzea espero dute plataformako arduradunek.
Zer da Indeus?
INDEUS Industriaren Euskal Plataforma da, 2018. urtean sortua, Spri-Enpresen Garapenerako Agentziak, Energiaren Euskal Erakundeak, Hizkuntza Politikako Sailburuordetzak eta Arabako, Bizkaiko eta Gipuzkoako Foru Aldundiek bultzatzen dutena. Euskaraz lan egitea erabaki duten enpresa industrialei laguntzeko sortu zen ekimena, euskarazko produktu eta zerbitzuak lortzeko bideak lantzeko. Eta ibilbide honetan INDEUSek euskararen presentzia txikia duten enpresei ere ireki dizkio ateak, aurrekoen eskarmentua besteen eredu izanik euskara industria sektore eta esparru gehiagotara hedatzeko asmoarekin.
Indeus kideak
32 hauek dira Industriaren Euskal Plataforman parte hartzen ari diren enpresa eta elkarteak: AMPO, BATZ, BIELE GROUP, BRTA, CAF, CEIT, CIKAUTXO, COPRECI, DANOBATGROUP, EGA MASTER, EGA SOLUTIONS, EGOIN, EIKA, ELAY, ENERGIA KLUSTERRA, ESLE ELKARTEA, EUSKAL HERRIKO ITSAS FOROA, FAGOR, GAIA KLUSTERRA, GOIZPER, IKERLAN, INNOBASQUE, LEYCOLAN, MAIER, OREKA IT, ORKLI, ORONA, PETRONOR, SISTEPLANT, TECNALIA, ULMA CONSTRUCCIÓN eta VICOMTECH.
Erakunde publikoak, berriz, sei: Eusko Jaurlaritzaren Hizkuntza Politikako Sailburuordetza, Spri-Enpresen Garapenerako Agentzia, Energiaren Euskal Erakundea eta Arabako, Bizkaiko eta Gipuzkoako Foru aldundiak.
Lotutako albisteak
IndeusBerri: Industria eta Euskararen plaza
Gaur albiste dira Arabako Enpresen Foroa, ETEKIN Topaketa, Nortasuna Sarean jardunaldia eta Mekanika kuantiko.
IndeusBerri: Industria eta Euskararen plaza
Gaur albiste dira ETEKIN Topaketa, Komunikaziona Bidegurutzean jardunaldia, Ebaluatorioa, Instagram II ikastaroa eta Ikusmen bidezko komunikazio.
IndeusBerri: Industria eta Euskararen plaza
Gaur albiste dira INDEUSen Batzar Orokorra, ARTEZek garatutako gunea, Instagram II ikastaroa eta 'Geruza digitala' Industria Berriaren hiztegian.
ALBERDI MEKANIZATUAK, BIOLAN eta MITXELENA Kooperatibak bat egin dute INDEUS Industriaren Euskal Plataformarekin
Urteko lehen bilera egin dute Indeus sustatzen duten erakunde publikoek eta Indeuskide diren enpresa, zentro teknologiko eta elkarteek Euskadiko Parke Teknologikoaren Abantoko campusean.
IndeusBerri: Industria eta Euskararen plaza
Gaur albiste dira ETEKIN ekonomia-solasaldien bigarren edizioaren hasiera, KomunikaziONA Bidegurutzean jardunaldia Notasuna Sareanen eskutik, BAIC - Datuaren estrategia eta Fabrika adimendun.