IndeusBerri: industria eta euskara uztartzen dituen informazioaren topagunea

Adimen artifiziala eta EBko araudi berriak, Gipuzkoako enpresen zibersegurtasunean gako. EnpresaBidea egunkariak argitaratutako erreportajea ekarri nahi izan dugu gurera, interesgarria iruditu zaigulako. Gipuzkoako Foru Aldundiaren menpe dagoen Gipuzkoako Zibersegurtasun Industrialeko zentroak, Ziurrek, zibersegurtasunaren arloan gehien nabarmentzen diren alderdiak aletu ditu bere azken txostenean. Zentroaren arabera, adimen artifizialaren (AA) gorakada eta araudi berrien onarpena izaten ari dira 20224an zibersegurtasunaren esparruan gehien nabarmentzen ari diren arloak, esaterako, hornidura-katean.

“Itzultzaile neuronalen eragina euskararen erabileran” udako ikastaroa antolatu du UIK-EHUk irailaren 11rako. Itzulinguru proiektuan itzultzaile neuronalen erabilera ikertu da, haien erabilera hobetzeko eta tresna hauek euskararen biziberritzearen mesedetan baliatzeko asmoarekin. Hizkuntza praktikak araututa dituzten erakunde eta testuinguru anitzetan jarri du arreta proiektuak: Bigarren Hezkuntzan, enpresetan, administrazioan, osasungintza, hedabideetan, euskaltegietan eta unibertsitateetan. Euskal Herriko Unibertsitateko Innoklab ikerketa-taldeak eta Soziolinguistika Klusterrak koordinatu dute proiektua eta bertan parte hartu dute Osakidetza, Elhuyar, AEK, Eusko Jaurlaritzako Hezkuntza Saila eta Hekimen euskarazko hedabideen elkarteak.

Enpresa Digitalak 5 tailer egingo ditu euskaraz irailetik abendura. Business Intelligence Power BI-rekin, ChatGPTren hastapenak, Social Media Ads, Microsoft Copilot praktikan eta ChatGPT aurreratua dira udako oporren osterako Enpresa Digitalak euskaraz eskainiko dituen ikastaroak. Lehen tailerra bi egunetan zehar egingo da, irailaren 24an eta 25ean, eta Business Intelligence Power BI-rekin izango da ikasgaia. Power BI erabiltzeko oinarrizko ezagutzak eskuratuko dituzte parte hartzaileek, beren negozioetarako erabilgarriak izan daitezkeen kontrol koadroak eta bistaratzeak sortu, modelatu eta eraldatzeko. Ikastaro erabat praktikoa izango da.

“Sekretu industrial” Industria Berriaren Spri Hiztegian. Honako baldintza hauek betetzen dituen edozein informazio edo ezagutza (teknologikoa, zientifikoa, industriala, komertziala, antolaketakoa edo finantzarioa barne): sekretua izatea; enpresa-balioa izatea, benetakoa edo potentziala, hain zuzen ere sekretua delako; titularrak arrazoizko neurriak hartu izana isilpean gordetzeko. Jabetza industrialaren babes mota bat da, informazio konfidentzial jakin bat isilpean edukitzean oinarritzen dena, eta informazio hori alderdien arteko akordio bidez saldu edo baimendu daiteke. Patente orokorrek pertsona guztien aurreko babesa ematen dute, baina patente sekretuak konfidentzialtasun-akordioaren bidez lotutako pertsonak baino ez ditu behartzen; beraz, beste pertsona batzuek emaitza bera lor dezakete, eta askatasunez ustiatu, baita patentatu eta aurrekoari hura ustiatzea eragotzi ere.