IndeusBerri: industria eta euskara uztartzen dituen informazioaren topagunea

Datorren astean “Business Intelligence Power BI-rekin tailerra” Enpresa Digitalaren eskutik. Datuak eta datuen tratamendua alderdi kritiko bilakatu dira enpresen ezagutza-esparru guztietan. Eta gero eta gehiago dira merkatuan eskuragarri dauden adimen-tresnak eta datuen analisirako tresnak, enpresa horiek dituzten analisi- eta bistaratze-beharrizanei irtenbide bat ematen saiatzen direnak. Ikastaro honetan, parte-hartzaileek Power BI erabiltzeko oinarrizko ezagutzak eskuratuko dituzte, beren negozioetarako erabilgarriak izan daitezkeen kontrol-koadroak eta bistaratzeak sortu, modelatu eta eraldatzeko. Ikastaro erabat praktikoa izango da, non parte-hartzaileek beren datuen eredu propioa sortzen ikasiko duten.

“Ekonomia Ituna, lehiakortasunerako gakoa” jardunaldia ETEKIN Ekonomia topaketa zikloaren barruan. Etekin Eusko Jaurlaritzak, Finantzen Eusko Institutuak, Bankoa ABANCAk, CaixaBankek, Kutxabankek, Laboral Kutxak eta Rural Kutxak elkarlanean antolatutako finantza arloko topaketen ziklo bat da. Ekonomia topaketa hauen helburua da ekonomia eta finantzen munduko gaurkotasunezko gaiei buruzko hausnarketa sustatzea eta harremanetarako bilgune bat sortzea. Saioak euskaraz izango dira baina aldibereko itzulpen zerbitzua erabiltzeko aukera egongo da. Etekin Ekonomia Topaketak hiru saio izango ditu 2024an, eta horietako bakoitzak gai bat jorratuko du: Donostian irailaren 25ean, Gasteizen urriaren 23an eta Bilbon azaroaren 20an hartuko ditu.

Indeus Elkarrizketak – i+Med: “Empresaren balioak transmititzeko garrantzitsua da hizkuntza eta kultura eskutik joatea”. Orain dela hamar urte sortu zen i+Med enpresa Gasteizen berrikuntza teknologikoak sortu, pertsonen osasuna sustatu eta irtenbide teknologiko berriak asmatzeko helburuarekin. Hamarkada baten buruan 130 langiletik gora ditu, Arabako Parke Teknologikoan kokatuta dago eta bere eraikin propiora mugitzekotan dira egunotan. Sandra Benito, Laborategiko gerentea izan dugu solaskide Indeus Elkarrizketa honetan. “Bageneukan gogoa eraikin berri bat egiteko, gure gustura, gure beharrak asetu zitzakeen eraikin bat eta gure nortasuna emateko erabaki dugu izena hartu behar duela GURE ETXEA.” I+Med-en eraikin berri horretan egongo da konpainiak sortuko duen Nanohidrogel adimendunen nazioarteko Institutua, munduan lehenengoa izango dena.

“AA Ahul” Industria Berriaren Spri Hiztegian. Adimen Artifiziala hitzetik hortzera darabilgun kontzeptuari eskainiko diogu tarte hau hurrengo asteetan, izan ere adiera asko baititu modan dagoen berba honek. Adimen Artifizial ahul esaten dugunean zertaz ari gara? Zeregin berezi edo mugatu baterako sortutako adimen artifizialeko sistema. Gaur egungo AA sistema asko, seguruenik, arazo jakin batean oinarritutako IA ahulak dira. Adibidez, laguntzaile digital guztiak AA ahulak dira, aurrez zehaztutako funtzio-tarte baten barruan jarduten baitute.