Eusko Jaurlaritzak Euskal Finantza Aliantza sustatuko du, lankidetza publiko-pribatuak 4.000 milioi mobiliza ditzan Euskadiren eraldaketa ekonomiko eta industrialerako
Imanol Pradales lehendakaria buru dela egin da gaur Eusko Jaurlaritzaren eta bederatzi finantza-erakunderen (Euskal BGAE Federazioa, BBVA, Laboral Kutxa, Kutxabank, BBK Fundazioa, Kutxa Fundazioa, Vital, BasqueFik eta Elkargi) arteko protokoloa sinatzeko ekitaldia. Protokolo horrekin abian jarri da Euskal Finantza Aliantza, Noël d’Anjou Ogasun eta Finantzetako sailburuak eta Mikel Jauregi Industria, Trantsizio Energetiko eta Jasangarritasuneko sailburuak sustatuta. Ekimen hori lankidetza publiko-pribatuaren bidez lortu da, “gure finantza-ahalmenak bat etor daitezen eta Euskadiren eraldaketa ekonomiko eta industrialaren zerbitzura jar daitezen”, eman du aditzera lehendakariak Bilbon, Euskal Autonomia Erkidegoko ehun bat agintariren eta finantza-arloko ordezkariren aurrean egindako ekitaldian.
Lehendakariaren iritziz, alde guztien artean gaur sinatutako konpromisoak erantzuten dio Gobernuak, ziurgabetasuneko nazioarteko agertoki batean, “barne-ekonomia babestuko duten soluzioak bilatzeko” duen erantzukizunari. Horrek “erantzukizunak bere gain hartzea, indarrak batzea eta gure esku dauden gaitasun guztiak aktibatzea eskatzen du. Europan eta Euskadin premiaz jardutea eskatzen du”.
Ildo horretan, eta “bizi dugun une historikoak eskatzen dituen apustu zehatz eta irmoen” ildotik, Imanol Pradalesek iragarri du bera buru duen gobernuak abian jarri dituela Finantzen Euskal Institutuari 1.000 M€-ko finantza-ahalmen gehigarria emateko tramiteak. Horretarako, Eusko Legebiltzarrera 2025eko aurrekontuak aldatzeko lege-proiektu bat bidali du, Finantzen Euskal Institutuarentzako zuzkidura horretarako epe luzeko zorpetzea 1.000 M€-tan handitzea baimentzeko.
Baliabide horiek Euskadiren eraldaketa ekonomikoari lotzen zaizkion finantza-inbertsioak egiteko soilik erabiliko dira, batik bat teknologia- eta industria-sektorerako eta eraldaketa horrek eskatzen dituen azpiegitura zientifiko eta energetikoetarako. Era berean, ekintzailetzaren sustapenean eta industria eta ekonomia berrien sorreran lagunduko dute. Euskal Finantza Aliantza berria industria-lehiakortasunaren zerbitzura dauden beste tresna batzuei gehitzen zaie, hala nola lehendakaria buru duen Industriaren Defentsarako Taldeari edo 500 milioi euroko zuzkidura duen 2025eko Industriarentzako Laguntza Planari. Sinetsita gaude industria dela Euskadirentzat aberastasun-, aurrerabide- eta ongizate-iturria.
“Draghi txosteneko batetik hiru araua aplikatuta, gure helburua da 1.000 M€-ko inbertsio publiko hori gai izatea gutxienez 3.000 milioi kapital eta aurrezki pribatu gehiago mobilizatzeko, eta, horrela, 4.000 milioiko finantza-indarra lortzea legealdi honetan”, planteatu du lehendakariak.
4.000 M€ horiek hiru norabidetan esku hartzeko aukera emango dute:
* Enpresak Euskadin errotzeko operazioetan laguntzea,
* Enpresa-hazkunderako aukerak baliatzea, inbertsio-, handitze- edo eskuratze-operazioen bidez, edo
* Kanpoko kapitala erakartzeko eta proiektu estrategikoak bultzatzeko tresna eta ibilgailu mistoak sortzea.
“Hau lehen urratsa da. Baina ez da urrats bakarra izango”, azpimarratu du Imanol Pradalesek. Eusko Jaurlaritzak beste ekimen batzuk aktibatzen jarraituko du Aliantza horren babesean, eta alderdi guztiek konpromisoa hartzen dute “indarrak batzeko eta gure Herriaren gaurko eta etorkizuneko ongizatearen zerbitzura jartzeko”.
Gaur sinatutako ekintza-protokoloan, aldeek helburu hauek, besteak beste, lortzeko borondatea adierazi dute: Euskal industria, enpresa eta teknologiaren arloko sarea errotzeari eustea eta errotzea areagotzea; Euskadi inbertsiorako lurralde erakargarri gisa finkatzea; eta elkarrizketa publiko-pribatua hobetzea, industriaren berrikuntza eta lehiakortasuna indartu daitezen. Azken batean, Euskal Finantza Aliantza berriak finantza-ahalmen propioak aktibatu nahi ditu, Euskadi Europaren berrindustrializazioaren punta izan dadin.
Lehendakariak gogorarazi du Euskal Finantza Aliantza hori “ez dela hutsetik abiatzen”, eta berariaz aipatu du Ekonomia Itunaren potentzialtasuna eta “kontu publikoen kaudimen egiaztatua, nazioartean aitortua”. Adibide adierazgarria da Eusko Jaurlaritzak duela gutxi jaulkitako zor publikoak —700 M€, bonu jasangarrietan— eskaintza baino zortzi aldiz eskari handiagoa izan duela, eta nagusiki nazioarteko inbertitzaileek eskuratu dutela.
“Manufaktura-kultura eta industria-ehun ireki, berritzaile eta lehiakorra ditugu. Giza kapital zabala eta kualifikatua dugu. Eta Euskal Autonomia Erkidegoko finantza-sektorea dinamikoa, osasuntsua eta kaudimenduna da. Finantza Aliantza honek Euskal Autonomia Erkidegoko kapitala eta aurrezkia mobilizatu nahi ditu, eta, era berean, kapitala eta kanpoko aurrezkia erakarri nahi ditu Herri gisa haz gaitezen”, nabarmendu du Euskal Finantza Aliantza izenarekin gaur abian jarri den asmo handiko ekimen publiko-pribatu honen esparru gisa.
Lotutako albisteak
Eusko Jaurlaritzak Gauzatu Industria programa aktibatu du 28 milioi eurorekin
Oinarri teknologiko eta berritzailea duten enpresa txiki eta ertainen sorrera eta garapena bultzatzeko
Eusko Jaurlaritzak bi mila milioi euro baino gehiago aktibatu ditu muga-zergen eta merkataritzaren gerrari aurre egiteko neurrien lehen sortan
Lehendakariak azpimarratu du Euskadi prest dagoela egoera horri aurre egiteko, eta dei egin die Euskal Autonomia Erkidegoko eragile guztiei egoera horri batasunetik aurre egiteko
Industria Erronka-k 700 ikasle baino gehiagok industria-enpresa bat izatea simulatzea ahalbidetzen du
Industria Erronka Bizkaiko Foru Aldundiaren eta Eusko Jaurlaritzaren laguntzari esker posible da, SPRI - Euskal Enpresen Garapenerako Agentziaren bidez
Optidel Biosystems-ek arrisku-kapitaleko inbertitzaileen babesa jaso du
Optidel Biosystems startupek kosmetika sektorean osagai aurreratuak eta konponbide pertsonalizatuak garatzeko muga berriak irekiko ditu
Euskadik bere automobilgintza sektoreko industria indartuko du errepideko garraioaren deskarbonizazio adimendunerako laguntza-programa berri batekin
Eusko Jaurlaritzak "Emisio Txikiagoko Ibilgailuak" laguntza-programa aurkeztu du Industriaren Defentsarako Taldearen baitan, euskal automobilgintzaren sektoreak egungo muga-zergen gerraren testuinguru globalean dituen erronkei erantzuteko
Industria Defendatzeko Taldeak Euskadiko industriari laguntzeko lehen neurria onartu du
Industria Defendatzeko Taldeak lehen laguntza-programa bat aurkeztu du, “Emisio gutxiagoko ibilgailuak” erosteko, Euskadin errepideko garraioaren deskarbonizazio adimendunean aurrera egiteko eta, aldi berean, euskal industriarako funtsezkoa den sektore bati, automobilgintzari, laguntzeko
Haizea Wind Groupek bere hazkundea sendotu du, 2024an 371 milioiko salmentekin eta 18 milioiko irabaziekin
Haizea Wind Groupek, gainera, 2025ean hazkundea sendotzea aurreikusten du, kontratatutako eskaera zorroari esker
Mikel Jauregi: “Mundu mailan zabaltzen ari den ziurgabetasunaren aurrean, Euskaditik multilateralismoaren aldeko apustua egiten dugu”
"Euskadi herri esportatzailea da, beraz muga-zergek eragina izango dute gure esportazioetan. Baina eragin hori nahiko txikia izango da"
Euskadik eta Kataluniak indarrak batu dituzte Europar Batasunaren berrindustrializazio prozesuan
Eusko Jaurlaritzak eta Kataluniako Generalitateak aldebiko topaketa egin dute, Euskadik eta Kataluniak industria-polo gisa duten estatusaren garrantzia nabarmentzeko, Atlantikoko eta Mediterraneoko eskualdeen buru diren heinean. Bi lurraldeek Estatuko industriaren arloko barne-produktu gordinaren % 25 biltzen dute, eta Europar Batasuneko eskualde industrializatuenen artean daude
Ekonomia eta Finantzak; ETEKIN Topaketen edizio berria
Andrés Arizkorreta, Ane Insausti eta Lander Beloki, martxoaren 26an Donostiako Aquariumean