Eusko Jaurlaritzaren industriari laguntzeko plan berriaren bidez, 500 milioira arte jarriko dira industria-sektorea indartzeko, arreta berezia eskainiko zaie ETEei
“Enplegua, aberastasuna eta ongizatea sortzen dituen gure industriaren aldeko apustua egiten dugu”
Eusko Jaurlaritzak industriari laguntzeko beste plan bat (2025) onartu du. Planak 500 milioi euro arteko zuzkidura izango du industria-sektorea indartzeko, eta arreta berezia eskainiko die Euskadiko enpresa txiki eta ertainei.
Hala jakinarazi du Mikel Jauregi Industria, Trantsizio Energetiko eta Jasangarritasuneko sailburuak, Gobernu Kontseiluaren bileraren osteko prentsaurrekoan. “Badakigu une historikoa bizi dugula, eta nazioartean dagoen ziurgabetasuna dela ziurtzat jo dezakegun gauza bakarra. Horregatik, Eusko Jaurlaritzak 500 milioi jarriko ditu Euskadiko industriari etorkizuneko erronketarako prestatzen laguntzeko, betiere teknologian, berrikuntzan, nazioartekotzean edo digitalizazioan inbertsioak egin ditzaten. Plan horretan, pisu handia du industriaren deskarbonizazioak; izatez, planak 80 milioi euroko programa espezifiko bat du autokontsumorako elektrizitatea sortzeko eta energia berriztagarrietarako. Enplegua, aberastasuna eta ongizatea sortzen dituen gure industriaren aldeko apustua egiten dugu, eta Laguntza Plan berri honekin industria indartzen eta errotzen lagundu nahi dugu, baita trantsizio energetikoaren edo eraldaketa digitalaren ondoriozko erronkei aurre egiten ere”.
Industriari laguntzeko plana (2025) Euskadiko industria-sare ekonomikoaren jarduerari bultzada ematera bideratuta dago, nazioarteko ziurgabetasun-egoera batean. Hiru zutabetan banatzen da: industria gehiago, industria hobea eta emisio gutxiago, eta zortzi arlo tematiko ditu. Helburua da enplegua, aberastasuna eta ongizatea sortzen dituen eta Euskadiko ekonomiaren oinarri eta motorra den Euskadiko industriaren dinamismoari eustea eta enpresa txiki eta ertainei arreta berezia eskaintzea.
Helburua da Euskadiko industriaren dinamismoari eustea eta enpresa txiki eta ertainei arreta berezia eskaintzea
Sailak koordinatuta, laguntza horien kudeaketaz arduratzen diren sozietate guztien lana eta ezagutza (SPRI Taldea, EEE, IHOBE, URA, Basque Trade & Investment eta Arrisku Kapitaleko Sozietatea) islatzen da enpresen eskura dauden programetan.
Katalogo digital bat egin da, web-orri honetan kontsulta daitekeena. Katalogo horretan deskribatzen dira laguntzaren edo zerbitzuaren izena, aurtengo aurrekontua, laguntza norentzat den, argitalpen-data eta eskatzeko modua. Industria Sailak enpresei eskaintzen dizkien zerbitzu nagusiei buruzko atal bat ere badago. Gainera, martxoan hiru informazio-jardunaldi egingo dira (lurralde historiko bakoitzeko bat), eta enpresek Laguntza Planari buruzko informazio guztia bildu ahal izango dute haietan.
Kontsultatu hemen Industriari laguntzeko plana (2025)
Industria gehiago
Industria-jarduera gehiago sortzeari eskainitako atala zuzentzen da industria-politika garatzeko tresnak martxan jartzera, betiere industria-proiektu berriak sor daitezen, enpresa-ekimen berrien hazkundeari lagun dakion eta enpresa liderrak eta bultzatzaileak Euskadin erro daitezen. Arlo hauek barne hartzen ditu: industria-garapena, zenbait funtsezko programen bidez —Gauzatu Industria (28 M€), Indartu (20 M€) edo Renove Smart Industry (8 M€); ekintzailetza, Ekintzaile eta Ekintzaile + programekin (2,7 M€); eta nazioartekotzea, Nazioarteko Gauzatu (5 M€) eta Zabaldu (4,5 M€) programekin eta Global Training (6,45 M€) eta BEINT (3,6 M€) bekekin.
Industria hobea
Industria hobea sortzearen esparruan, digitalizazioak eta teknologia berriek enpresei eskaintzen dizkieten aukeretan sakontzen da, betiere Euskadiko industriaren posizio berritzailea eta gaitasun teknologikoa areagotzen jarraitzera begira. Honako arlo hauek barne hartzen ditu: teknologia eta I+G, Hazitek (93 M€), Emaitek Plus (58,6 M€) edo Elkartek (47 M€) programekin; berrikuntza, Fast Track Innobideak (10 M€) edo Hazinnova (2,7 M€) programekin; eta eraldaketa digitala, Industria Digitala (7,5 M€) edo Zibersegurtasun Industriala (4,5 M€) programekin.
Emisio gutxiago
Azkenik, emisio gutxiago kapituluak industriaren deskarbonizazioaren aldeko apustu handia barne hartzen du, eta efizientzia energetikoan eta sorkuntza berriztagarrian sakontzeko tresnak eta laguntzak eskaintzen ditu. Era berean, ingurumen-proiektuetarako eta ekonomia zirkularreko proiektuetarako laguntzak eskaintzen ditu, hondakinak berrerabili eta murrizteko bidean. Bloke honetan deskarbonizaziora bideratutako atalak sartzen dira, eta arlo horren barruan programa hauek, besteak beste, barne hartzen dira: autokontsumorako elektrizitatea sortzea eta energia berriztagarri bidezko kontsumo termikoak elektrifikatzea (80 M€), deskarbonizazio industriala (22 M€) edo itsas energiak (2,5 M€); eta ekonomia zirkularra, ingurumen-proiektuetarako laguntzekin (5 M€) eta ekoberrikuntza zirkularrerako laguntzekin (1,5 M€).
Lotutako albisteak
Eusko Jaurlaritzak Gauzatu Industria programa aktibatu du 28 milioi eurorekin
Oinarri teknologiko eta berritzailea duten enpresa txiki eta ertainen sorrera eta garapena bultzatzeko
Eusko Jaurlaritzak bi mila milioi euro baino gehiago aktibatu ditu muga-zergen eta merkataritzaren gerrari aurre egiteko neurrien lehen sortan
Lehendakariak azpimarratu du Euskadi prest dagoela egoera horri aurre egiteko, eta dei egin die Euskal Autonomia Erkidegoko eragile guztiei egoera horri batasunetik aurre egiteko
Industria Erronka-k 700 ikasle baino gehiagok industria-enpresa bat izatea simulatzea ahalbidetzen du
Industria Erronka Bizkaiko Foru Aldundiaren eta Eusko Jaurlaritzaren laguntzari esker posible da, SPRI - Euskal Enpresen Garapenerako Agentziaren bidez
Optidel Biosystems-ek arrisku-kapitaleko inbertitzaileen babesa jaso du
Optidel Biosystems startupek kosmetika sektorean osagai aurreratuak eta konponbide pertsonalizatuak garatzeko muga berriak irekiko ditu
Euskadik bere automobilgintza sektoreko industria indartuko du errepideko garraioaren deskarbonizazio adimendunerako laguntza-programa berri batekin
Eusko Jaurlaritzak "Emisio Txikiagoko Ibilgailuak" laguntza-programa aurkeztu du Industriaren Defentsarako Taldearen baitan, euskal automobilgintzaren sektoreak egungo muga-zergen gerraren testuinguru globalean dituen erronkei erantzuteko
Industria Defendatzeko Taldeak Euskadiko industriari laguntzeko lehen neurria onartu du
Industria Defendatzeko Taldeak lehen laguntza-programa bat aurkeztu du, “Emisio gutxiagoko ibilgailuak” erosteko, Euskadin errepideko garraioaren deskarbonizazio adimendunean aurrera egiteko eta, aldi berean, euskal industriarako funtsezkoa den sektore bati, automobilgintzari, laguntzeko
Haizea Wind Groupek bere hazkundea sendotu du, 2024an 371 milioiko salmentekin eta 18 milioiko irabaziekin
Haizea Wind Groupek, gainera, 2025ean hazkundea sendotzea aurreikusten du, kontratatutako eskaera zorroari esker
Mikel Jauregi: “Mundu mailan zabaltzen ari den ziurgabetasunaren aurrean, Euskaditik multilateralismoaren aldeko apustua egiten dugu”
"Euskadi herri esportatzailea da, beraz muga-zergek eragina izango dute gure esportazioetan. Baina eragin hori nahiko txikia izango da"
Euskadik eta Kataluniak indarrak batu dituzte Europar Batasunaren berrindustrializazio prozesuan
Eusko Jaurlaritzak eta Kataluniako Generalitateak aldebiko topaketa egin dute, Euskadik eta Kataluniak industria-polo gisa duten estatusaren garrantzia nabarmentzeko, Atlantikoko eta Mediterraneoko eskualdeen buru diren heinean. Bi lurraldeek Estatuko industriaren arloko barne-produktu gordinaren % 25 biltzen dute, eta Europar Batasuneko eskualde industrializatuenen artean daude
Ekonomia eta Finantzak; ETEKIN Topaketen edizio berria
Andrés Arizkorreta, Ane Insausti eta Lander Beloki, martxoaren 26an Donostiako Aquariumean