FFinkatuzek 15 M-ko inbertsioa egingo du Arania Taldean, altzairuaren eraldaketaren arloko erreferentean
Eusko Jaurlaritzak, FINKATUZen bidez, eta Finantzen Euskal Institutuak (FEI) kudeatuta, ARANIA TALDEAN 15 milioi euroko kapital-gehikuntza egitea formalizatu du gaur. Ogasun eta Finantza Sailak eta Industria, Trantsizio Energetiko eta Jasangarritasun Sailak zenbait hilabetez gaia landu eta aztertu ondoren, egingo den ekarpen horrek partaidetza minoritarioa bermatzen du altzairuaren eraldaketan liderra den eta Europan erreferentea den industria-talde horretan. Eragiketa kokatzen da Eusko Jaurlaritzak Euskadiren hazkunde ekonomikoa sustatzeko, euskal enpresak errotu eta nazioartean hedatzeko eta industria-sarea sendotzeko duen konpromisoaren barruan. Euskadiko industria-politikaren funtsezko hiru helburutan jarduten da: industria gehiago, industria-taldearen hazkundea eta nazioartekotzea babestuz; industria hobea, berrikuntzarako eta garapen teknologikorako gaitasunaren alde eginez; eta emisio gutxiago, jasangarritasunerako eta emisio txikietarako estrategiarekin.
Akordio horren esparruan, Noël d’Anjou Ogasun eta Finantzetako sailburuak eta Mikel Jauregi Industria, Trantsizio Energetiko eta Jasangarritasuneko sailburuak Taldeak Zornotzako Euba auzoan duen lantegia bisitatu dute, instalazioak enpresaren zuzendaritza-taldearen eskutik ezagutzeko, Eric Arana presidentea buru zela.
ARANIA TALDEA duela 85 urte ezarri zen Euskadin, eta urtean 400.000 tona altzairu prozesatu ekoizteko gaitasuna du. Abangoardia teknologikoaren aldeko apustua egin du etengabe, eta, horri esker, sektoreko adierazgarririk handienetako bat bihurtu da. Nazioarteko merkatu handietan presentzia sendotu du, 65 herrialdetan baino gehiagotan jarduten baitu eta % 80ko esportazio-ratioak baititu. Taldea bost markak osatzen dute: Arania, Aratubo, AR Racking, AR Shelving eta Lamincer. ARANIA TALDEAREN hazkundearen eragile nagusia giza kapitala izan da, inklusibitatearen, berdintasunaren eta pertsonen ahalduntzearen aldeko konpromiso irmoarekin. 1.085 pertsonak baino gehiagok lan egiten dute taldean.
Bi aldeek, Eusko Jaurlaritzak eta Arania Taldeak, operazio honen berri eman dute gaur prentsaurrekoan. Ogasun eta Finantzetako sailburu Noël d ‘Anjouk bere hitzaldian adierazi duenez, “gure sailek hainbat hilabete daramatzate ekarpen hori gauzatzeko lanean eta analisian; ekarpenak altzairuaren eraldaketan liderra eta Europan erreferentea den industria-taldean gutxiengoen partaidetza bermatzen du. Finantzen Euskal Institutua eta Euskadiko Arrisku Kapitaleko Sozietatea elkarlanean aritu dira operazioa arrakastaz gauzatzeko. Finkatuzek 226 milioi euro ditu gaur egun euskal konpainien alde apustu egiten jarraitzeko, eta 2025ean zehar ziur nago operazio gehiago ikusiko ditugula”.
Bestalde, Industria, Trantsizio Energetiko eta Jasangarritasuneko sailburu Mikel Jauregik nabarmendu duenez, “Euskal Autonomia Erkidegoa Europan berrindustrializazioaren aitzindari izatea nahi dugula aldarrikatzen dugunean, gaurkoa bezalako eragiketez ari gara. Arania Taldea Europan altzairuaren eraldaketan punta-puntako industria da, eta bere kapitalean parte hartze honekin herri-mailako apustu bat egiten dugu posizio lider hau indartzeko eta bere sustraitzea bermatzeko. Eusko Jaurlaritzak Araniari ere lagundu nahi dio bere etorkizuneko erronketan, bai nazioartekotze-prozesuan, bai bere gaitasun berritzailean, bai bere deskarbonizazio-estrategian. Gure proposamena argia da, hots, sektore honek aberastasuna, enplegua eta ongizatea sortzeari dagokionez gizarte gisa egiten digun ekarpenaz jabetzen den industria-politika. Azken batean, industria gehiago, industria hobea eta emisio gutxiago eragiten dituenari buruz ari gara hizketan”.
Halaber, Arania Taldeko presidente Eric Aranak nabarmendu duenez, “Finkatuzen babesa jasotzeak harrotasunez betetzen gaitu eta norabide onean goazela adierazten digu. Akordio honek zentzu handia du guretzat; familia-enpresa bezala gure 85 urteko historiarekin eta gure balioekin oso bateragarria den bazkide bat aurkitu dugu”.
FINKATUZen babesarekin, datozen hiru urteetan 50 M€ inguruko inbertsio-plana bultzatu nahi da, eta inbertsio horietatik erdia baino gehiago Euskadin gauzatuko dira. Inbertsio horiei esker, industria-taldearen lidergoa sendotu ahal izango da, eta negozio bakoitzean erreferentzia gisa finkatu ahal izango da. Hazkunde-plan hori hiru arlotan ardaztuko da:
- Jasangarritasun-estrategia indartzea, emisio txikiko altzairua garatzearekin.
- Hazkunde- eta nazioartekotze-estrategia bultzatzea (Ameriketako Estatu Batuak eta Latinoamerika).
- Lantokien digitalizazio-gaitasunak eta teknologia berriak hobetzea eta indartzea.
FINKATUZek Euskal enpresa estrategiko eta traktoreetan egiten duen laugarren eragiketa da hau (ITP Aero, CAF eta Kaiku Korporazioan egindako eragiketekin batera), eta beste bi sektore biltzen ditu: altzairu-eraldaketa eta industria-apalategiak. Hala, inbertsio-laguntza instituzionala indartzen da funtsezko sektoreetan, hala nola aeronautikan, garraioan, nekazaritzako elikagaietan eta siderurgian.
Lotutako albisteak
Elkargik tamaina bikoiztu du, enpresa txiki- ertainen finantza erakunde gisa finkatuaz
2024an, 1400 enpresa ingururi eman die laguntza, eta gaineratu egitean da ia 11.300 enpresetarako indarrean duen finantziazioari, zeintzuek 38.500 milioi euroko fakturazioa duten eta 250.000 enplegu baino gehiago ordezkatzen dituzten.
Mikel Jauregi: “Nazioarteko ziurgabetasunaren aurrean, baikortasunez eta ilusioz ari gara lanean Euskadiko industria Europako berrindustrializazioaren buru izan dadin”
Mikel Jauregi sailburuak modu positiboan baloratu du Sidenorreko presidente José Jainaga enpresaria buru duen euskal partzuergoak Trilantic funtsari Talgoren % 29,7 erosteko aurre-akordioa. Partzuergo horrek Eusko Jaurlaritzaren -Finkatuz Funtsaren bitartez- eta Caja Vital Kutxa eta Bilbao Bizkaia Kutxa fundazioen babesa du
Euskadik apustu industriala indartu du talde estrategiko batekin, Europan kokatzeko, erronka global handiei aurre egiteko eta nazioarteko jokalekuaren aldaketei aurrea hartzeko
Imanol Pradales lehendakaria buru izan da Defentsa Industrialerako Taldean. Foro honetan, erakundeak eta produkzio-sektoreak biltzen dira, gero eta handiagoa den protekzionismoaren eta ezegonkortasun globalaren aurrean estrategiak diseinatzeko eta lerrokatzeko
Eusko Jaurlaritzaren industriari laguntzeko plan berriaren bidez, 500 milioira arte jarriko dira industria-sektorea indartzeko, arreta berezia eskainiko zaie ETEei
Katalogo digital bat egin da, SPRIren web-orrian web-orrian kontsulta daitekeena. Katalogo horretan deskribatzen dira laguntzaren edo zerbitzuaren izena, aurtengo aurrekontua, laguntza norentzat den, argitalpen-data eta eskatzeko modua
Euskal enpresak dagoeneko has daitezke tramitatzen Gauzatu Industria, Indartu eta Deskarbonizazio Industriala programetako laguntzak
Aurre-eskaera aurkeztuz gero, diruz laguntzeko moduko inbertsiotzat hartu ahal izango dira programa bakoitzaren deialdia baino lehen hasitako inbertsioak.