Engranajes Juaristi enpresa zuzendaritza-organoetako genero-berdintasunagatik nabarmentzen da
Engranajes Juaristi Zarautzen dago (Gipuzkoa) eta erreferentea da engranajeen sektorean 1958an sortu zenetik. Esperientzia eta abangoardiako teknologia uztartzen dituen enpresaren bereizgarria da potentziaren transmisioan soluzio zehatzak eskaintzen dituela eta merkatuaren eskarietara azkar egokitzen dela. 2023an SPRI Taldeak eginiko Emakumeen inpaktua industriako lehiakortasunean azterketan parte hartu zuen ia 500 enpresetako bat da.
Emakumeak dira enpleguaren % 12,5 (azterketan parte hartu duten enpresen batezbestekoa % 21,74koa da), baina zuzendaritzako postuetan, Zuzendaritza Kontseiluan eta Batzordean, genero-berdintasuna dago (% 40-% 60 emakumeak eta gizonak). Inkesta egindako enpresen % 19an eta % 13an soilik gertatzen da hori.
Enpresak azterketan identifikatutako kontziliazio-neurri guztiak ditu ezarrita eta neurri horiek modu parekatuan aplikatzen dira gizonen eta emakumeen artean. Ana Belen Juaristik zuzentzen du enpresa duela 40 urtetik eta funtsezkoa izan da enpresaren eraldaketan. Enpresaren berdintasuneko ikuspegia lehiakortasunerako motorra izan da, SPRIren txostenak jasotzen duenez.
Enpresak parekidetasun nabarmena lortu du zuzendaritzako lanpostuetan eta Zuzendaritza Batzordean, eta emakumeak zuzendaritza nagusian eta arlo estrategikoetan egotea enpresaren bilakaera naturalaren parte izan da, egungo zuzendaritza-taldearen sentsibilitateak eta konpromisoak bultzatuta.
Enpresak arlo teknikoetan emakumezkoen profilak lortzeko erronkari egin behar dio aurre, batez ere, mekanikarekin lotutako Lanbide Heziketan, ikasle gehienak gizonezkoak baitira. Joera hori aldatzeko, Engranajes Juaristik aktiboki sustatzen ditu ikasketa teknikoak emakumeen artean eta lankidetzan aritzen da tokiko ikastetxeekin (LH eta DBH), hitzaldiak eta enpresa-bisitak eskainiz, etorkizuneko belaunaldiak inspiratzeko. Gainera, hautaketa-prozesuetan zehar, emakume hautagaiei bereziki erreparatzen diete, haien balio guztia erakutsi dezaketela bermatzeko.
Kontziliazio-politikak
Halaber, Engranajes Juaristiren kontziliazio-politikak adierazgarriak dira. Sektore horretan telelana aplikatu ezin den arren, ekoizpen-lana delako, enpresak ordutegiak malgutzeko neurriak eta zaintza-baimenak ezarri ditu, langileen beharretara egokituz. Ana Belen Juaristik nabarmendu du politika horiei esker laneko giroa asebetegarriagoa dela eta enplegatuek fideltasun handiagoa dutela. “Badakigu ekoizpen-orduak galtzen ditugula, baina hobeto egindako lana eta langile fidelagoak irabazten ditugu”, nabarmendu du Juaristik. Enpresak ordutegiak egokitzeko edo gaueko txandara aldatzeko eskaera bakoitza aztertzen du, arrazoi pertsonalengatik edo eskolako oporretan seme-alabak zaintzeagatik laneko ordutegia egokitu behar duten langileen kasuan.
Kontziliazioaren aldeko apustu horrek erakusten du berdintasunarekiko konpromisoa integratuta dagoela Engranajes Juaristi enpresaren kultura korporatiboan eta hala islatzen da Enpresa Politikan. Testuinguru horretan, berdintasun-politikak garatu dituzte, tartean, jazoerak bideratzeko eta sexu-jazarpena eta sexuagatikoa prebenitzeko protokoloak eta hizkera ez sexista ezartzea. Enpresaren gobernantzan berdintasunarekiko jardun irmoa erakutsi du.
Enpresak nabarmendu du genero-berdintasuna funtsezkoa dela lehiakortasunerako; izan ere, erabakiak hartzea aberasteko eta enpresak merkatuan duen posizioa indartzeko askotariko ikuspegia eskaintzen du. “Genero-berdintasunarekin lortzen den orekak erabakiak hartzea hobetzen du eta enpresaren egonkortasuna eta jasangarritasuna ahalbidetzen du”, nabarmendu du Juaristik.
Horri dagokionez, esan du beharrezkoa dela emakumeak industria-arloan sartzeko prozesua azkartzea eta administrazio publikoek prozesu horretan duten ezinbesteko rola azpimarratu du. Emakumeen gutxieneko ordezkaritzaren ehunekoak soluzio ideala ez direla badakien arren, uste du beharrezko tresna direla emakumeek lidergo-rolak hartzeko. “Bidea oso geldoa da eta araudiak behar ditugu emakumeak erabaki-postuetara azkarrago iristeko”, nabarmendu du Ana Belen Juaristik.
Engranajes Juaristiren kasuak agerian uzten du tradizioa eta berdintasunarekiko konpromisoa eskutik joan daitezkeela eta enpresak indartu ditzakeela. Enpresak espero du beraien esperientzia beste erakunde batzuentzat inspiratzaile izatea, lan-ingurune parekideagoa eta dinamikoagoa lortzeko, eta argi utzi du berdintasunarekiko konpromisoa berrikuntzarako eta arrakastarako motorra izan daitekeela, baita sektorerik errotuenetan ere.
Lotutako albisteak
Aloka, profesionalen artean ikus-entzunezko materiala alokatzeko plataforma
Gipuzkoako startup-ak hainbat ekipo eskaintzen ditu, hala nola kamerak, grabagailuak, mikrofonoak, droneak. Mobile World Congress-eko 4YFN biltzarrean parte hartu zuen, SPRI Taldeak kudeatutako stand batekin, webgunea inbertsore eta bezero potentzialei aurkezteko.
Haizelur, nazioartekotzearen aldeko apustua egiten duen doitasun-mekanizazioaren arloko Debako ETEa
Enpresaren esportazioek SPRI Taldearen zibersegurtasuneko programaren dirulaguntza jaso dute eta negozioaren % 35era iritsi dira dagoeneko
Metagra, mende erdiko berrikuntza automobilgintzarako hotzeko estanpazioan
Bergarako enpresa pieza konplexuen fabrikazioan sendotu da, jasangarritasunaren eta berrikuntzaren alde eginez.
Senvia Systems-ek beste enpresa batzuk gidatzen ditu haien sustapenean eta eraldaketa digitalean
Iaz sortutako enpresa gipuzkoarrak sistemetan, komunikazioetan eta zibersegurtasunean oinarritutako IT zerbitzuak eta aholkularitza eskaintzen ditu.
Jon Ander Egaña: “BASQUE FOOD CLUSTERrek elikadura euskal industriaren sektore estrategiko gisa kokatzea lortu du”
Elikatze-katearen euskal elkartea 150 enpresa eta erakunde baino gehiagoren lehiakortasuna hobetzeko lanean ari da, berrikuntzaren garapenarekin, lankidetza-proiektuekin eta teknologien integrazioarekin.
Siteco, 30 urte automatikoki ordaintzeko makinak ekoizten
Arabako enpresak administrazio publikoarekin eta ostalaritza sektorearekin egiten du lan, eta urteak daramatza nazioarteko merkatuan.
Akting, gizarteari balioa emateko teknologia
Gipuzkoako enpresak euskarri desberdinetarako aplikazioak garatzen ditu eta digitalizazioaren, datuen analisiaren eta prozesuen optimizazioaren aldeko apustua egiten du.
Mecanizados Patro enpresak “fidagarritasuna, segurtasuna eta eraginkortasuna” eskaintzen ditu trenbide-sektorean
Serie laburretarako eta luzeetarako pieza espezifikoak fabrikatzen ditu enpresa arabarrak, doitasun handiko lan-tresna eta makinekin.
Elvira, berrikuntza eta tradizioa osagai nagusi dituen istorio gastronomikoa
Harategi-urdaitegi txiki bat izatetik, gaur egun hamar establezimendu inguru ditu etxean egingo liratekeen moduan prestatutako produktuak saltzeko, online dendan ere saltzen direnak.
Lorra, lau hamarkada inguru Bizkaiko nekazaritzako elikagaien kooperatibismoaren funtsezko zutabe gisa
Gaur egun, erakundearen lehentasuna zahartutako sektore honetako erretiroak ordezkatzea da, belaunaldi-erreleboaren bidez.