2025era arteko Euskadiko zibersegurtasun plan estrategikoak sektoreko enpresa-ehuna dinamizatu nahi du
Zibersegurtasuneko Euskal Zentroak (BCSC) 2025. urtera arteko plan estrategiko bat egin du, zeinaren helburua baita, besteak beste, zibersegurtasunaren inguruko euskal enpresa-sarea dinamizatzea ekintzailetza eta startup-en sorkuntza sustatuz, sortuta dauden enpresak bultzatuz eta garatuz, eta talentua eta inbertsioa erakarriz.
Zentroak jadanik partekatua du plana Euskadiko klusterrekin Cybasque-ren eskutik. Cybasque zibersegurtasunaren sektoreko euskal enpresen elkartea da, eta helburutzat du euskal ekosistema erreferentziazko hub (operazio zentro) bilakatzea nazioartean. Zibersegurtasuneko Euskal Zentroaren bultzadari esker sortu da Cybasque zibersegurtasunaren arloko ekosistema.
BCSCko zuzendari Javier Diéguezek duela gutxi aurkeztu zuen dokumentua jardunaldi telematiko batean eta esan zuen pandemiaren ondorioz egokitu egin behar izan zituztela 2020ko otsaila baino lehen ezarrita zeuden lehentasunak. Cybasque-ko zuzendari Xabier Mitxelenaren arabera, zibersegurtasunaren munduko merkatua 130 bilioi eurokoa izan liteke 2022an, urtean % 12 eta % 15 bitarteko hazkundeekin, eta sektoreko langabezia-tasa % 0koa izango da (% 36,5eko hazkundea espero da hemendik eta 2022ra). Horrek esan nahi du urte horretarako 3,5 milioi profesional baino gehiago arituko direla zibersegurtasun arloan.
Zibersegurtasun arloko plan estrategikoa 2019aren amaieran egin zen, Eusko Jaurlaritzak Zibersegurtasuneko Euskal Zentroari eskatu zionean bultzatu zezala bikaintasunezko hub teknologiko baten sorrera zibersegurtasun industrialaren arloan, Euskadi nazioarteko erreferentzia bilakatzeko. 4.0 Industriaren babeserako espezializazioa ezaugarri hauek dituen nitxo bezala identifikatu zen: hazkunde potentzial handia, heldutasun gutxiko balizko lehiakideak, eta tokiko merkatu trakziogile bat, zeinak hiru indar-gune funtsezko dituen hub-ak etorkizunean arrakasta izateko: digitalizazio handia, berrikuntzako bokazioa eta hedapen handia nazioartean.
Planak oinarritzat ditu lankidetza publiko-pribatua, lehendik existitzen diren ekimenak eta dagoeneko eraikita dagoen sarea, eta bidea ematen du ahaleginak eta gaitasunak integratuz zibersegurtasun industrialean espezializatutako gune espezializatu baten marka-irudi bat sortzeko. Horregatik, zibersegurtasunaren inguruko euskal enpresa-sarea dinamizatu beharko du, ekintzailetza eta startup-en sorrera sustatuz, sortuta dauden enpresak bultzatuz eta garatuz, eta talentua eta inbertsioa erakarriz.
Helburua da ekosistema egoki eta jasangarri bat eraikitzea talentua, ideiak eta (Estatuko zein nazioarteko) inbertsioa erakartzeko, eta, aldi berean, behar diren harremanak sustatzeko zibersegurtasun industrialaren arloan berrikuntza eta ekintzailetza abiarazi nahi dituzten osagaien artean. Bide horretatik, Euskadi zibersegurtasun industrialeko nazioarteko erreferentziazko marka gisa posizionatuko da garrantzi ekonomiko, aurrerapen teknologiko, herritarren eta enpresen segurtasun, kultura ekintzaile eta mundu akademikoko zein lan-arloko dinamizazioaren aldetik.
Lan-plana
Anbizio estrategikoa eta egungo enpresa-sarea abiapuntutzat harturik aztertu dira Europako Mediterraneo aldeko hamabi hub, nazioartean erreferentziazkoak direnak, sei hub eremu oso industrializatuetan kokatuak (Bretainia, Helsinki, Ipar Irlanda, Lonbardia, Toskana eta Gales) eta zibersegurtasunaren arlokoak, eta, azkenik, beste sei arrakasta izan dutenak ekintzailetzaren eta berrikuntza digitalaren sustapenean (Tel Aviv, Paris, Lisboa, Bartzelona, Valentzia eta Madril), eta batzarrak egin dira ekosistemako 85 eragilerekin (sare sozialak eta enpresa-sareak, unibertsitateak eta teknologi zentroak, klusterrak, enpresa trakziogile eta inbertitzaileak, Gobernua eta erakunde publikoak).
Ko-sorkuntza saio horiei esker definitu dira 4 ekintza-esparru (Ideiak, Talentua, Inbertsioa eta Harremanak), 30 ildo estrategiko eta 65 ekintza, zeintzuek beste jarduera ekonomiko batzuekin lerrokatuta ikusten duten zibersegurtasuna.
Oinarrizkoa da BCSCri paper garrantzitsua ematea ekosistemaren dinamizazioan, bera izan dadin harremanen motorra, hub-aren enbaxadorea mundu osoan, eta sektorearen nahiz industriaranzko transferentziaren bultzatzailea. Euskadiko administrazio publikoen artean, BCSC da FIRST homologazioa lortu duen CERT (ziberrerasoei erantzuna emateko ekipo) bakarra, eta horrek lankidetzarako espazio gehigarri bat zabaltzen du esperientziak eta informazioa trukatzeko.
2020an egindako ekintzen artean aipagarriak dira: Cybasque-n sorrera, startupentzako inbertsio errondak bilatzeko Venture Club-aren sorrera Bind 4.0 programaren barruan, edo Basque Research and Tecnollogy Alliance sarearekiko etengabeko lankidetza.
Azkenik, eta kontuan harturik pandemiak sortu duen eszenatokia, hauek dira epe laburrean lehenetsiko diren ekintzak: berrikuntzaren erosketa publikoa eta kultura ekintzailea indartzea hezkuntza arloan (Ideiak); reskilling eta upskilling ereduak aztertzea Euskal Enplegu Zerbitzuarekin batera (Talentua); enpresa industrialei laguntzea aitortutako zibersegurtasun araudiak edo estandarrak betetzen (Inbertsioa); krisien eta ziberrerasoen simulazio role-play eta Bootcamp-ak bultzatzea Basque Digital Innovation Hub zentroan (Harremanak).
Lotutako albisteak
Elvira, berrikuntza eta tradizioa osagai nagusi dituen istorio gastronomikoa
Harategi-urdaitegi txiki bat izatetik, gaur egun hamar establezimendu inguru ditu etxean egingo liratekeen moduan prestatutako produktuak saltzeko, online dendan ere saltzen direnak.
Egin ezazu prestakuntza-plana zure enpresan Gaitasun Digitalen programarekin
«Gaitasun Digital Profesionalak» programaren edizio berriak 2 milioi euroraino igo du bere aurrekontua, euskal enpresen lehiakortasuna sustatzen jarraitzeko helburuarekin, langileen prestakuntza indartuz.
Adimen artifiziala, blockchaina eta zibersegurtasuna izango dira Elkargiko 35. Enpresa Topaketaren erdigunean
Ekitaldia apirilaren 10ean izango da Donostiako Kursaal Jauregian
% 64 egin dute gora Eusko Jaurlaritzak SPRIren bitartez antolatutako IKT arloko prestakuntzara joandakoek
Enpresa Digitala ekimena 3 lurraldeetako bost gune fisikotan eskaintzen da eta ireki den azkena Ezkerraldekoa izan da, Abantoko campusean
Irudi B2B: 7 urte marketin digital industriala aztertzen bere blogaren bidez
Bere blogaren helburua: ezagutza erabilgarria partekatzea, industriak kanal digitalaren potentziala ahalik eta gehien aprobetxa dezan.
SOC-Ek bere kokapen zientifiko-teknologikoa sendotu nahi du esparru aeroespazialean
Bizkaiko konpainiak Etherneten oinarritutako komunikazio-soluzioak eskaintzen dizkie Airbus, Boeing, Lockheed Martin edo Blue Origin bezalako bezeroei, eta sektore horretara bideratutako Time-Sensitive Networking (TSN) komunikazio ziberseguruetarako I+G proiektu handi batean murgilduta dago.
Industria Digitaleko laguntzek zure negozioaren eraldaketa digitala lortzeko bidea irekiko dizute
Industria Digitala 2025 laguntza-programaren aurtengo edizioa martxoaren 18tik irekita, 7.5 milioi €-ko aurrekontuarekin. Euren negozioa digitalki eraldatu nahi duten enpresek urriaren 31era arte aurkez ditzakete euren eskaerak.
Cybertixek Zerolynx integratu du eta ETE-entzako zibersegurtasuneko hornitzaile erreferente gisa finkatu da
Operazio horrek zibersegurtasuneko portfolioa indartu du zerbitzu espezializatuetako bertikal berriekin, hala nola Offensive Security edo Forensicsekin
Zaher Taldeak bere eraginkortasun operatiboa hobetzea du helburu eraldaketa digital nabarmen baten bidez
Enpresa gipuzkoarra bere zuzendaritzaren errelebo betean murgilduta dago, galdaragintzan eta mekanizazioan aritzen da, eta nazioartekotzearen aldeko apustua ere egin du.
Einnek, bost urte etengabe eboluzionatzen sektore elektriko-elektronikoan
Pandemia betean jaio zen enpresak eraldaketa digitalaren aldeko apustua egin du hasieratik, sektorean bereizteko; bideojoko bat ere sortzen ari da, ingeniaritzako eta muntaiako barne-prestakuntza teknikoa iraultzeko.