3D teknologia 4.0 Industrian, neurrira eginiko inprimagailuetarantz

Tumaker euskal enpresak material berrietan eta makina konektatuetan lortu dituen aurrerapenak aurkeztu ditu

2013an, 3D inprimaketa teknologia berritzaile eta disruptiboa zen, komunikabideen arreta pizten zuena, eta Gartner aholkularitzaren Hype Cycle azterketaren gorengo puntuan zegoen. Bost urte geroago, makina horiek aski errotuta daude industria sektorean eta, teknologia berriak garatu eta material inprimagarriak ugaritu ahala, gero eta aukera gehiago eskaintzen dituzte.

Aitziber Eizaguirre, Tumaker enpresako merkataritza arduraduna Ideable Gosariak zikloan izan zen otsailaren 26an, non hizpide hartu baitzituen teknologia horren azkenaldiko joerak eta enpresa gipuzkoarraren aurrerapenak. “Lehen enpresa handiek eta teknologi zentroek bakarrik erosten zituzten 3D inprimagailuak; gaur egun, ordea, ETEek ere integratu dituzte horrelako makinak euren prozesuetan, ikusi dutelako aukera ugari eskaintzen dituztela nahiko prezio merkean” azaldu zuen diseinatzaile industrialak.

3D inprimagailuak fabrikatzen dituen enpresa hori gero eta sektore espezializatuagoetara bideratzen ari da, konpainia bakoitzaren premien arabera, neurrira eginiko makina espezifikoak eskainiz. “Ikusten ari gara azken joera direla nitxoko inprimagailuak, hots, izango duten aplikazioaren arabera eginiko makinak” azaldu du Eizaguirrek, “Tumaker enpresan ahalegin handia egiten dugu ikerketan eta neurrira eginiko makinak sortzen ditugu bezero bakoitzarentzat, enpresarekin berarekin lan eginez”.

Material inprimagarrien ugaritasunak ere aukera berriak ireki ditu sektore industrial askotan, orain posible baita, adibidez, zeramika, likidoak eta nano-partikulak inprimatzea. Zentzu horretan, konpainia gipuzkoarrak eta CIC Nanogune zentroak Novaspider inprimagailua sortu dute, nano-zuntzak eta mikro-zuntzak ekoizteko balio duen ekipamendu zientifikoa. Era berean, teknologia bat inplementatu dute, zeinarekin posible baita objektuak zuzenean inprimatzea pellet edo material puskak erabiliz, aldez aurretik filamentu bihurtu beharrik gabe.  Horri esker, edozein material erabil daiteke pieza konplexuak sortzeko.

Tumaker enpresentzako 3D inprimagailuen fabrikazioan espezializatuta dago eta proiektuak garatu ditu, besteak beste, CAF, Mercedes edo Mondragon Taldearekin. Bere BIGFoot produktua (50 cm³rainoko bolumenak inprimatu ditzakeena) Estatuan gehien saltzen den formatu handiko inprimagailua da. Oiartzungo enpresa honek badu presentzia Europa, Hego Amerika eta Asiako merkatuetan. IT3D Printers, 3D inprimaketako nazioarteko handizkaria, Tumaker-en bazkide da 2018tik.

2017an Tumaker-ek Voladd merkaturatu zuen, erabat lainoan funtzionatzen duen lehenengo 4.0 inprimagailua, zeina urrunetik kontrola baitaiteke edozein dispositibotatik. Modelo hori hezkuntza sektorera zuzenduta dago gehienbat, ez baita aurretiazko ezagutzarik behar erabili ahal izateko. Microsoft-ek arestian homologatu du Voladd, Microsoft EDULab esperientzia hezitzaileen laborategian inplementatzeko.

Lotutako albisteak

22 uztaila, 2024 Berrikuntza

Jabones El Abra: “Produktu litro bakoitzeko plastiko gutxiago erabiltzen duen ontzi ekologiko bat garatu dugu Hazinnovari esker”

Irakurri gehiago

18 uztaila, 2024 Berrikuntza

Mikel Jauregi industria klusterrekin elkartu da eta Euskadiren espiritu aitzindaria aldarrikatu du etorkizuneko erronkei eta aukerei aurre egiteko

Irakurri gehiago

12 uztaila, 2024 Berrikuntza

Biotz sendotu egin da Orklirekin aliantza estrategikoa itxi ondoren

Irakurri gehiago

9 uztaila, 2024 Berrikuntza

Erhardt Serikaten teknologia kuantikoak konponbide berritzaileak ematen dizkie logistikaren sektoreko arazoei

Irakurri gehiago

2 uztaila, 2024 Berrikuntza

‘Belk+’, mugikortasunerako laguntza pertsonaleko lehen exoeskeleto adimenduna

Irakurri gehiago

Joan blog-era