Abian da Social Innovation Tournament ekimenaren deialdi berria
European Investment Bank Institute erakundeak bultzatzen du ekimen hori
EIB Institute erakundeak abian jarri du berriro Social Innovation Tournament lehiaketa, zeinaren helburua baita berrikuntza eta ekintzailetza soziala sustatzea. Guztira, 140.000 euro banatuko dira lau saritan. Gainera, lehiaketak aukera ematen du laguntza eta prestakuntza jasotzeko eta inbertitzaileekiko hitzorduak lotzeko.
SIT lehiaketara mota guztietako proiektuak aurkeztu daitezke, betiere kolektibo kalteberen gizarteratzea eta aukera berdintasuna sustatzen badituzte. Baina, kategoria nagusiaz gain, badira sail bereziak ere, aurten garapen sostengarria eta ekonomia zirkularra sarituko dituztenak. Bietan emango dira lehenengo eta bigarren saria, 50.000 eta 20.000 eurokoak hurrenez hurren. Europar Batasun osoko proiektuak aurkeztu daitezke lehiaketara, eta parte har dezakete irabazi asmorik gabeko erakundeek, enpresek, erakunde publikoek, ekintzaile taldeek nahiz norbanakoek.
Hautagaitzak aurkezteko epea martxoaren 6an itxiko da. Hortik aurrera, EIB Institute erakundeko aditu talde batek aukeratuko ditu 15 finalistak. Finalistek aukera izango dute berrikuntza-kanpaldi batean parte hartzeko Portugal iparraldean dagoen IRIS zentroan (berrikuntza sozialeko proiektuen haztegia), eta SIT sareko kide bilakatuko dira. Azkenik, urriaren 23an Kopenhagen egingo den ekitaldi batean jakinaraziko dira lau txapeldunak.
Iaz Complex Disease Detector proiektu suediarra –bihotz-hodietako gaixotasunak detektatzeko teknologia merkea- eta ColorADD portugaldarra –ikusmen murriztua duten pertsonei koloreak identifikatzen laguntzeko hizkuntza- izan ziren kategoria nagusiko irabazleak. Sari berezia zahartze aktiboari eskaini zitzaion, eta FreeBird Club –pertsona nagusiek bidaiatzeko sare kolaboratiboa- eta Walk With Path –mugikortasun konponbideak- ekimenak izan ziren sarituak.
EIB Institute Europako Inbertsio Bankuak sortutako organismo bat da, eta helburutzat du onura publikoa sortzen duten ekimen sozial eta kulturalak babestea. Iazko apirilean EIB Institute erakundeak IRIS –Regional Social Innovation Incubator- haztegia jarri zuen martxan PortusPark sarearen laguntzaz, lurralde mailako garapena bultzatzeko berrikuntza sozialeko ekimenen bitartez.
Lotutako albisteak
Elvira, berrikuntza eta tradizioa osagai nagusi dituen istorio gastronomikoa
Harategi-urdaitegi txiki bat izatetik, gaur egun hamar establezimendu inguru ditu etxean egingo liratekeen moduan prestatutako produktuak saltzeko, online dendan ere saltzen direnak.
Lorra, lau hamarkada inguru Bizkaiko nekazaritzako elikagaien kooperatibismoaren funtsezko zutabe gisa
Gaur egun, erakundearen lehentasuna zahartutako sektore honetako erretiroak ordezkatzea da, belaunaldi-erreleboaren bidez.
Egin ezazu prestakuntza-plana zure enpresan Gaitasun Digitalen programarekin
«Gaitasun Digital Profesionalak» programaren edizio berriak 2 milioi euroraino igo du bere aurrekontua, euskal enpresen lehiakortasuna sustatzen jarraitzeko helburuarekin, langileen prestakuntza indartuz.
NudgeXperience Bilbon: CX eta Portaera Zientzien ekitaldia
Zuzendariei eta gerenteei, Cx-eko arduradunei eta berrikuntza eta marketineko profesionalei zuzendua
Innobideak Prestakuntza prestatu zure lantaldea balioan lehiatzeko eta ez prezioan
Euskadiko ETEen % 60k berrikuntzaren alde egiten du, baina gehienek kostua murrizteko edo kalitatea hobetzeko egiten dute eta ez dute benetako abantaila lehiakorra sortzen merkatuan. Alabaina, berrikuntza ez da etorkizunean mantentzeko tresna soila, etorkizunean liderra izateko estrategia baizik. Horretarako, gakoa teknologia ez ezik, pertsonak, estrategia eta egokitzeko gaitasuna ere badira.