Albisteak 18 Azaroa, 2019

Asimob, errepide adimendu baterako sistemak

Start-up honek gauzen Interneten eta adimen artifizialean oinarritutako monitorizazio-irtenbideak eskaintzen ditu

«Gaur egun, ibilgailu autonomorako garapen teknologiko asko dago; alabaina, ibilgailu horiek zirkulatu ahal izateko, garraio-azpiegiturak hobetzeko sistemak behar dira», azaldu du Ibon Aretxalde Asimob enpresako ko-sortzaile eta presidenteak. Hain zuzen ere, horixe izan zen Bizkaiko start-up hau sortzeko lehen ideia. Enpresa espezializatuta dago errepide adimendunerantz aurrera egiteko azpiegituren monitorizazio-zerbitzuen garapenean.

Enpresak gauzen Interneten eta adimen artifizialean oinarritutako irtenbideak erabiltzen ditu zoladuran irregulartasunak hautemateko, obra-eremua ikuskatzeko eta seinaleen egoeraren mapa modu automatizatuan ezartzeko. Sistema horien xedea da errepidearen segurtasuna hobetzea eta mugikortasun-azpiegituren digitalizazioan aurrera egitea.

Start-upak honako zerbitzu hauek garatzen ditu: zuloen, ura pilatzearen edo errepidean arriskutsuak izan daitezkeen beste akats batzuen ondorioz bide-sarean sortzen diren aldaketak edo irregulartasunak hautemateko gai diren ibilgailuetan sentsoreak eta kamerak instalatzea. Horrez gain, bide-seinale bertikalen egoera monitorizatzeko sistema bat eskaintzen dute, seinale iraunkorrak zein obra-eremuetan instalatzen direnak aztertzeko. «Seinale finkoetan akatsak gerta daitezke, hautsi egiten direlako, margotzen dituztelako edo zuhaitzek estaltzen dituztelako, besteak beste. Eta obra-eremuetan, lekuz aldatzen doazen aldi baterako seinaleak daude», adierazi du Ibon Aretxaldek. «Orain arte, eskuz ikuskatu da dena, eta dena ondo dagoela aztertzeko pertsonak kontratatzen ziren, baina giza begia mugatua da».

Asimob enpresak ibilgailuetan instalatzen den sistema bat sortu du, bai eta datuak aztertzen dituen eta errepideen egoerari buruzko informazio eguneratua eskaintzen duen plataforma bat ere. Zerbitzua administrazio publikoentzat eta mantentze-lanez arduratzen diren enpresentzat pentsatu da, baina ez da beharrezkoa lan hori egingo duten ibilgailu berriak zirkulazioan jartzea, dagoeneko zaindu behar diren eremuetatik ibiltzen diren ibilgailuetara egokitzen baita teknologia. «Giza begiaren ordez, dena ondo dagoela zain dezaketen sistemak jarriko ditugu; horrela, azpiegiturek autodiagnostikoa egiten dute etengabe», azaldu du enpresako presidenteak.

Start-upa 2016. urtean sortu zen, eta, garapen teknologikorako fasearen ostean, lanean hasi dira udalekin, aldundiekin eta errepideetako mantentze-konpainiekin. Sortzeko, Beazen eta Eusko Jaurlaritzaren Hazitek programaren babesa izan zuen. Orain, 2019. urtean, Bilbao Best Startup Award saria jaso du, MIT Enterprise Forum Spain entitateak emana.