Digitalizazioari esker krisiari ongien aurre egin dioten enpresen ikaskuntzak

Ezin da ukatu digitalizazioa oinarrizkoa izan dela osasun larrialdian zehar. Teknologiari esker posible izan da jarduera ekonomikoari eta elkarreragin sozialei eustea, eta gainera, negozioak egiteko bide berriak ireki dira egoera ziurgabe baten erdian. Bizi izandako egoera horretatik ikaskuntza baliagarriak atera nahian, Orkestra-Lehiakortasunaren Euskal Institutuak  Digitalizazioa, Covid-19ari erantzuteko txostena argitaratu du. SPRI Taldeak finantzatutako ikerlan horretan 16 kasu aztertu dira, denak ere eraldaketa digitalaren aukerak aprobetxatzen jakin duten euskal enpresenak.

Txostenaren lehen ondorioa da enpresa askorentzat teknologia digitalak ez direla izan bakarrik salbuespen-egoera bati aurre egiteko aldi baterako erantzuna, baizik eta epe luzerako ikuspegi estrategiko bat.  Krisiak “eraldaketa espres” bat eragin du konpainia askotan, baina azterlanak nabarmendu duen bezala, egoera berrira ongien egokitu direnek badituzte hainbat ezaugarri komun.

Pandemiaren lehen fasean euren jarduera handitzea lortu duten enpresek bazuten lehendik ere eredu digital bat, eta teknologiak baliatzen zituzten negozio aukera berriak sortzeko. Azken finean, eraldaketa digitala enpresa horien estrategiaren zati bat da, ez soilik tresna berriak erabiltzen hasteko bide bat. Azterlanak ezaugarri komun gehiago identifikatu ditu, besteak beste, aldaketetara egokitzeko azkartasuna, ikuspegi berritzailea eta esperimentaziorako espazioak.

Esaterako, txostenean agertzen da Comet enpresa donostiarra, bizikletentzako ordezko pieza eta osagarrien banaketan espezializatua. Gaur egungo egoeran hazi egin da horrelako produktuen eskaera, eta konpainia gai izan da eskaera horri berehala aurre egiteko, lehenagotik ere ezarrita zeukan kultura digitalari esker. Halaber, hor dago Dastatzen okela-enpresaren kasua, zeinak irtenbide berriak aurkitu baititu bere produktuentzat, B2B eredutik B2C eredura pasaz eta indar handiko zabalkunde kanpainak eginaz kanal digitaletan.

Lankidetza publiko-pribatuko eta hiritarren arteko lankidetzako kasuak ere aipatzen dira argitalpenean, esaterako, BBK Fundazioaren #KreoEnTi Azoka Digital web plataforma solidarioa, txikizkako saltokiei babesa emateko sortua; edo Euskadiko Maker Komunitatea, zeinak norbere babeserako elementuak fabrikatzeko sare horizontal bat bultzatu baitzuen. Proiektu horiek erakunde-kulturaren aldaketarekin lotutako aukera berriak islatzen dituzte, teknologietatik harago.

Azterlanak azpimarratzen du antolakundeek krisiaren lehen fasean abiarazi dituzten erantzunak  produktu-mailakoak izan direla (eskaintza zabaltzea) eta baita ere prozesu-mailakoak (jarduerarekin jarraitzeko konponbide berriak).  Halaber, bezeroekin harremanetan jartzeko kanal berriak ireki dira. Kanal horiek krisialdian sortu badira ere, enpresa askorentzat aukera aproposa dira epe ertain eta luzean hazteko.

Azkenik, Orkestraren txostenak hainbat proposatzen dakartza eraldaketa-prozesuak orientatzeko. Lehenik eta behin, garrantzitsua da erronka digitala lehenestea agenda politikoan, eta ETEentzako laguntzak bideratzea, digitalizazioa ez dadin izan asimetrikoa. Horrez gain, lankidetza publiko-pribaturako tresna berritzaileak eraiki behar dira, ziurgabetasun-une honen erdian lurraldearen lehiakortasuna hobetzeko.