Errealitate birtuala eta errealitate areagotua prestakuntzara eta informaziora bideratuak, Solid Virtual enpresaren eskutik
Euskal konpainia honek uste du teknologia horiek funtsezkoak izango direla etorkizunean gizaki-makina arteko komunikazioetan
Solid Virtual euskal startup-ak errealitate birtualarekin eta errealitate areagotuarekin lotutako zerbitzuak eskaintzen ditu 2016tik. Nahiz eta hasieran higiezinen sektorera bideratuta zegoen, orain dela bi urte 4.0 Industriara begira jarri zen, BIND 4.0 programan parte hartu ondoren. Enpresako Negozio Garapen saileko arduradun Sergio Ponzek dioenez, Solid Virtual-eko plantillan dauden hamalau langileen ametsa da euren proiektu eta garapenak Santurtzitik mundura zabaltzea.
Nola sortu zen Solid Virtual?
Solid Virtual Garayar taldearen barruan sortu zen. Talde horrek aktibo turistikoen sektoreko zerbitzu profesionalak eta inbertsio eta kudeaketa zerbitzuak eskaintzen ditu. Ohartu ziren higiezinen mundua zaharkituta zegoela etxebizitza berriak plano gainean saltzeko erabiltzen ziren formulekin, eta erabaki zuten tresna berri bat sortzea 3Dko irudi bidez erakusteko nolakoa izango den etxe bat eraiki ondoren eta errazagoa egiteko horrela bezeroei erosketa prozesua. Gizakia ohituta dago hiru dimentsiotan lan egiten. Baina planoak bi dimentsiotakoak dira eta horrek zalantzak sortzen dizkigu etxebizitza bat erostean, alegia, gure bizitzako erosketa handiena egitean. Fede handia behar da inbertsio bat egiteko jakinik urtebete edo bi urte beharko ditugula inbertsio horren emaitza ikusteko; horregatik, 3D tresnak oso baliagarriak dira etxebizitza nolakoa izango den irudikatzeko. Horrela sortu zen 2016an Solid Virtual abiarazteko eta errealitate birtuala eta errealitate areagotua erabiltzen hasteko ideia.
Zergatik erabaki zenuten zuen zerbitzuak industria mundura zabaltzea?
Bagenekien gure negozio-eremuak dibertsifikatu behar genituela eta horregatik hasi ginen beste sektore batzuk aztertzen. Ikusi genuen 4.0 Industriaren arloan gauza asko egin daitezkeela informazioa bistaratzeko edo langileei prestakuntza emateko, eta industriara jauzi egitea erabaki genuen.
4.0 industriaren arloko zein proiektu garatu duzue?
Zorionez, duela bi urte BIND 4.0 programan parte hartzeko hautatuak izan ginen. BIND 4.0 industria sektoreko startup-ak azeleratzen dituen programa publiko-pribatu bat da, Eusko Jaurlaritzak kudeatzen duena, non startup-ok proiektuak garatzen baititugu euskal enpresa trakziogileentzat. Bi kontratu sinatu genituen, bata errealitate areagotuaren arlokoa eta bestea, errealitate birtualekoa.
Errealitate areagotuaren arloko kontratuaren helburua zen Apple-ren iOS sistema eragilerako aplikazio bat, beraizik pentsatua zegoena Mercedes-Benz enpresako hornitzaileen piezen kalitatea baliozkotzen duten langileei laguntzeko. Proiektu horretan bi teknologia konbinatu genituen, batetik, ikusmen artifiziala pieza errekonozitzeko eta, bestetik, errealitate areagotua, piezari geruza bat gainjartzeko bere informazio errealarekin, eta horrela egiaztatzeko behar bezala fabrikatu dela. Aplikazio horri esker, erabiltzaileak ez du pieza zehatz baten neurriak bilatzen ibili beharrik; gailu mugikorraren kamera piezarantz zuzentzean, aplikazioak pieza errekonozituko du ikusmen artifizialari esker, eta langileari esango dio zein neurri izan behar dituen, denbora aurrezten duelarik.
Bigarren proiektua Fagor enpresarentzat izan zen. Langileen prestakuntzara bideratutako simulazio bat egin genuen injekzio-molde batzuk nola iraultzen ziren irudikatzeko. Errealitate birtualak abantaila asko dauzka prestakuntzarako beste tresna batzuekin alderatuta, eta oso eraginkorra da informazioa atxikitzeko eta ezagutzak transmititzeko. Gainera, prestakuntza hori ingurune kontrolatu batean egin daiteke, arriskurik gabe eta makina errealak erabili gabe edo produkzioa gelditu beharrik gabe.
Enpresei interesatzen al zaizkie errealitate birtualaren eta errealitate areagotuaren arloko konponbideak?
Azken urteotan ikusi dut gauzak hoberantz aldatu direla, enpresak hasi direlako jabetzen horrelako teknologiek izan ditzaketen abantailez. Gure bezeroek badakite teknologia horiek baliagarriak direla eta konpainia asko dagoeneko hasi dira halakoak aplikatzen. Euskal enpresa handi gehienak aztertzen ari dira zer egin dezaketen horrelako teknologiekin, edo dagoeneko egin dute zerbait.
Zeintzuk dira errealitate birtualaren eta errealitate areagotuaren erronka teknologikoak?
Gaur egun, errealitate birtuala ikusmenera eta entzumenera bideratua dago. Orain gainerako zentzumenak landu behar ditu, eta, egia esan, dagoeneko lantzen hasita dago: ukimena, dastamena eta usaimena. Teknologia horien aparraldia etorriko da kontsumitzailearengana iristen direnean, eta une hori gero eta hurbilago dago, zeren jadanik merkatuan baitaude Oculus Go eta Oculus Quest bezalako bisoreak, prezio eta prestazio onekoak, erabilerrazagoak, arinagoak eta harigabeak. Errealitate birtuala pixkanaka ari da eboluzionatzen, baina badoa aurrera. Errealitate areagotuak ere arazo berberak ditu, baina lau aldiz handiagoak. Gaur egun existitzen diren bisoreak oso handiak dira eta irudiaren kalitatea ez da ona. HoloLens 2 eta Magic Leap gailuen merkaturatzeak jauzi handi bat suposatu lezake, baina oraindik bide luzea dago egiteko. Hala ere, gauza asko egin daitezke eskura dugun hardwarearekin.
Etorkizunean norantz bideratu daitezke teknologia horiek enpresa munduan?
Uste dut errealitate areagotua erabiliko dugula makinekin elkarreragiteko eta informazioa eskuratzeko. 1.0 Weba estatikoa zen eta 2.0k aukera eman zigun webarekin elkarreragiteko. 3.0 Webean informazioa espazialki kokatuta egongo da eta gailu konektatuekin eskuratu ahal izango da, adibidez, errealitate areagotuko eta errealitate birtualeko bisoreekin. Makinekin elkarreragiteko modua guztiz aldatuko da. Etorkizunean ez ditugu erabiliko saguak edo ukimenezko pantailak. Ahotsezko aginduekin komunikatuko gara, Siri, Alexa, Cortana edo Google Assistant bezalako laguntzaileekin. Teknologia horiei esker makinekiko elkarreragina naturalagoa izango da, eta informaziora sartzeko “input” gisa erabiliko ditugu errealitate birtuala (beste mundu batera joan nahi badugu) eta errealitate areagotua (mundu honetan gelditu nahi badugu).
Lotutako albisteak
Biotz: “Roca Salvatellarekin egindako akordioak berrikuntza teknologikoaren balio-kate osoa batzen du”
Gipuzkoako enpresak Kataluniakoarekin aliantza bat itxi du bere talentu digitala indartzeko eta nazioarteko merkatu berrietan bere presentzia zabaltzeko.
Surphasek merkatuan parekorik ez duen teknologia garatzen du eta gatzgabetzeko planten eraginkortasuna handitzea lortzen du
Donostiako ETEak, Europako Batzordearen 2,5 milioiko dirulaguntza lortuta, iragazkien egoera aurreikusten du denbora errealean; hala, geldialdi teknikoen % 60 murrizten du
Kimaiwi: “Gure proposamen teknologikoa balioztatzean eta nazioarteko turismo-industriaren aurrean proiektatzean zentratu gara”
Startup arabarrak online irtenbideak garatzen ditu turismo-sektorearentzat, eta hazkunde eta babes handia izan du bere bederatzi hilabeteko bizitzan.
NAW: “Gure abantaila lehiakorra 10 urte bitarteko kirol-oinetako minimalista eskaintzea da”
Silvia Echeverríak, NAWren sortzaileak, oinetako minimalistak postura-osasunean eta garapen biomekanikoan haurtzarotik helduarora arte nola eragin dezakeen azaltzen du.
Isabel Urbano: “Novia Salcedo Fundazioarekin praktiketan dauden gazteen %60k kontratu bat lortzen dute”
Novia Salcedo Fundazioak 45 urte inguru eman ditu ikasketa-ingurunetik lan-mundurako trantsizioa errazten, prestakuntza praktiko ez-laboraleko programen bidez.
AIDTEC Solutions :“Ekintzaileak zaindu egin behar ditugu”
Nekazaritza jasangarriagoa lortzeko soluzioetan espezializatutako startuparen sortzaileetako bat da Izaskun Oribe
Marijo Pagalday (Mondragon Korporazioa): “Gure helburua balio kate osoa hartzen duen 360º digitalizazioa eskaintzea da”
Mondragon Korporazioko Ingeniaritza eta Zerbitzuen saila 9 kooperatiba autonomok osatzen dute, eta elkarrekin koordinatuta daude. Kooperatiba horiek 3.000 lanpostu inguru sortzen dituzte zuzenean, eta 300 milioi euroko fakturazioa dute.
Alex Rayón (Brain & Code): “Teknologia mugikorrekiko eta Adimen Artifizialarekiko elkarbizitza naturalizatu behar dugu”
Hezkuntza teknologiko irisgarria bultzatzen duen enpresako CEOak Digital Open Knowledge DOK jardunaldian parte hartu du. Bertan, eraldaketa digitala eta adimen artifiziala aldaketa-azeleragailu gisari buruz hitz egin du.
Elkarrizketa ‘glo910’-eko Ixone Elosegui eta Miren García-Chazarrari
"glo, logoan ikusten den bezala, 910 bezala ere irakur daiteke, 10 emakumetik 9k zelulitisa duelako, eta hortik dator markaren izena eta gure lehen gailua, glo910"
Zure negozioaren webguneak Interneten arrakasta izateko behar duen guztia eskaintzen dizu UrBerrik
Enpresa gazteiztarrak web diseinua, konponketa, mantentze zerbitzuak eta SEO posizionamendua eskaintzen ditu