“Etorkizuneko erronkek mugiarazten gaituzte, eta horregatik egiten ditugu inork egiten ez dituen produktuak”
Alicia Gómezek zuzentzen du DMP, berrikuntzaren eta zehaztasun handiko mekanikaren eredu paregabea Euskadin
Alicia Gómez exekutiboak Urteko Zuzendaritza-karguaren saria jaso du berriki Gipuzkoako Emakume Profesional eta Enpresarien Elkartearen eskutik, DMP (Desarrollos Mecánicos de Precisión) enpresaren zuzendaritzan egin duen lanaren aitorpen gisa. DMP EGILE Taldearen barruko “harribitxietako” bat da, eta Zehaztasun Handiko Mekanikako lanak egiten ditu eduki teknologiko handiko sektoreentzat, nola baitira aeronautika, osasuna eta elikadura. Aliciak Ingeniaritza Tekniko Industrialeko ikasketak egin zituen Mondragon Unibertsitatean eta Goi-mailako Ingeniaritza Informatikoa Toulousse hiriko Paul Sebattier zentroan. Ikasketak amaitu ondoren hainbat konpainiatan aritu da, besteak beste Lantek, Predicast Bibao eta ITPn, beti lehenetsi dituelarik baloreetan oinarritutako kudeaketa eta lidergoa. Gaur egun, 200 lagun inguruko lantaldea zuzentzen du.
Zaila izan da honaino iristea?
Ahalegina egin behar da, hori horrela da. Baina ahaleginarekin batera, esan behar da gustuko dudala egiten dudana, eta gustuko duzun zerbait egiten duzunean askoz errazagoa dela ahalegina egitea. Euskadin bizi garenok oso barneratuta daukagu hori. Txikitatik oso errotuta daukagu ahaleginaren kultura, gure familiek horixe erakutsi digutelako beti. Beraz ahalegina hor dago, baina jasangarria da.
Zure ibilbide profesionalean zehar, inoiz sentitu duzu zerbait gehiago eman behar zenuela emakume izateagatik?
Ez. Egia da zenbait unetan eta zenbait enpresatan, batez ere Euskaditik kanpo, batzuetan ohartzen zara desberdin begiratzen zaituztela, baina Euskadin ez zait halakorik gertatu, inoiz ez dut lan gehiago egin behar izan emakume izateagatik. Konfiantza baduzu zure lanean eta zeure buruarengan, aurrera egingo duzu eta pixkanaka emaitzak iritsiko dira, emakume nahiz gizona izan. Garrantzitsuena da norberarengan sinestea eta aurrera egitea.
Garatu dituzun proiektu guztietan beti oinarritzat hartu dituzu baloreetan oinarritutako lidergoa eta kudeaketa. Zeintzuk dira balore horiek?
Ahalegina edo errespetua, adibidez. Ingeniariok badugu joera proiektuak lantzeko askoz ikuspuntu tekniko eta arrazionalistago batetik. Baina egun daukadan kargu honetan gehiago jorratzen ditut gai humanistikoak ingeniaritzako kontuak baino, pertsonekin lan egiten dugulako, eta baloreekin lotutako alderdi guztiak dira garrantzitsuak. Funtsean, ingeniariak izaki arrazionalak gara, baina emozionalak ere bai, eta badira balore batzuk, batzuetan lortzeko zailak direnak -nola baitira norbere burua gainditzeko gogoa, motibazioa, errespetua eta konfiantza- eta oso garrantzitsuak direnak, eta nire zereginetako bat da horiek lantzea.
Zer da zailagoa, hamar laguneko talde bat gidatzea eta motibatzea ala, orain egiten duzun bezala, gauza bera egitea berrehun laguneko talde batean?
Esango nuke enpresa zenbat eta handiagoa izan, orduan eta zailagoa dela. Horregatik, gauzak ondo ateratzeko oso garrantzitsua da zeure balore eta printzipio berberak dituzten pertsonez inguratzea, hau da, balore horiek guztiak zabalduko dituzten pertsonak izatea inguruan. Baliteke pertsona bakar bat gai izatea hamar langileko talde bat gidatzeko eta motibatzeko, baina ezinezkoa da gauza bera egitea 200 laguneko talde batean. Inguruan behar dituzu zeure balore berberak dituzten pertsonak.
Zer egiten du DMP enpresak?
Egile Taldeko konpainia bat da, zehaztasunezko mekanikan zentratuta dagoena, eta batik bat balio erantsi handiko produktuak -produktu nahiko teknologikoak- garatzen dituena. Horregatik, beti ahalegintzen gara olatuaren gain-gainean egoten, gauzak egiteko modu tradizionalak hausten. DMP aeronautika sektorera zuzenduta dago batez ere, adibidez, Airbus eta Boeing konpainien lurreratze-trenak egiten ditugu. Orobat egiten ditugu helikopteroen sektorerako produktuak, esaterako kaxa erreduzitzaileak; eduki teknologiko handiko produktu oso konplexuak dira, ia inork egin ezin dituenak.
DMP enpresaz gain, talde bereko Zehatz enpresa ere zuzentzen duzu, zeinak konponbideak eta produktuak garatzen eta fabrikatzen baititu metalezko ontzi eta trokelgintza sektoreetarako. Zehaztasun handiaren munduan hori ere…
Bai, zehaztasun handiaren mundua funtsezkoa da gure negozio-ereduan. Zehaztasunari buruz ikaragarri ikasi dugu sektore horretan, tolerantzia oso fin eta estuekin lan egiten dugulako, mikrak eta mikra-hamarrenak neurtuz… Balio handiko konponbideak eskaintzen dizkiegu bezeroei, adibidez, supermerkatuetako atun latetan dauden piezak (tapak, poteak) egiteko.
Egile taldearen portfolioa harago ere badoa, ezta?
Asko gustatzen zaigu berritzea eta zehaztasun handiko mekanikaren merkatu hori beste sektore batzuetara eramatea, hala nola osasunera, zientziara edo garapen zientifikora. Gure enpresaren jabeak oso berritzaileak dira, ongi kudeatzen dituzte aukerak, eta badakite etorkizuneko erronka handiak identifikatzen. Hala, buru-belarri murgiltzen gara bide berri horietan, inork egiten ez dituen produktuak egiteko. Adibidez, Genevako CERN partikula azeleragailuaren prototipoa, non materiaren jatorria bilatzen baita… Ahalegintzen gara beti olatuaren gain-gainean egoten, eta ahal bada, egunetik egunera gauza are zailagoak egiten.
Lotutako albisteak
Biotz: “Roca Salvatellarekin egindako akordioak berrikuntza teknologikoaren balio-kate osoa batzen du”
Gipuzkoako enpresak Kataluniakoarekin aliantza bat itxi du bere talentu digitala indartzeko eta nazioarteko merkatu berrietan bere presentzia zabaltzeko.
Marijo Pagalday (Mondragon Korporazioa): “Gure helburua balio kate osoa hartzen duen 360º digitalizazioa eskaintzea da”
Mondragon Korporazioko Ingeniaritza eta Zerbitzuen saila 9 kooperatiba autonomok osatzen dute, eta elkarrekin koordinatuta daude. Kooperatiba horiek 3.000 lanpostu inguru sortzen dituzte zuzenean, eta 300 milioi euroko fakturazioa dute.
Alex Rayón (Brain & Code): “Teknologia mugikorrekiko eta Adimen Artifizialarekiko elkarbizitza naturalizatu behar dugu”
Hezkuntza teknologiko irisgarria bultzatzen duen enpresako CEOak Digital Open Knowledge DOK jardunaldian parte hartu du. Bertan, eraldaketa digitala eta adimen artifiziala aldaketa-azeleragailu gisari buruz hitz egin du.
Ibarmia: “Abangoardian egoteko eta prestazio handiko makinen fabrikazioan erreferente izateko lan egiten dugu”
Enpresa gipuzkoarrak berrikuntza teknologikoaren aldeko apustua egin du, ekoizpena optimizatzeko eta lehiakortasuna hobetzeko.
Intralogistik: “Industria-sektoreko enpresei laguntzen diegu haien kudeaketa logistikoa eraginkorragoa eta merkeagoa izan dadin”
Bizkaiko aholkularitza-enpresa barne-logistikaren arloko diagnostiko-zerbitzuetan, soluzio diseinuan, simulazioan eta ezarpenean espezializatuta dago.
Orai: “Adimen artifizialerako gure neurona-eredua euskarazko aurreratuena da ingurune eskalagarrietarako”
Elhuyarreko adimen artifizialeko zentroak Llama-eus-8B garatu du, eredu fundazionala (adimen artifizial sortzailearen oinarri gisa erabiltzen den eredu-mota), euskara idatzia ulertzea eta sortzea eskatzen duten sistemak garatzeko.
Runneak bere 10. urteurrena ospatuko du eta Awin Power 100ean aitortua izan da
Elkarrizketa honetan, Jorgek enpresaren mugarririk garrantzitsuenez, aurrez aurre dauden erronkez eta bere hedapena gidatu duten estrategiez hitz egin digu.
NORAi: “Business Intelligence teknologia abantaila lehiakorra da enpresentzat”
Fideslan aholkularitzaren barruan sortutako enpresa donostiarrak datuak aztertzen ditu BI tresnen bidez, erabakiak berehala eta kontrastatuta hartzeko.
Manex 4.0-HRE Automationek “Espezializazio estrategikoa” saria jaso du 2024 Toribio Echevarria sarietan
Enpresak 40 urte baino gehiago daramatza Elgoibarko Ibaitarte industrialdean, Deba Bailarako Industrialdea, S.A.k kudeatuta.…
HINEk 50. urteurrena ospatuko du sistema hidraulikoetako munduko lider gisa
Olaberriko enpresak 700 langile ditu eta 200 milioiko fakturazioa, eta industrian eta energia berriztagarrietan espezializatuta dago