Euskadik prestakuntzaren aldeko apustua beharko du AAren erronkei erantzuteko

Adimen Artifizialak interes handia pizten du euskal enpresa-ekosisteman. Argi geratu da Basque Open Industry-ren bigarren jardunaldian. Bertan Basque Artificial Intelligence Centerrek (BAIC) saio berezi bat antolatu du. Teknologia horren etorkizunari buruzko hainbat hitzaldiren bidez, Euskadiko eta nazioarteko adituek AAren erronkak eta euskal enpresa-sarean garatu ahal izateko beharrezko ekintzak identifikatu dituzte. Eta ondorioen artean, dauden erronkei erantzuteko prestakuntzaren beharra azpimarratu da, baita enpresen arteko lankidetzaren garrantzia ere.

Baden-Wurtemberg eskualdeko (Alemania) Ekonomia, Lan eta Turismo arduraduna den Sebastian Große Puppendahl protagonista izan duen lehen hitzaldian, egungo testuingurua eta EBk adimen artifizialarekiko dituen beharrak eta erronkak aurkeztu dira. Nabarmendu duenez, “herrialdeen arteko lankidetza funtsezkoa da lankidetza-sare bat sortzeko eta teknologiak trukatzeko, azpiegiturak sortzeaz gain”. Europako merkatu bakarra abantaila handia da zentzu horretan. Gainera, “EBko hainbat gobernuk teknologia horren garapenean oinarritutako politikak” eta horien ondoriozko sinergiak nabarmendu ditu.

BAICen gida

Jarraian, Iñaki Suarez Basque Artificial Intelligence Centeren Teknologia arduradunak hartu du hitza. Hitzaldian AAren izaera azaldu nahi izan du, bere algoritmoek nola funtzionatzen duten eta euskal enpresen eraginkortasuna areagotzeko nola erabil daitekeen azalduz. Suarezek BAICek garatu duen gida aurkeztu du. Bertan industrian AA aplikatzeko jarraibideak biltzen dira, konpainiei baliagarria izan daitekeen prozesuak identifikatzen laguntzeko. BAICeko ordezkariak, halaber, zentroarekin AA garatzen laguntzen duten bazkideen ekarpena baloratu du. Horien artean daude zentro teknologikoak eta unibertsitateak, bai eta enpresak eta erakunde publikoak ere.

Saioa amaitzeko, mahai-inguru bat egin da, lau hizlarirekin: Nerea Aranguren, Danobat Groupeko Innovation Manager eta Ideko enpresako zuzendaria; Eunate Ramírez De Miguel, Versiako presidente exekutiboaren laguntzailea; Pedro Estévez, CAFeko I+G Proiektuen Kudeaketa arloko arduraduna; eta Agustín Zubillaga Rego, Vicomtech Bilbaoko zuzendaria. Hitzaldi honetan, arlo horietan prestakuntzaren aldeko apustuak duen garrantzia azpimarratu da. Izan ere, gaur egun Euskadin EAEn bakarrik behar diren profilen erdiak sortzen ari dira. Beste enpresa-ekosistema batzuekiko lankidetza ere nabarmendu da, industrian AA garatzeko funtsezko elementu gisa. Ondorio gisa, hizlariek gogoeta egin dute etikari eta erregulazioari buruz, zeinak AAren garapenaren arabera egin behar baitu aurrera, nazioartean lehiakorrak izan ahal izateko.