Fabia Silva, Dronak enpresako zuzendari nagusia: “Logistika da dronen etorkizuna”
Bilboko konpainiak garatutako dronak 40 kiloko karga garraiatu dezake
Egoitza Parisen duen UVS International elkartean era desberdinetako aparatuen urruneko gidaritzarekin lotutako enpresak biltzen dira. Elkarte horrek dagoeneko detektatu ditu dronekin garatu daitezkeen 430 erabilpen desberdin: bideo grabaketak, zehaztasuneko nekazaritza, ingurumenaren babesa, segurtasuna, azpiegituren ikuskapena edo logistikako lanak. Azken hiru horiek (segurtasuna, eraikinen ikuskapena eta logistika) hertsiki lotuta daude 4.0 Industria kontzeptuarekin.
Dronen sektoreak badu gainditu gabeko ikasgai bat: araudia. 2017ko abenduaren 30ean dronen erabilpenari buruzko Errege Dekretu berri bat onartu zen, zeinak baimena ematen baitzuen horrelako aparatuak hegaldatzeko ordura arte debekatuta zeuden hainbat gunetan, baina, halere, hegaldi eskaerak tramitatzeko eta onartzeko prozesuak motelegiak dira oraindik, eta hori eragozpen bat da enpresa espezializatuentzat zerbitzuak emateko orduan. Dronak enpresa da muga legal horien ondorioak jasan dituen konpainietako bat. Duela 3 urte sortu zen Bilbon, eta apustu irmoa egin du dronak teknologia bideratzaile gisa erabiltzeko industrian eta energian. Enpresako zuzendari nagusi Fabia Silvarekin hitz egin dugu.
Nolako aplikazioak izan ditzakete dronek industrian?
Industriako gauza asko ordezkatu daitezke dronekin. Adibidez, posible da arriskua desagerraraztea makina astunekin egiten diren zeregin askotan edo gizakiek egiten dituzten eta osasunarentzat arriskutsu izan daitezkeen jardunetan, esaterako, eraikinak ikuskatzeko azpiegituretara igotzea eskatzen duten lanetan. Ikuskapen horiek azkarrago egiten dira dronekin, eta gainera posible dugu ikustea zer gertatzen den iristeko zailak diren espazioetan. Bestalde, ingurune industrialetan posible da lehen ahalegin handiz egiten ziren hainbat zeregin automatizatzea eta horrela produkzio katearen emaitza hobetzea. Adibidez, objektuak edo piezak tokiz aldatzeko edo lokalizatzeko erabil daitezke. Gure kasuan, Brasilen badugu logistikarekin lotutako proiektu bat. Karga-portu batean oso biltegi-espazio txikia zuten zamalanetarako eta ezin zituzten garabiak erabili irisgarritasun arazoengatik. Aztertzen ari gara zeregin horiek dronekin egin ote daitezkeen. Gure ustez logistikan dago sektorearen etorkizuna.
Badirudi logistika dronentzako negozio-nitxo bihurtu dela. Zer iruditzen zaizkizu Amazon bezalako enpresen proposamenak?, hau da, dronak erabiltzea paketeak etxera eramateko?
Gaur egun, konplikatu samarra da. Dronek ezin dute x denboran ibili, aparatuak kontrolatzeko irrati-frekuentzia mugengatik eta baterien iraupenagatik. Bi inkognita horiek argitzen direnean, posible izango da. Etorkizuneko smart city-en arkitektoak dagoeneko hasi dira esaten etxeen teilatuak erabil daitezkeela dronak lurreratzeko heliportu gisa. Denbora kontua baino ez da, laster hasiko gara hiriak horretarako prestatzen. Baina urte batzuk pasako dira oraindik, gaur egun ia ezinezkoa baita araudiagatik, irrati-frekuentziengatik eta bateriengatik.
Nolako harrera egiten dizuete bezero industrialek zuen zerbitzuak eskaintzen dizkiezuenean?
Bezero batengana goazenean, bi erronka gainditu behar izaten ditugu. Lehenengoa da bezeroak ez dituela ezagutzen dronaren gaitasunak edo ez dakiela oso ongi zer den dron bat. Heziketa-lana egin behar dugu, uler dezaten nolako zerbitzua erosiko duten. Bigarrena da azaltzea drona hegaldatzea gure zerbitzuen %10a baino ez dela. Hori egin baino lehen, dokumentazioa bildu beharra dago, dokumentu horiek kudeatu eta baimenak eskatu. Gero probako hegaldia egin behar da, irudiak editatu, post-produkzio lana egin eta txosten bat entregatu. Beraz, hegaldia gure lanaren %10a baino ez da, eta jende askok ez daki hori.
Zeintzuk dira dronen aplikazioan interesatutako sektoreak?
Material arriskutsuak erabiltzen dituzten industriak dira interesatuenak, esaterako, birfindegiak eta industria eolikoa. Dronek era guztietako ikuskapenak egin ditzakete, langileen segurtasuna arriskuan jarri gabe. Horrela, enpresek asko aurrezten dute kostuetan eta lanaren arriskua askoz txikiagoa da. Bada gure zerbitzuak eskatzen dituen beste sektore bat, azpiegitura eta eraikinen ikuskapenarena alegia. Dronei esker, langileek ez dute eraikinetara igo beharrik, horrek berekin dakarren arriskua desagerraraziz. Hirugarrenentzako zerbitzuak emateaz gain, Dronak enpresan badugu AESAren baimena dronen pilotajeari buruzko prestakuntza emateko, eta lan bertikalak egiten dituzten enpresetako langile asko izan ditugu ikasleen artean.
Zein da dronen etorkizuna?
Gure kasuan, eta logistika sektoreari begira, DNK X8 izeneko dron propio bat fabrikatu dugu, 40 kilorainoko kargak garraiatzeko. Segurtasun-sistema hirukoitz eta errepikakorra du, eta zortzi motor indartsu. Munduan ez dago horrelako dron bat duen enpresa askorik. Hasieran geuretzat bakarrik sortu genuen, baina ikusi dugu eskaera handia dagoela, eta baliteke gure ikuspegi komertziala aldatzea.
Bestalde, uste dugu dronen etorkizuna bere erabilpen-esparruetan dagoela. Adituak gara urrunetik gidatzen diren ibilgailuetan. Funtsean, dron bat gidatutako robot bat da, eta hegan egiteaz gain, gai da uretan eta lurrean mugitzeko. Teknologiari dagokionez, bateria eta irrati-frekuentzia gaitasunak handitu egingo dira eta dronak gero eta autonomoagoak izango dira. Adimen artifiziala, ikusmen artifiziala eta machine learning teknologiak aplikatuz, etorkizuneko dronak gai izango dira bere operatibari buruz gehiago ikasteko eta beren prestazioak hobetzeko. Ikusmen artifizialak aukera emango die beren ingurunea ezagutzeko eta istripuak saihesteko. Hori bai, araudia ere aldatu eta egokitu beharko dugu, teknologia hauei ahalik eta probetxu gehien ateratzeko.
Lotutako albisteak
Elvira, berrikuntza eta tradizioa osagai nagusi dituen istorio gastronomikoa
Harategi-urdaitegi txiki bat izatetik, gaur egun hamar establezimendu inguru ditu etxean egingo liratekeen moduan prestatutako produktuak saltzeko, online dendan ere saltzen direnak.
Egin ezazu prestakuntza-plana zure enpresan Gaitasun Digitalen programarekin
«Gaitasun Digital Profesionalak» programaren edizio berriak 2 milioi euroraino igo du bere aurrekontua, euskal enpresen lehiakortasuna sustatzen jarraitzeko helburuarekin, langileen prestakuntza indartuz.
% 64 egin dute gora Eusko Jaurlaritzak SPRIren bitartez antolatutako IKT arloko prestakuntzara joandakoek
Enpresa Digitala ekimena 3 lurraldeetako bost gune fisikotan eskaintzen da eta ireki den azkena Ezkerraldekoa izan da, Abantoko campusean
Irudi B2B: 7 urte marketin digital industriala aztertzen bere blogaren bidez
Bere blogaren helburua: ezagutza erabilgarria partekatzea, industriak kanal digitalaren potentziala ahalik eta gehien aprobetxa dezan.
Industria Digitaleko laguntzek zure negozioaren eraldaketa digitala lortzeko bidea irekiko dizute
Industria Digitala 2025 laguntza-programaren aurtengo edizioa martxoaren 18tik irekita, 7.5 milioi €-ko aurrekontuarekin. Euren negozioa digitalki eraldatu nahi duten enpresek urriaren 31era arte aurkez ditzakete euren eskaerak.
Zaher Taldeak bere eraginkortasun operatiboa hobetzea du helburu eraldaketa digital nabarmen baten bidez
Enpresa gipuzkoarra bere zuzendaritzaren errelebo betean murgilduta dago, galdaragintzan eta mekanizazioan aritzen da, eta nazioartekotzearen aldeko apustua ere egin du.
Einnek, bost urte etengabe eboluzionatzen sektore elektriko-elektronikoan
Pandemia betean jaio zen enpresak eraldaketa digitalaren aldeko apustua egin du hasieratik, sektorean bereizteko; bideojoko bat ere sortzen ari da, ingeniaritzako eta muntaiako barne-prestakuntza teknikoa iraultzeko.
Enpresa industrialen eta industria adimendunean espezialistak diren enpresa digitalen arteko elkarlana erraztuko du SPRI Taldeak
Enpresen Networkinga 2025 - Smart Industry kongresuaren 8. edizioa egingo dute martxoaren 26an, Bilbon, eraldaketa digitalari laguntzeko
Logistikari buruz Euskadin egiten den kongresuaren hirugarren edizioa egingo dute BECen
Azoka da iparraldeko eremuan packagingaren, logistikaren eta garraioaren sektoreak biltzen dituen azoka bakarra
Segundu bakoitzak kontatzen du. Ziurtatu zure erreskatea ResQaRrekin
Erreskate-orria formatu digitalean: larrialdi ekipoak, erreskatea modu seguruan egin ahal izateko, behar diren ibilgailuko elementuei buruzko infomazio zehatza eta azkarra.