Susana Velasco, erdian, beste bi langilekin.
Albisteak 14 abendua, 2021

Hervel, 3Dn inprimatutako piezen postprozesamenduan espezializatuta dagoen kimika arloko familia ETEa

Azaleren eta hondakin-ur industrialen tratamenduan diharduen enpresa honek BDIH Konexio programaren laguntza jaso du

 

Hervel Ermuan kokatutako sektore kimikoko euskal ETE bat da, azaleren eta hondakin-ur industrialen tratamenduan diharduena. Denborarekin, 3Dn inprimatutako piezen postratamenduan espezializatu da. Teknologia hori garatzeko, konpainiak SPRI Taldearen laguntza jaso du BDIH Konexio programaren bitartez, zeinarekin Basque Digital Innovation Hub-ek ETEen eskura jartzen baitu fabrikazio aurreratuko aktibo eta zerbitzuen sare konektatu bat prestakuntzarako, ikerketarako, testak egiteko eta baliozkotze prozesuetarako.

 

Jaso duten laguntza Mondragon Unibertsitatearekin batera garatutako proiektu batera bideratu dute: “moleta urratzaile berriak (karburo silizio askoz gogorragoko oinarria duten harriak) baliozkotzea, fabrikazio gehigarri bidez ekoitzitako titaniozko piezen postprozesamenduko denborak hobetzeko”, azaldu du Hervel-eko kudeatzaile Susana Velascok. Ekimena merkaturatu aurreko neurketen fasean dago, eta Mondragon Unibertsitateko Goi Eskola Politeknikoa ari da neurketa horiek egiten.

 

Hervel (Hermanos Velasco izenaren akronimoa) 1970ean sortutako familia enpresa bat da, egungo arduradunen aitak fundatu zuena. Susana, Mónica eta Raquel familiaren bigarren belaunaldiko kideak dira.

 

Esan bezala, konpainia 70eko hamarkadan hasi zen lanean azaleren akaberetarako prozesu elektrolitikoetan, baina 1983an gauzak guztiz aldatu ziren, Alma konpainia italiarrak Hervel aukeratu zuelako bere bibrazio-ekipoen ordezkari izateko, zeintzuk gehiago erabiltzen baitziren aurretratamenduetan.  Orain, Hervel “prozesu kimikoetan zentratzen da gehienbat, eta oso espezializatuta gaude azaleren aurretratamenduan. Lehen kromo, nikel edo letoia tratatzeko produktuak fabrikatzen genituen, baina orain negozio-bolumenaren zati handiena beste prozesu batzuen bidez lortzen da: koipegabetzea, ultrasoinuak, desugertzea, ilunketa, fosfatatuak, antioxidatzaileak…” dio Susana Velascok.

 

“Legeria betetzeko xedez, uren tratamenduaren arloan instalazio fisiko-kimiko sinpleetatik zero isurietara igaro gara, eta horrela gai gara ingurumena babesteko, ura berrerabiltzeko, kanpoko kudeaketa gutxitzeko, legea betetzeko… Iraultza sekulakoa izan da arlo horretan”.

 

Hervel-en produktuak sektore oso desberdinetara zuzentzen dira: automozioa, aeronautika, etxeko tresnak, galdaragintza, estanpazioa, dekoletajea, etab. “Gure prozesuen bidez piezak garbitu eta koipegabetzen dira, ertzak biribildu eta herdoilaren kontra babestu. Hau da, azken akabera emateko prestatzen ditugu, eta prozesu horietan sortutako isuriak tratatzen ditugu”.

 

Kudeatzaileak adierazi du produktu kimiko bat fabrikatzen dutela, baina “prozesu osoa saltzen dugu: makina, urratzaileak, produktu kimikoa, bainuen mantenimendua, ordezko piezak eta makinen osagarriak. Funtsean, prozesu osoa eskaintzen dugu. Beste zeregin garrantzitsu bat ere badugu: aholkularitza ematen diegu bezeroei azalerekin eta isuriekin zerikusia duten arazoen inguruan.

 

8 pertsona (5 emakume eta 3 gizon) daude plantillan, egoitza zentrala Ermuan dago eta ordezkaritza bat dute Zaragozan, María de Huervan. Beste hainbat enpresak egin duten bezala, gai izan dira pandemiaren ondorioak saihesteko 2019aren amaieran teknologia berri bat erosi eta negozioa dibertsifikatu zutelako. “2019an ez ginen iristen milioi bat euroko fakturaziora, aldiz, 2020an eta 2021ean gainditu egin dugu kopuru hori”.

 

I+G

I+G funtsezkoa da enpresarentzat; negozioaren % 15 inguru horretara bideratzen da, eta badago soilik I+G-n diharduen langile bat. “Sail garrantzitsua da, produktuak etengabe garatzen ari dena”.

 

Bere esanetan, “enpresa oso ongi posizionatuta dago poliamidez eta hainbat metal eta aleazioz 3Dn edo fabrikazio gehigarri bidez ekoitzitako piezen postprozesatuetan”. Aurrera begira, hainbat proiektu dituzte, besteak beste, prozesu horiek guztiak automatizatzea, eta horretarako lankide izango ditu beste konpainia batzuk eta Cidetek ikerketa zentroa.  “Bestalde, ingurumena errespetatzen duten produktuak garatzen ari gara”.

 

Etorkizunerako erronka dute erreferente bihurtzea fabrikazio gehigarriaren postprozesatuetan eta %100ean emakumez gidatutako enpresa txiki eredugarri bat izatea.  Hemendik gutxira lantegiaren azalera handituko dute (225 m2 gehiago), nabe bat erosi baitute egun Ermuan dituzten instalazioen aldamenean, enpresak bizi duen etengabeko hazkundeari egokitzeko.

 

Aurten ekonomia zirkularreko proiektu batean parte hartu dute Ihobe eta Novia Salcedo Fundazioarekin batera, eta “solidoak eta oreak zirkuitu itxian fabrikatzeko lan-zelula bat instalatzen ari gara; horrela lortuko dugu erabiltzen dugun ur guztia aprobetxatzea eta oreak % 100 begetalak izatea”.

 

Lotutako albisteak

Elvira,  berrikuntza  eta  tradizioa  osagai  nagusi  dituen  istorio  gastronomikoa

Elvira, berrikuntza eta tradizioa osagai nagusi dituen istorio gastronomikoa

Harategi-urdaitegi txiki bat izatetik, gaur egun hamar establezimendu inguru ditu etxean egingo liratekeen moduan prestatutako produktuak saltzeko, online dendan ere saltzen direnak.

Egin  ezazu  prestakuntza-plana  zure  enpresan  Gaitasun  Digitalen  programarekin

Egin ezazu prestakuntza-plana zure enpresan Gaitasun Digitalen programarekin

«Gaitasun Digital Profesionalak» programaren edizio berriak 2 milioi euroraino igo du bere aurrekontua, euskal enpresen lehiakortasuna sustatzen jarraitzeko helburuarekin, langileen prestakuntza indartuz.

%  64  egin  dute  gora  Eusko  Jaurlaritzak  SPRIren  bitartez  antolatutako  IKT  arloko  prestakuntzara  joandakoek

% 64 egin dute gora Eusko Jaurlaritzak SPRIren bitartez antolatutako IKT arloko prestakuntzara joandakoek

Enpresa Digitala ekimena 3 lurraldeetako bost gune fisikotan eskaintzen da eta ireki den azkena Ezkerraldekoa izan da, Abantoko campusean

Irudi  B2B:  7  urte  marketin  digital  industriala  aztertzen  bere  blogaren  bidez

Irudi B2B: 7 urte marketin digital industriala aztertzen bere blogaren bidez

Bere blogaren helburua: ezagutza erabilgarria partekatzea, industriak kanal digitalaren potentziala ahalik eta gehien aprobetxa dezan.

Industria  Digitaleko  laguntzek  zure  negozioaren  eraldaketa  digitala  lortzeko  bidea  irekiko  dizute

Industria Digitaleko laguntzek zure negozioaren eraldaketa digitala lortzeko bidea irekiko dizute

Industria Digitala 2025 laguntza-programaren aurtengo edizioa martxoaren 18tik irekita, 7.5 milioi €-ko aurrekontuarekin. Euren negozioa digitalki eraldatu nahi duten enpresek urriaren 31era arte aurkez ditzakete euren eskaerak.

Joan blogera

Jarrai gaitzazu

Kanal espezializatuak eta eguneroko gaurkotasuna gure sareetan.