Joan blog-era Euskal enpresaren blog-a

Zure enpresarentzat garrantzitsua den eguneroko informazioa

Albisteak 28 apirila, 2021 Ekintzailetza Eraldaketa digitala Industria adimenduna Smart Industry Programa Start up UP Euskadi

SMARTPM euskal startupak automatizazioko konponbide bat emango dio Hexagon multinazionalari

Elgoibarren sortutako konpainiak sistema operatibo bat garatu du prozesu industrialen elementuak kudeatzeko, hala nola biltegiak eta robotak

Egile Taldean integratutako SMARTPM euskal startupak automatizazio industrialeko konponbide bat emango dio Hexagon multinazionalari, zeina liderra baita sentsoreetan, softwarean eta konponbide autonomoetan. Multinazional horrek burtsan kotizatzen du eta 4.000 milioi euro inguruko fakturazioa dauka.

MIC (Management Intelligent Core) plataforma goi-mailako software konponbide bat da eta “sistema operatibo” batek bezala funtzionatzen du, modu autonomoan kudeatzen duelarik prozesu industrial bat osatzen duten aktiboak: pertsonak, biltegiak, mekanizatu zentroak, metodologia eta handing konponbideak (robotak). MIC plataformaren xedea ez da bakarrik informazioa atzeman eta tratatzea, baizik eta baita ere aktiboak kudeatzea, hala, erabilitako gaitasuna eta kalitatea autonomia maila handiarekin maximizatzeko ekintzak sortzen ditu.

SMARTPM enpresa 2019an sortu zen Elgoibarren, eta zehaztasunezko mekanizatu sektorerako prozesu industrialen ingeniaritzan eta automatizazioan espezializatuta dago, bi negozio-unitate dituelarik: automatizazio industrialarena eta software banaketarena. Bere plantillan 20 langile inguru ditu.

Fokua jarria duelarik automatizazioko konponbideen diseinu, garapen eta ezarpenean, helburutzat du konfiantzazko nazioarteko partner bihurtzea fabrikazioko zelula autonomoen garapenean, lehiakortasun-abantaila eta bezeroarentzako itzulera ekonomikoa sortuz.

Horretarako, oinarritzat hartuko ditu 4.0 industriak eskaintzen dituen tresna guztiak, hau da, bere prozesuetan txertatuko ditu, besteak beste, machine learning teknologia eta big data bezalako teknikak fabrikazio-prozesuari buruzko datuak eskuratzeko eta, datu horietatik abiatuta, zuzenketak egiteko (hasierako etapan) nahiz prebentzio-neurriak hartzeko.

Hexagon multinazionalarekin sinatutako akordioa bultzada handi bat da SMARTPM enpresaren estrategiarentzat, bai fabrikazio adimendunaren etorkizuneko ikuspegiari dagokionez eta bai garatzen dituen produktu eta zerbitzuei dagokienez. Gainera, enpresaren negozioa azkartzeko balioko du, eta horrela lortuko du bere hazkunde-plana betetzea, zeinaren helburuetako bat baita 30 enplegu berri sortzea 2025erako.