Euskadiko Zibersegurtasun Industrien Elkarteak (Cybasque) “Cybersecurity Made in Europe” zigilua eman ahal izango du
- Zibersegurtasuneko Euskal Zentroak (BCSC) Europako Zibersegurtasun Erakundeko (ECSO) kide eta partner estrategiko gisa emandako bultzadari esker
- ECSOk ematen duen zigilu berri bat da, eta balio erantsi handia ematen die lortzen duten zibersegurtasun-enpresei
- Euskadi “Cybersecurity Made in Europe” zigilua emateko baimena duten 11 herrialdeetako bat da
Euskadiko Zibersegurtasun Industrien Elkarteak (Cybasque) “Cybersecurity Made in Europe” zigilu esklusiboa eman ahal izango die Europako edozein zibersegurtasun-enpresaren produktuei, Europako Zibersegurtasun Erakundearen (ECSO) baimena jaso ondoren eta Zibersegurtasuneko Euskal Zentroak (BCSC) Europako Zibersegurtasun Erakundeko (ECSO) kide eta partner estrategiko gisa emandako bultzadari esker.
ECSOk ematen du ziurtagiri hori, zeina baliagarria izango baita euskal enpresen ikusgarritasuna hobetzeko beste konpainia batzuen aldean eta amaierako erabiltzaileen eta zibersegurtasun-sektoreko inbertitzaileen aurrean.
Hala, Euskadi da “Cybersecurity Made in Europe” zigilua emateko baimena duten 11 herrialdeetako bat. Etiketa hori emateko baimena duen bazkide bat baino ez dago Espainian, Cybasque alegia. Europa osoan, Frantzian 4 bazkide baimendu daude, Belgikan eta Italian bina, eta Alemania, Bulgaria, Danimarka, Eslovakia, Finlandia, Polonia eta Erresuma Batuan bana.
European Cyber Security Organisation (ECSO) irabazi asmorik gabeko erakunde bat da, eta bere helburu nagusia da Europako zibersegurtasuna garatzen, sustatzen eta bultzatzen duten ekimen eta proiektuak babestea. Duela gutxi Cybersecurity Made in Europe etiketa sortu du, industriak bultzatutako marketin-tresna bat, Europako zibersegurtasun-enpresen eginkizuna babesteko eta Europako eta munduko merkatuetan duten ikusgarritasuna handitzeko. Etiketa hori sortu da industriak benetan behar zuelako bere premiak aseko zituen tresna bat, eta baita ere zibersegurtasunaren Europako merkatuan hutsune bat zegoelako arlo horretan. Hala, etiketa horrek merkatuko bereizgarri bezala balio du, fokua jartzen du kokapen geografikoan eta Europako zibersegurtasun-enpresen balio estrategikoa nabarmentzen du.
Cybersecurity Made in Europe etiketa eskatzeko baldintzak
Etiketa hori ECSOk eta horretarako baimendutako bazkideek bakarrik eman dezakete. Etiketa lortu nahi duten enpresa edo antolakundeek edozein bazkide baimendurengana jo dezakete, edozein herrialdetan dagoela ere bere egoitza, baina betiere Europar Batasunaren barruan.
Gorago aipatu ditugu etiketa hau eskuratzearen abantailak, baina azpimarratzekoa da baliagarria dela merkatuan geografikoki bereizteko, hau da, balio estrategikoa ematen dio enpresari edo antolakundeari garrantzia emanez jatorri europarrari eta, era berean, bere ikusgarritasuna hobetzen du balizko zibersegurtasun-merkatuaren aurrean. Europako sektoreko kide izateak kalitatea bermatzen du mundu mailako beste enpresa batzuen aurrean, eta dagokion tokian kokatzen du Europako zibersegurtasuna.
Etiketak enpresaren autoaitorpen bat baliatzen du ziurtapen tresna gisa, kanpoko auditoretza teknikorik gabe. Gainera, Cybersecurity Made in Europe etiketa egoitza Europan duten sektoreko enpresei zuzentzen zaie, ez zibersegurtasun arloko produktu edo zerbitzu espezifikoei. Bestalde, kalitate gehigarria ematen dio enpresari, lehendik dauden Estatuko antzeko beste etiketa batzuekin batera.
Etiketa hau eskatzen duten enpresek baldintza orokor batzuk bete behar dituzte, hala nola egoitza Europan duen legezko erakunde bat izatea.
Eta talde bateko kide bada, taldearen egoitzak Europan egon behar du erregistratuta. Gainera, arrazoizko bermeak eman behar ditu ziurtatzeko enpresa ez dela Europatik kanpoko herrialde batetik kontrolatzen, eta Europak izan behar du bere negozio-gune nagusia; frogatu behar du bere I+G-ko jardueraren % 50 baino gehiago zibersegurtasunera bideratzen duela, eta bere langile guztien % 50 EB, EMLE eta EEEko herrialdeetan nahiz Erresuma Batuan dituela.
Azkenik, enpresak aitortu behar du ENISAk definitutako oinarrizko baldintzak betetzen dituela. Bi adierazpen aurkeztu behar ditu, bat bermatzeko eskaintzen dituen produktu edo konponbideek ez dutela atzeko aterik (backdoors), eta datuei eta pribatutasunari buruzko beste bat, segurtatzeko betetzen duela DBEO (Datuen Babeserako Erregelamendu Orokorra).
Horregatik, “Cybersecurity Made in Europe” zigilua eskuratu nahi duten Europako zibersegurtasun-enpresek erregistratzeko prozesua hasi behar dute. Horretarako, idatz dezatela madeineurope@cybasque.eus helbidera edo jo dezatela web orri honetara: https://ecs-org.eu/initiatives/cybersecurity-made-in-europe
Lotutako albisteak
GAIAk IKT sektorearen prestakuntza-beharren diagnostikoa egin du eta merkatuaren eskaerei erantzuteko prestakuntza-ibilbideak garatu ditu
GAIAk azpimarratu duenez, sektoreko eta gobernuko erakundeen, sozietate publikoen eta hezkuntza-sistemaren parte-hartzea funtsezkoa izan da azterlanari balio erantsia emateko
Senvia Systems-ek beste enpresa batzuk gidatzen ditu haien sustapenean eta eraldaketa digitalean
Iaz sortutako enpresa gipuzkoarrak sistemetan, komunikazioetan eta zibersegurtasunean oinarritutako IT zerbitzuak eta aholkularitza eskaintzen ditu.
Europako ordezkaritza bat etorri da Euskadira industria teknologiko kuantikoaren lider izateko bertako estrategia hobeto ezagutzeko
Finlandia, Grezia, Italia eta Espainiako ordezkariak izan dira Euskadin Europako QUANTUM+ proiektuan aurrera egiteko. GAIA klusterra da proiektuaren kideetako bat, eta helburu du teknologia kuantikoei buruzko ibilbide eta prestakuntza-plataforma bat garatzea goi-mailako hezkuntzako ikasleentzat, irakasleentzat eta enpresa teknologikoetako profesionalentzat
Akting, gizarteari balioa emateko teknologia
Gipuzkoako enpresak euskarri desberdinetarako aplikazioak garatzen ditu eta digitalizazioaren, datuen analisiaren eta prozesuen optimizazioaren aldeko apustua egiten du.
Elvira, berrikuntza eta tradizioa osagai nagusi dituen istorio gastronomikoa
Harategi-urdaitegi txiki bat izatetik, gaur egun hamar establezimendu inguru ditu etxean egingo liratekeen moduan prestatutako produktuak saltzeko, online dendan ere saltzen direnak.
Egin ezazu prestakuntza-plana zure enpresan Gaitasun Digitalen programarekin
«Gaitasun Digital Profesionalak» programaren edizio berriak 2 milioi euroraino igo du bere aurrekontua, euskal enpresen lehiakortasuna sustatzen jarraitzeko helburuarekin, langileen prestakuntza indartuz.
Adimen artifiziala, blockchaina eta zibersegurtasuna izango dira Elkargiko 35. Enpresa Topaketaren erdigunean
Ekitaldia apirilaren 10ean izango da Donostiako Kursaal Jauregian
% 64 egin dute gora Eusko Jaurlaritzak SPRIren bitartez antolatutako IKT arloko prestakuntzara joandakoek
Enpresa Digitala ekimena 3 lurraldeetako bost gune fisikotan eskaintzen da eta ireki den azkena Ezkerraldekoa izan da, Abantoko campusean
Irudi B2B: 7 urte marketin digital industriala aztertzen bere blogaren bidez
Bere blogaren helburua: ezagutza erabilgarria partekatzea, industriak kanal digitalaren potentziala ahalik eta gehien aprobetxa dezan.
SOC-Ek bere kokapen zientifiko-teknologikoa sendotu nahi du esparru aeroespazialean
Bizkaiko konpainiak Etherneten oinarritutako komunikazio-soluzioak eskaintzen dizkie Airbus, Boeing, Lockheed Martin edo Blue Origin bezalako bezeroei, eta sektore horretara bideratutako Time-Sensitive Networking (TSN) komunikazio ziberseguruetarako I+G proiektu handi batean murgilduta dago.