20 adituen taldeko euskal ordezkariak Europako industriak etorkizunean arrakasta izateko faktoreak aurkeztu ditu Bruselan
Europako industriak balio gehigarri handiko produktu sofistikatuen ekoizpenean duen lidergoa sendotzeko beharrarekin lotutako bost faktore aurkeztu ditu SPRI Taldeko Ekimen Estrategikoen arduradunak.
Urte honen hasieran hautatu zuten Cristina Oyón 20 adituen taldeko kide izateko. Talde horrek aholkuak ematen dizkio Batzordeko zuzendariordetzari High Level Industrial Roundtable ‘Industry 2030’ delakoaren barruan
2030eko Europako Estrategia Industrialari buruz aholku emateko Europako Batzordeak hautatu dituen 20 adituetako bat da Cristina Oyón euskal ordezkaria, eta Jyrki Katainen zuzendariordeari aurkeztu dizkio Europako industriak arrakasta izateko beharrezkoak diren bost faktoreak. Haren ustez, industriak dagoeneko badituen indarguneetatik abiatuta eraiki behar dira faktore horiek, eta balio gehigarri handiko produktu sofistikatuak fabrikatzen munduko liderra izatea da indargune horietako bat.
SPRI Taldearen Ekimen Estrategikoetako arduraduna urte honen hasieran hautatu zuten 20 adituen taldeko partaide izateko. Taldeak aholku ematen dio High Level Industrial Roundtable ‘Industry 2030’ barneko Batzordeko zuzendariordetzari.
Aste honetan Bruselan egindako bileran aurkeztu ditu proposamenak Oyónek, 2018ko otsailean taldea sortu zenetik gaur arte egindako aurrerapenak Jyrki Katainen zuzendariordeari azaldu dizkioten bilera berean.
SPRI Taldeko arduradunarentzat oinarrizkoa da gizartearekiko, ingurumenarekiko eta ekonomiarekiko era arduratsuan balioa sortzen duen munduko lider gisa kokatzea Europa.
Arrakastarako bost faktoreak
Oyónen esanean, arrakastaren bost faktoreak lortzeko, Europan dagoeneko badauden indarguneetatik abiatu behar da. Zehazki, Europako industria munduko liderra da balio gehigarri handiko produktu sofistikatuak fabrikatzen.
Globalizazioaren eta digitalizazioaren eraginez elkarrekintza ekonomikoen eta sozialen ohiko ereduak aldatzen ari diren honetan, Europak aukera bat du industria are gehiago desberdintzeko, teknologian, berrikuntzan eta jasangarritasunean oinarrituta; hori da, hain zuzen, arrakastarako lehen faktorea.
Oyónek nabarmendu duenez, Europan balio gehigarriko jarduera industrial hori era arduratsuan garatzeko, enpresa-ekosistema justua, lehiakorra eta eraginkorra behar da, eta aukera eman behar du balio gehigarri handiko produktuak prezio lehiakorretan fabrikatzeko eta zerbitzuak ere baldintza horietan emateko. Bigarren arrakasta-faktore hori lortzeko, industria-politika eta lehiakortasuna txertatu behar dira Europako ekimen estrategiko eta politiko guztietan, maila guztietan. Gainera, Europa, estatu eta eskualde mailan txertatu beharko lirateke politika horiek, bai eta balioa sortzeko sare estrategikoetan ere, inbertitutako ahaleginekiko itzulkin kolektiborik handiena eman dezaten.
Sare estrategiko horiek mugikortasun jasangarriaren arloan, energia berriztagarrietan, ekonomia zirkularrean, zahartzearen arloan eta ekonomia digitalean gako diren eragileak hartu behar dituzte barnean; lehenespen hori da, hain zuzen ere, arrakastarako hirugarren faktorea.
Logika komertzial berriaren arabera produktuez gain soluzioak eskaintzeak gero eta pisu handiagoa duela kontuan hartuta, Europako industriak indarrak batu behar ditu enpresa liderrek bultzatutako industria-klusterretan, baliabideen erabilera eraginkorraren buru izateko eta Europan kalitate handiko lanpostuak sortzeko.
Cristina Oyónek azaldu duenez, ekonomia globalizatu, digitalizatu eta jasangarrian, talentua eta aktiboak behar bezala aurreratzearen eta garatzearen mende dago eraldaketa industrial hori sustatzen duten lanpostuak —lanpostu gehiago eta hobeak— lortzea.
Gure gizartean aipatutako gaitasun horiek garatzea —hots, oso kualifikazio handiko giza kapitala, ezagutza sortzea eta transferitzea errazten duten azpiegiturak eta eskualde mailako espezializazio-estrategia adimentsuak lortzea— litzateke teknologian, berrikuntzan eta jasangarritasunean oinarritutako industria lehiakorra sortzeko laugarren arrakasta-faktorea. Gainera, faktore horri esker, industria-eraldaketa errazago onartuko luke gizarteak, eta langileentzako bidezko trantsizioa ere errazago egingo litzateke.
Bosgarren arrakasta-faktorea berdintasun sozialaren eta ongizatearen etengabeko bilaketa litzateke. Kasu horretan, Europa ezberdintzen duten balioetan jarri beharko litzateke arreta: berritzeko, inbertitzeko eta bizitzeko toki erakargarriagoa izan behar du Europak.
SPRI Taldearen barruan izan duen ibilbideari eta Bruselan dagoen eta Kanpoko Ekintzen batzordearen mende dagoen Europako Batzorderako Euskadiko Ordezkaritzatik jaso duen laguntzari esker, Cristina Oyón erreferente bihurtu da Europan politika teknologikoei, 4.0 Industriari eta espezializazio adimendunari dagokienez.
High Level Industrial Roundtable “Industry 2030” batzordearen helburua da, 2017ko irailean argitaratutako Europako industria-estrategia ezartzeko prozesuan, Europako Batzordeari aholkuak ematea, nazioartean, estatuetan eta eskualdeetan ezarpenak duen aurrerapenaren segimendua egitea eta industria-politikaren etorkizuneko ekintzetarako lehentasunak proposatzea. Jyrki Katainen da batzordearen burua, zeina lanaren, hazkuntzaren, inbertsioen eta lehiakortasunaren zuzendariordea baita Europako Batzordean. Batzordearen zuzendariordea, berriz, Elzbieta Bienkowska da, barne-merkatuko, industriako, ekintzailetzako eta ETE-etako komisarioa.
Lotutako albisteak
Logistikari buruz Euskadin egiten den kongresuaren hirugarren edizioa egingo dute BECen
Azoka da iparraldeko eremuan packagingaren, logistikaren eta garraioaren sektoreak biltzen dituen azoka bakarra
Prado Silos nazioartean indartzen, estrategia eta inbertsio berriekin hazkundea bultzatuz
38 herrialdetan presentzia handituz eta 2025erako 9 milioi euroko kontratuak aurreikusiz
Segundu bakoitzak kontatzen du. Ziurtatu zure erreskatea ResQaRrekin
Erreskate-orria formatu digitalean: larrialdi ekipoak, erreskatea modu seguruan egin ahal izateko, behar diren ibilgailuko elementuei buruzko infomazio zehatza eta azkarra.
Landatu Solarrek, bere produktu berritzaileen bidez, eguzki-panelak instalatzea errazten du
Bilboko ingeniaritzak bi sistema sortu ditu: Landblock, teilatu eta zoruetan instalatzeko, eta Lamaru, eguzki-energia flotatzailerako soluzioa.
Fecin, industriako eskuilagintzan espezializatuta 60 urte daramatzan Gipuzkoako ETEa
Deban kokatuta dagoen enpresa da Europa mailan sektore honetako bost fabrikatzaileetako bat eta SPRI Taldearen zibersegurtasun-programaren laguntza jaso du