Narriadura kognitiboaren aurkako Kwido plataforma Errumaniara iritsi da
Ideable euskal enpresak akordio bat lortu du Ana Aslan fundazioarekin Kwido Mementia plataforma inplementatu dezan pertsona nagusientzako zaintza eta osasun arretarako bere zentroetan. Erakunde errumaniar hori euskal enpresaren tresna erabiltzen hasiko da bere pazienteen gaitasun kognitiboak lantzeko eta, bide horretatik, endekapenezko gaixotasun neurologikoak atzeratzeko.
Kwido Mementia estimulazio kognitiborako konponbide bat da, enpresei, osasun arloko antolakundeei eta telelaguntza ematen duten profesionalei zuzendua dagoena. Plataforma pertsonalizagarri bat da, eta hainbat ariketa eskaintzen ditu arreta, memoria, lengoaia eta beste gaitasun kognitibo batzuk estimulatzeko. Gainera, aukera ematen die zaintza arloan lan egiten duten profesionalei erabiltzaileen eboluzioa erregistratzeko. “Zentro askotan horrelako terapiak oraindik presentzialki baino ez dira egiten, papera eta boligrafoa erabiliz” azaldu du Ideable enpresako zuzendari nagusi Iñaki Bartolomék, “aldiz, gure sistemak pertsonaren eboluzioa erregistratzen du denbora errealean, alertak bidaltzen ditu narriadura zantzuren bat detektatzen badu, eta gainera etxetik erabili daiteke -une honetan, aukera seguruagoa-”.
Kwido plataformak ukimenezko pantailak, tabletak eta errealitate birtuala baliatzen ditu entrenamendu motibagarriago bat eskaintzeko, ariketak jolas interaktibo bihurtuz. Errealitate birtualari dagokion zatian, eguneroko egoerak (sukaldean aritzea edo erosketak egitea) eta jarduera ludikoak birsortzen ditu gaitasun kognitiboak lantzeko. Jolas murgiltzaile horiek Europako VirtuAAL proiektuaren barruan garatzen dira (Ana Aslan Nazioarteko Fundazioak ere parte hartzen du ekimen horretan). “Horrez gain, sarbideak sortzen ari gara betaurrekoetatik beste aplikazio batzuetan ere sartu ahal izateko (bidaiatzeko aplikazioak, espazio naturalak bisitatzeko aukera ematen dutenak…). Alderdi hori lotuago dago erlaxazioarekin eta motibazioarekin” azaldu du Iñaki Bartolomék.
Ana Aslan erakunde errumaniarra Kwido Mementia erabiltzen hasiko da bere Memoria Zentroan eta Lehen Mailako Arretako kontsultetan. Hasteko, 200 pazienterekin probatuko du plataforma, baina asmoa da 25.000 erabiltzeraino iristea datozen 3 urteetan. Fundazioak ikerketa, hezkuntza eta zerbitzu medikoen arloetan lan egiten du, arreta berezia eskainiz teknologien erabilerari zahartze osasuntsua sustatzeko.
Kwido tresnak estimulazio kognitiboko terapietarako eskaintzen dituen onurak baliozkotuta daude ikerketa zentroek eta adinekoen zaintza zentroek garatutako azterlanen bidez. Dagoeneko frogatuta dago erabiltzaileek euren gaitasun kognitiboak, aldartea eta motibazioa hobetzen dituztela horrelako tresnak erabilita. Gaur egun, plataforma 10 hizkuntzatan erabil daiteke, eta dagoeneko inplementatuta dago Europa nahiz Latinoamerikako hainbat herrialdetan.
Lotutako albisteak
Elvira, berrikuntza eta tradizioa osagai nagusi dituen istorio gastronomikoa
Harategi-urdaitegi txiki bat izatetik, gaur egun hamar establezimendu inguru ditu etxean egingo liratekeen moduan prestatutako produktuak saltzeko, online dendan ere saltzen direnak.
Egin ezazu prestakuntza-plana zure enpresan Gaitasun Digitalen programarekin
«Gaitasun Digital Profesionalak» programaren edizio berriak 2 milioi euroraino igo du bere aurrekontua, euskal enpresen lehiakortasuna sustatzen jarraitzeko helburuarekin, langileen prestakuntza indartuz.
% 64 egin dute gora Eusko Jaurlaritzak SPRIren bitartez antolatutako IKT arloko prestakuntzara joandakoek
Enpresa Digitala ekimena 3 lurraldeetako bost gune fisikotan eskaintzen da eta ireki den azkena Ezkerraldekoa izan da, Abantoko campusean
Irudi B2B: 7 urte marketin digital industriala aztertzen bere blogaren bidez
Bere blogaren helburua: ezagutza erabilgarria partekatzea, industriak kanal digitalaren potentziala ahalik eta gehien aprobetxa dezan.
Industria Digitaleko laguntzek zure negozioaren eraldaketa digitala lortzeko bidea irekiko dizute
Industria Digitala 2025 laguntza-programaren aurtengo edizioa martxoaren 18tik irekita, 7.5 milioi €-ko aurrekontuarekin. Euren negozioa digitalki eraldatu nahi duten enpresek urriaren 31era arte aurkez ditzakete euren eskaerak.