Albisteak 19 maiatza, 2021

Shuton, I+G+b-a doitasun handiko boladun torlojuak fabrikatzeko

Arabako enpresak I+G+b sail propioa du, bere neurrira egindako soluzioak garatzeko

Shuton Legution egoitza duen enpresa bat da, eta duela 45 urte baino gehiago sortu zen. Doitasun handiko boladun torlojuak diseinatzen eta fabrikatzen espezializatuta dago. Torloju horiek makina-erremintaren arloko fabrikatzaileei zuzenduta daude batez ere, baita plastikoa injektatzeko makinei, prentsei edo ingeniaritzako soluzioei ere. Shutonek bere ekoizpenaren % 90 baino gehiago esportatzen du, eta bere bezeroen artean sektorean lider diren multinazional handiak zein merkatu-nitxo espezifikoagoak dituzten enpresa txikiak daude.

Bezero horiei arreta emateko, Shutonek bere I+G+b saila dauka, eta, enpresako arduradunen arabera, “Funtsezkoa da merkatuko joerek markatutako produktuaren garapenari dagokionez erronka berriei aurre egin ahal izateko”. Garatzen diren I+G+b proiektu asko produktu berriak edo berrikuntzak garatzera bideratuta daude zuzenean, torlojuen prestazioak handitzeko, bezeroek zuzenean eskatzen baitituzte. “Neurrira egindako soluzioak garatzeko bizkortasuna eta prestazio bereiziak dituen produktu-katalogo bat izatea funtsezkoa da gure bezeroen leialtasuna lortzeko”, adierazi du Pako Juaristi Shutoneko Merkataritza Zuzendariak.

Gainera, Shutonen I+G+b sailean zurruntasun-saiakuntzak, karga eta abiadura handiko saiakuntzak egiten dira sentsore espezifikoekin. Horri esker, produktu berriek muturreko baldintzetan behar bezala funtzionatzen dutela ziurtatu daiteke, eta enpresaren ezagutza handitu daiteke etorkizuneko garapen berrietarako.

Goiaingo industrialdean dagoen enpresak beste eragile batzuekin ere parte hartzen du proiektuetan, hala nola enpresa eta zentro teknologikoekin. Gaur egun, proiektuak ditu Tekniker eta Tecnaliarekin batera -biak BRTAko kideak-, baita Mondragon Unibertsitateko Goi Eskola Politeknikoarekin eta bere Structural Mechanics & Design Research Group-ekin ere, zeinekin 7 urte baino gehiago baitaramatza lankidetzan.

Gainera, enpresak sarritan parte hartzen du SPRIk I+G bultzatzeko egindako programetan. “Ahal den guztietan, Hazitek bezalako laguntza deialdietara jotzen da, eskainitako baliabideak handitzeko, garapen konplexuagoak hartzeko edo proiektuen denbora murrizteko”, gaineratu du Pako Juaristik.

2020tik, Shuton Nadella Taldearen parte da, eta horrek inbertitzeko, merkatu berrietara ailegatzeko eta proiektu berriei laguntzeko gaitasun handiagoa eragiten du enpresan.

SPRI Taldeak euskal enpresen I+G bultzatzen du tresnekin, aktiboekin, laguntzekin, lantalde eta aliantzekin, ikerketa sustatzeko eta teknologia berriak sortzeko. Hori dena Elkartek, Emaitek edo Hazitek bezalako programaren bidez lortzen da, eta horien informazioa hemen dago eskuragarri.