SPRI Taldeak garapen industrialerako erronka eta aukera bezala aurkeztu ditu ekonomiaren deskarbonizazioa eta digitalizazioa

Cristina Oyónek, SPRI Taldeko ekimen estrategikoen arduradunak, Atlantikoko Emakumezko Enpresari eta Zuzendaritza-karguen lehen kongresuan parte hartu du Oviedon, otsailaren 21ean (ostirala). Oyónek -Europako Batzordeak 2030erako Europako Industria planifikatzeko sortutako aditu taldeko kide izan denak- bertatik bertara aurkeztu du Europako Batzordeak Europako Itun Berdearen proposamenean planteatzen duen eredu industriala, eta orobat azaldu du nola hurbildu nahi den Euskaditik proposamen horretara, trantsizio digitalak eta energetikoak berekin dakartzaten aukerak landuz eta industria ekonomiaren deskarbonizaziorako konponbide bezala aurkeztuz.

Kongresuko egitarauaren barruan, bost mahai-ingurutan aztertu dira 2020ko hamarkada berrian gizarte-, ekonomia- eta enpresa-egitura guztietan eragina izango duten erronka handiak. Horietako bat izan da 4.0 Industriari, trantsizio energetikoari eta berrikuntzari buruzkoa, non multinazional handietako (Toyota, Dupont, Satec) zuzendaritza-karguek eta administrazio publikoetako ordezkariek hizpide hartu baitituzte bi gai hauek: enpresa handi elektro-intentsiboen arazoak deskarbonizazio, digitalizazio eta gure enpresen tamaina bezalako arloetan, eta I+G+B-n inbertitzeko beharra, kalitatezko enplegua bermatuko duen etorkizun industrial lehiakor bat eraikitzeko.