Zainduz: “Gure ustez, zaintza-lanak gizarte osoaren erantzukizuna dira”
Proiektu honek haurrak zaintzeko zerbitzuak eskaintzen ditu erakundeentzat
Bere herriko Udalak antolatutako ekimen batera joan zenean bururatu zitzaion ama den Irune Sotori (ekimenaren sortzaileetako bat) Zainduz sortzeko ideia, ekimen horretan haurtzaindegi-zerbitzua zegoelako. Irunek ikusi zuen zerbitzu guztiz beharrezkoa dela, baina baita ere gutxitan eskaintzen dena. Hala, Amaia Agirresaroberekin batera erabaki zuen Zainduz irabazi asmorik gabeko elkartea sortzea.
“Nahiz eta oso baliabide baliagarria den aukera emateko zaintzaren ardura duen jendeari bizitza publikoan parte hartzeko, ez da oso maiz eskaintzen” azaldu du Amaiak, “ikusi genuen gure proiektuaren bidez posible dela erakunde publiko nahiz pribatuek beren gain hartzea zaintza-lanen arduraren zati bat”. Zainduz ekimenak haurtzaindegi-zerbitzuak eskaintzen ditu erakundeek antolatutako ekintzen toki berean, espazio desberdinetara egokituz. Zerbitzu horren elementu garrantzitsuena da dohainik eskaintzen zaiela erabiltzaileei, ekitaldiaren antolatzaileek ordaintzen dutelako.
Ikuspegi horrek lotura zuzena du Amaia eta Irunek proiektua martxan jartzeko izan zituzten arrazoiekin. “Zaintza-lan gehienak familiek egiten dituzte eta familien barruan emakumeek, lana eta familia-bizitza bateratzeko estrategiak oso desberdinak direlarik bakoitzaren posizio ekonomikoaren arabera” dio Amaia Agirresarobek. Zainduz ekimenaren asmoa da egoera hori ikusgarri egitea eta aldarrikatzea zaintzak eskubide bat direla, bai jasotzen dituztenentzat eta baita ere zaintzaileentzat. “Zaintzaileek egiten duten lana aitortu beharra dago eta aukera eman zaintza-lanak baldintza duinetan egiteko, norbere nortasunari eta pertsona gisa garatzeari uko egin gabe” azaldu du. Ez dute uste beren proiektuak arazo konplexu hau konponduko duenik, baina pentsatzen dute baliagarri izan daitekeela gizartea kontzientziatzeko.
Ekimena iazko urrian jarri zen martxan, eta denbora horretan erakunde publiko nahiz pribatuei zuzendutako hogei bat zerbitzu eman dituzte. Hala, haurtzaindegi-zerbitzua eskaini dute BECen eginiko Bertsolari Txapelketako finalean, Udalek antolatutako hitzaldietan eta, besteak beste, kalteberatasun egoeran dauden emakumeei zuzendutako baliabide publikoetan, izan ere, “horrelako zerbitzurik ez badago emakumeek ezin dute parte hartu, ez daukatelako alternatibarik”. Halere, ez dute nahi emakumeei zuzendutako baliabide gisa ikus dadin, baizik eta gizarte osoarentzako zerbitzu bezala, zaintza-lanak ardura kolektiboa direla ulertarazteko.
Lotutako albisteak
Elvira, berrikuntza eta tradizioa osagai nagusi dituen istorio gastronomikoa
Harategi-urdaitegi txiki bat izatetik, gaur egun hamar establezimendu inguru ditu etxean egingo liratekeen moduan prestatutako produktuak saltzeko, online dendan ere saltzen direnak.
Lorra, lau hamarkada inguru Bizkaiko nekazaritzako elikagaien kooperatibismoaren funtsezko zutabe gisa
Gaur egun, erakundearen lehentasuna zahartutako sektore honetako erretiroak ordezkatzea da, belaunaldi-erreleboaren bidez.
Egin ezazu prestakuntza-plana zure enpresan Gaitasun Digitalen programarekin
«Gaitasun Digital Profesionalak» programaren edizio berriak 2 milioi euroraino igo du bere aurrekontua, euskal enpresen lehiakortasuna sustatzen jarraitzeko helburuarekin, langileen prestakuntza indartuz.
NudgeXperience Bilbon: CX eta Portaera Zientzien ekitaldia
Zuzendariei eta gerenteei, Cx-eko arduradunei eta berrikuntza eta marketineko profesionalei zuzendua
Wake Up! Albiste ekintzaile batzuk sarean 250324
Euskadiko talentu ekintzaile guztia. Wake up! -ek komunikabide eta sareko blog desberdinek argitaratutako albisteen hautaketa txiki bat egunero partekatzen du Linkedinen: ideiak, proiektuak, negozioak, startupak, enpresak etab.