ECOFFEED proiektuak kafearen hondakinak erabiltzen ditu pentsu iraunkorragoak garatzeko

ECOFFEED proiektuaren datuen arabera, Europar Batasunean urtero 5 kg kafe kontsumitzen dira pertsonako, eta 10 kg hondakin sortzen dira erabilitako kafe eta kapsuletan. Hondakin horietako gehienak erraustegietara edo zabortegietara eramaten dira, eta horrek CO2 aztarna handia eragiten du. Hondakin horri balio erantsia emateko eta ingurumen-inpaktua murrizteko asmoz sortu da ECOFFEED ekimena. 

Europar Batasuneko LIFE Environment and Resource Efficiency programak finantzatu du Europako proiektu hori, eta 1,5 milioi euroko aurrekontua du. Ekimena BRTAko kide den Azti zentro teknologikoak burutzen du, eta euskal enpresa eta erakundeek ere parte hartzen dute: Neiker, Riera Nadeu, Ekogras, Euskovazza, Behi Alde eta Uaga. 

Ekimen honen helburua hoteletan, jatetxetan eta kafetegietan sortutako kafe-hondakinak  abeltzaintza-sektorean pentsu iraunkorragoak sortzeko erabiltzea da. Sektore hori berotegi-efektuko gasen igorle nagusietako bat da, eta animalien dietetan osagai iraunkorragoak eta errentagarriagoak bilatzen ditu, bere jasangarritasuna ziurtatzeko. Proiektu honetan frogatu denez, ardien dietetan % 10 eta % 15 arteko kafe hondakinak gehituz esnearen kalitatea hobetzen da eta metanoaren emisioak % 20 murrizten dira. Gainera, pentsuaren kostua murriztea lortzen da, ohiko lehengaiak baino prezio baxuagoa baitu 

“Ekimen honen ondorioz, osagai berri bat sortu da, segurua, elikagarria, lehiakorra eta ingurumena errespetatzen duena esne-aziendarentzat, hala nola ardientzat eta behientzat, eta HORECA sektoretik berreskuratutako -hondarrak sartu dira dietetan”, nabarmendu du David San Martinek, Aztin azpiproduktuak balorizatzen aditua dena. Proiektu hori 2020tik dago martxan, eta 2024ko martxoan amaituko da.  

SPRI Taldea RIS 3 Euskadi estrategia abian jartzen duen eragileetako bat da, energiaren, fabrikazio aurreratuaren, bio-osasunaren eta nanozientziaren arloetan espezializazio adimenduna bultzatzeko.