Australia, merkatu estrategikoa energia, teknologia eta garraio arloetan euskal enpresentzat
Negozio aukerak Australian 2025
Txosten honetan ageri dira Euskadiko enpresek negozio-aukerak are gehiago aprobetxa ditzaketen sektoreetako batzuk
Merkatu hau sakon aztertzeko, SPRI Taldeari atxikitako Basque Trade & Investment (BasqueTrade) euskal enpresak nazioartekotzeko agentziak Australiako merkatuaren ezaugarriak eta aukera-sektore nagusiak aztertzen dituen txostena landu du. Horien artean nabarmendu behar dira energia berriztagarriak, elektrizitatearen transmisioa eta banaketa, medikuntzako gailuak eta trenbide-industria.
Australia oso merkatu garrantzitsua da, bai industriaren tamainagatik eta bere BPGagatik, bai gaitasun teknologikoagatik eta horrek susta ditzaken aliantzengatik. Orain gutxi egindako Basque Traderen azterketa batean, hainbat arrisku- eta aukera-adierazle kuantifikatu ziren, eta Australia zen mundu mailako herrialderik interesgarrienetako bat.
Herrialdeak dituen aukerak esportazioen bidez zein tokiko inbertsioen edo lankidetza-hitzarmenen bidez gauzatu daitezke.
Energia berriztagarriak Australian
Australiako energia berriztagarrien sektorea garrantzizko eraldaketan murgilduta dago, elektrizitate-eskarian izandako hazkundeak eta iturri jasangarrien aldeko trantsizioak bultzatuta. Energia berriztagarrietan instalatutako gaitasuna 18 GWekoa zen 2015ean eta 2035ean 185 GWera igotzea aurreikusi da. Hazkunde horren barruan, garrantzi handia du eguzki-energiak, izan ere, 2015ean 4,5 GWeko gaitasuna zuen eta 2035ean 128 GWera igaroko dela kalkulatu da, herrialdeko irradiazio handiaren eta teknologia fotovoltaikoan izandako aurrerapenaren eraginez.
Ildo horretan, energia eolikoak ere bilakaera nabarmena izango du, 4 GW 2015ean eta 44 GW 2035ean, eta 2030etik aurrera lehorreko zein itsasoko proiektuak garatuko dira. Gainera, hidrogenoa sektore estrategikotzat azaleratzen ari da, eta 2050ean 23.890 ktpa-ko eskaria izan dezake, zati garramtzitsu bat esportaziora bideratuz. Testuinguru honetan, turbinetarako osagaien fabrikazioan, ingeniaritzan eta hidrogenorako azpiegitura eta logistika soluzioetan espezializatutako euskal enpresek negozio-aukerak aurki ditzakete herrialde hartan.
Elektrizitatearen transmisioa eta banaketa
2050era bitarte transmisio-azpiegituren 10.000 km beharko direla aurreikusten da
Australiako elektrizitate-sarearen modernizazioa ere intereseko eremua da. Energia-eskariaren hazkundeak, energia berriztagarrien integrazioak eta garraioaren elektrifikazioak inbertsio-planak bultzatzera behartu dute Australiako gobernua, hala nola, “Rewiring the Nation” programa, ia 20.000 milioi dolarrekoa, edo “Integrated System Plan” delakoa, 2050era arte transmisio-azpiegitura berrien 10.000 kilometro eraikitzea aurreikusi duena.
Ekimen horiek aukerak ekar ditzakete osagaien horniduran, laguntza teknikoan eta EPC proiektuen gauzatzean diharduten enpresentzat.
Gailu medikoak eta Australiako osasun-sistemak
Australian, osasungintzako gastua handi samarra da, eta azken urteotan gora egin du, % 21 handitu baita 2022 eta 2023 artean.
Australiako osasun-sistemak osasun-estaldura unibertsaleko eredu bati jarraitzen dio, eta gobernu federalaren eta estatu, lurralde eta tokian tokiko gobernuen arteko elkarlanak bideratzen du. Medicare sistemak osasun-zerbitzu gehienak doan edo kostu txikian eskuratzeko aukera ematen die australiarrei, eta osasun-aseguru pribatuek aukera gehigarriak ematen dituzte. Sistema arreta segurua, eraginkorra eta eskuragarria emateko moduan egituratuta dago. Osasungintzako profesionalen sare handi batek dihardu bai osasun fisikoko zerbitzuetan, bai osasun mentalekoetan.
Medikuntzako gailuen merkatua ere herrialdean etengabeko hazkundean dagoen beste sektore bat da, eta % 7ko urteko igoera aurreikusi zaio, 2028an 9.200 milioi dolarrera iritsi arte. Igoera hau tratamenduen arloko berrikuntzak eta osasun-sektorean egindako inbertsioen hazkundeak bultzatu dute, eta honek gero eta eskaera handiagoa eragin du osasun-ekipamenduaren esparruan. Ildo horretan, merkatu-nitxoak daude medikuntza-fluidoen ekoizpenean, erabilera bakarreko tresna laparoskopikoetan, hemostasia-produktuetan, zigilatzaileetan eta zauriak zaintzeko materialean. Era berean, osasun-arloko soluzio digitalen gorakadak urruneko monitorizazio-gailu eta telelaguntza-plataformen garapena erraztuko du, eta euskal industriak teknologia aurreratua gehi dezake eremu horietan
Tren-sektorea Australian
Trenbideen arloan, Australiak munduko sarerik zabalenetakoa du, eta herrialdea azpiegitura-proiektu garrantzitsuetan murgilduta dago, Sydneyko metroa, Inland Rail eta Melbourne Suburban Rail Loop kasu. Ekimen horien helburua hiriko trenbide-sareak zabaldu eta modernizatzea da, garraio-gaitasuna hobetuz eta sistema automatizatuak txertatuz.
Australiako trenbide-industria, neurri handi batean, teknologia eta osagai aurreratuen inportazioaren mende dago, eta hau benetako aukera izan daiteke seinaleztapenean, trenbide-kontrolean eta trenak kontrolatzeko Europako sistemarekin (ETCS) bateragarria den gurpildun materialaren fabrikazioan esperientzia duten euskal enpresentzat.
Hemen ere eska dezakezu txosten osoa.
Zerikusia duten beste txosten batzuk:
- BT&I-ren Nazioarteko Behatokia: Munduko ekonomiko-egoeraren hiruhileko azterketa
- BT&I-ren Lehengaien Nazioarteko Behatokia
- BT&I-ren Nazioarteko Merkataritzaren Behatokia
- Energia Eolikoaren Behatokia: merkatuaren azterketa eta euskal enpresentzako aukerak
- T&D Behatokia: Munduko Energiaren Transmisio eta Banaketako merkatuari buruzko azterketa
- Aukera-sektoreak Kanadan
- Aukera-sektoreak Japonian
- Aukera-sektoreak Alemanian
Lotutako albisteak
AEBko industria aeroespaziala: hazkundea eta erronkak
AEBko merkatu aeronautikoak oso erakargarria izaten jarraitzen du, eta etengabe handitzen ari da, bidaiarien eta merkantziaren trafikoaren gorakada dela eta. Aukera handiak daude teknologia berritzaileak eskaintzen dituzten euskal enpreseentzat; bereziki, erregaiaren eraginkortasunean eta isurpenen murrizketan zentratuta dauden horientzat.
Lehengaien Nazioarteko Behatokia 2025ean petrolioaren prezioa progresiboki murriztuko dela aurreratu du Lehengaien Behatokiak
Basque Trade & Investmentek Estatu Batuen muga-zergek eta Txinako ekonomiaren dezelerazioak merkatu global honetan izango duten eragina aztertu du azken Behatokian.
Indiako automozioa: Indiak hub estrategikotzat duen posizioa indartu du automobilgintzako industria globalean
Basque Trade & Investmenten azken txostenak Asiako herrialde horretan jarduteko interesa duten euskal enpresek aurki ditzaketen aukerak eta erronkak aztertu ditu.
Argentinako Vaca Muerta hobian, 35.500 milioi dolarreko inbertsioak aurreikusi dira datozen urteetarako gas naturalaren arloan
Basque Trade & Investmentek merkatu horrek eskaintzen dituen aukerak aztertu ditu bere azken ohar teknikoan, izan ere, mundu osoko mailan shale oil eta shale gas delakoen erreserbarik handienetakoa da.
T&D Behatokia S2 2024: Europa, Estatu Batuak eta Indiaren dinamismoak aukera berriak ireki ditu Transmisio eta Banaketaren sektorean
Transmisio eta Banaketan (T&D) espezializatutako euskal enpresek eskuragarri dute dagoeneko sektore honen joerak eta aukerak aztertzen dituen Behatokiaren laugarren edizioa. Txostena Basque Trade & Investment (BasqueTrade) SPRI Taldeari atxikitako euskal enpresen nazioartekotze-agentziak argitaratu du, eta sektorea sei hilean behin monitorizatzen duen azterketa sakona eskaintzen du aukera globalak identifikatzeko, lehiakortasuna indartzeko...