Basque Trade & Investment, SPRI Taldeko Nazioartekotzeko Euskal Agentziak txosten bat argitaratu du Txinako abiazio zibilaren industriari buruz.

Pronostikoa itxaropentsua da abiazio industriarentzat, hiru urtez jarraian galerak izan ondoren. Aurreikusten da datozen hamabost urteetan 74.500 hegazkin beharko direla mundu mailan erabilera zibilerako, kopuru horren barruan sartzen direlarik bidaiarien hegazkin komertzial handiak, eskualde mailako hegazkinak, negozioetarako jet-ak eta abiazio orokorrerako hegazkin txikiak. Eskaera horren zati handiena Txinatik etorriko da, Txinak aurrea hartuko baitie AEBei, abiazioko merkatu handiena bilakatuko delarik.

Produkzioari dagokionez, Txinak ahalegina egiten jarraitzen du bere menpekotasuna gutxitzeko estatu-inbertsio handiak dituzten atzerriko enpresekiko, bide horretatik, bidaiari-hegazkinak ekoizteko duen gaitasun nazionala handitzeko eta kate industrial propio bat garatzeko. Hala, tokiko katea eboluzionatzen ari da, eta lehen fuselajearen oinarrizko azpi-zatiak fabrikatzen zituen bezala orain balio erantsiko osagaiak ekoizten ditu, hala nola hegazkinen barnealdeak, zati elektronikoak, konposatuak eta pieza mekaniko kritikoak. Halere, Txina oraindik mendebaldeko teknologiaren mende dago motor eta sistemen arloan.

Txinako fabrikatzaile nagusiak, COMAC enpresak, bi programa ditu hegazkin komertzialak ekoizteko, ARJ21 eta C919 izenekoak. Bigarrena A320neo eta 737 MAX familien lehiakidea da eta lortu ditu jada behar dituen ziurtagiriak, urrats garrantzitsua baita hori Txinaren autosufizientzarako.

Kontuan izanik Txinako abiazio merkatuaren potentzial erraldoia eta Txinaren plan anbiziotsua abiazio nazionalaren industria garatzeko, fabrikazio lokalizatua aukera paregabea da nazioarteko enpresentzat, baina ez bakarrik hegazkin zibil handien industrializazioaren arloan, baizik eta baita ere beste nitxo batzuetan, nola baitira helikopteroak, eVTOL/UAM hegazkinak, edo mantenimendu, konponketa eta berrikuspenen merkatua (MRO).

Halere, ez da erraza Txinan sartu eta operatzea. Enpresek denbora eta baliabideak inbertitu behar izaten dituzte harremanak sortzeko txinatarrekin, eta funtsezkoa da lehen eskuko esperientzia izatea. Txinan aritu nahi duenak epe luzeko apustua egin behar du eta epe luzeko inbertsioak aurreikusi behar ditu, arrisku maila altu batekin, baina merkatu hori garapen-une erabakigarri batean dago eta oraindik ibilbide luzea geratzen zaio egiteko.

Txosten osoa (barne direla hegazkinen produkzio arloko aurreikuspenak, agente garrantzitsuenen identifikazioa, balio-kateen analisia eta “hub” edo produkzio-gune desberdinen ezaugarriak) eskuragarri dago eskatzen duten euskal enpresa guztientzat. Txostena jasotzeko, email bat bidali behar da helbide honetara: ilopez@basquetrade.eus

Nahi baduzu, deskargatu HEMEN Laburpen Exekutiboa. 

Lotutako albisteak

28 ekaina, 2024 Basque Trade & Investment

Kanadako sektore aeroespaziala hazkunde-bidera itzuli da eta indarra berreskuratu du

Irakurri gehiago

13 ekaina, 2024 Basque Trade & Investment

BasqueTraderen Nazioarteko Merkataritzaren Behatokiak aurreratu duenez, munduko merkataritza % 2,5 hobetuko da 2024an

Irakurri gehiago

6 ekaina, 2024 Basque Trade & Investment

Industria aeroespaziala eta energia berriztagarriak, Euskadirentzat aukera gehien duten Kanadako sektoreen artean

Irakurri gehiago

23 maiatza, 2024 Basque Trade & Investment

Basque Trade-ren Nazioarteko Behatokiak 2024rako munduko hazkunde ekonomiko egonkorra aurreikusten du, %2,4 ingurukoa

Irakurri gehiago

16 maiatza, 2024 Basque Trade & Investment

Basque Trade behatokiak energia eoliko flotatzailearen munduko merkatuaren hazkunde esponentziala aurreikusten du

Irakurri gehiago

Joan blog-era