Euskadiko Nazioartekotze Agentziak 10 enpresa babestuko ditu Indian eta Txekiar Errepublikan egingo diren bi azokatan
Erakunde publikoak stand propioak izango ditu energiaren eta industriako makineriaren inguruko azoka horietan
SPRI Taldean integratutako Euskadiko Nazioartekotze Agentziak (Basque Trade and Investment) euskal enpresei laguntzen jarraitzen du. Datozen hiru asteetan hamar enpresarekin egongo da Indian eta Txekiar Errepublikan egingo diren bi azokatan, bata energiari buruzkoa eta bestea industriako makinen ingurukoa.
Lehenengoa irailaren 18tik 20ra egingo da New Delhi hirian (India). Renewable Energy India du izena eta huts egin ezinezko hitzordu bihurtu da Asia-Pazifiko eskualdean, eremu horretatik iritsiko direlarik 30.000 bisitari. India eta Asia hegoaldeako azoka handiena da, eta bere hamabigarren edizioa beteko du aurten.
Euskadiko Nazioartekotze Agentziak 48 m2ko stand bat izango du eta sektoreko bost euskal enpresa bilduko dira bertan: Arteche, Idom, Laulagun, Nem Solutions eta ZIV. Agentziak foileto bat inprimatuko du konpainia parte-hartzaileei buruz informatzeko pabiloira hurbiltzen diren bisitari guztiei. Iaz 711 erakuslek parte hartu zuten, horietatik %52 nazioartekoak eta %48 bertakoak. 45 herrialdetako 30.000tik gora bisitari bildu ziren.
Bigarren ekitaldia, Brno hiriko makina industrialen nazioarteko azoka, urriak 1etik 5era egingo da Txekiar Errepublikan. Ekitaldiak 60 urte beteko ditu aurten, eta Alemaniakoa kenduta, Europa erdialde eta ekialdeko azoka industrial garrantzitsuena da.
Euskadiko Nazioartekotze Agentziak 50 m2ko stand bat izango du, non sektoreko bost euskal enpresa bilduko baitira: Abrasivos Unesa, Agme, Fresmak, Laip eta Pick to Light. Iaz 32 herrialdetako 1.631 erakuslek parte hartu zuten azoka horretan, eta ia 81.000 bisitari hurbildu ziren 60 herrialdetatik. 2018ko edizioa ardatz hauen inguruan egituratuko da: industriaren automatizazioa, makina-erremintaren sektorerako teknologiak, galdaragintza, plastikoa, soldadura eta azaleren tratamendua.
Euskadiko Nazioartekotze Agentziak euskal enpresei laguntzen jarraituko du datorren urtean, eta 2019rako bere jarduera-planaren arabera hainbat azokatan parte hartuko du euskal enpresekin batera.
Euskadiko Nazioartekotze Agentzia aurten sortu da Eusko Jaurlaritzak arlo horretan dauzkan gaitasunak eta aktiboak integratu eta sendotzeko, eta bere ekintzaren eraginkortasuna, kalitatea eta irismena hobetzeko. Nazioartekotze arloko programa eta zerbitzuen arteko bereizketa funtzionala desagerraraziko da horrela, enpresen premia zehatzei hobeto egokituz.
Lotutako albisteak
Euskal sektore aeroespazialak loturak estutu ditu Estatu Batuetako industriarekin
Euskadiko enpresa eta zentro teknologikoen ordezkaritza batek Estatu Batuak bisitatu ditu sektorearen egungo egoera ezagutu eta herrialdeko eragile estrategikoekin harreman berriak finkatzeko
Euskadik nazioarteko estrategia indartu du Bruselan
Basque Trade & Investmenten ordezkaritza batek Belgikako hiribururako misioa egin du aste honetan, Europar Batasuneko politiken, finantzaketa-mekanismoen eta hainbat sektoretako negozio-aukeren ezagutzan sakontzeko
Imanol Pradales: “Bizi dugun une historikoan, munduak eskaintzen dizkigun aukera guztiak aprobetxatzen jarraitzeko erabakia eta anbizioa dugu, baita Estatu Batuetan ere”
Sektore aeroespazialeko hainbat euskal enpresatako ordezkariekin eta Basque Trade & Investment (BT&I) Agentziaren ordezkari batzuekin elkartu da Imanol Pradales Lehendakaria, Washingtonen
Euskadik Brasilgo itsas-sektore eolikoko erakunde nagusiak hartu ditu hango merkatuaren garapena bultzatzeko misioan
Flanders Investment & Trade eta Euskadiko Energia Klusterraren lankidetzaz antolatutakoa
TH Company, munduko liderra arrantza sektorerako makinetan Mungiatik
Mundu osoko 500 atunketari baino gehiagok dute enpresa horren teknologia eta % 75eko merkatu-kuota du.