Euskal ETEek garapen iraunkorra aplikatzeko gida aurkeztu da
Nazioartekotzeko Euskal Agentziak antolatutako jardunaldi batek Eusko Jaurlaritzak 2030eko agenda inplementatzeko abian duen ekimena azaldu du
220 euskal konpainia enpresen jardunbide egokiak kudeatzeko plataformaz baliatu dira dagoeneko
2030eko agendaren aplikazioa “baliagarria da gizartearentzat eta enpresentzat ere bai”, adierazi du Rubén Carricondo Munduko Itunaren Espainiako Sarearen iraunkortasunari buruzko azterketa arloko arduradunak
Euskal enpresa txiki eta ertainek garapen iraunkorreko ekintzak ezartzeko eta planeta osoan garapen iraunkorra bultzatzea xede duen 2030eko agenda nazioarteko proiektua aurrera ateratzen laguntzeko gida eskuragarri dute dagoeneko. SPRI Taldeari atxikitako Nazioartekotzeko Euskal Agentziak ostegun honetan Bilbon antolatu duen jardunaldi batek enpresek jardunbide egokiak gauzatzeko jarraitu beharreko pausoak azaldu ditu.
Topaketaren irekieran, Iñaki Ezkurra Enpresen Nazioartekotzeko zuzendariak ezagutzera eman du, euskal enpresei laguntzeko programetan erakundeak garapen iraunkorra ezartzeko egin duen lana. Ildo horretan, Kolonbiako lizitazioetarako euskal plataformak garapen iraunkorra bultzatzeko gauzatutako bi kasu aipatu ditu. Lehenengoa, Ozeano Barearen aldeko Kolonbiako euskaldeen eta gainerakoen arteko garapen-etena murrizteko proiektua izan da, eta bigarrenak Kolonbiako gerrillarekiko gatazkak kalteturiko eremuak izan ditu ardatz.
Erronken artean, honako hauek aipatu ditu: enpresek garapen iraunkorrarekin duten lerrokapena hobetzea, euskal esportazioek helburuko herrialdeetan garapen iraunkorra ezartzen laguntzeko egindako ekarpena ezagutzea eta euskal kanpo-merkataritzak agenda herrialde horietan inplementatzeko prozesuetan duen eragina kuantifikatzea.
Leyre Madariaga Eusko Jaurlaritzako Kanpo Harremanetako zuzendariak esan duenez, gai hau 2016az geroztik lantzen ari da, eta Iñigo Urkullu lehendakariak 2030eko agenda 2018ko apirilean aurkeztu zuela gogoratu du. Ekimena euskal enpresei helarazteko plana hiru euskal patronalen bitartez sortu zen, Munduko Itunaren Espainiako Sarearen lankidetzaz, eta joan den martxoan abiarazi zen jardunbide egokiak identifikatu eta aplikatzeko kudeaketa-plataforma baten elaborazioarekin. “Sektore pribatuaren mobilizazioa funtsezkoa da”.
Madariagak azaldu duenez, urriaren hasieran, 220 enpresak 2030eko agenda kudeatzeko gida eskuratu dute, “eta 40k prestakuntza amaitu dute”.
Negozio aukera
Rubén Carricondo Munduko Itunaren Espainiako Sarearen iraunkortasunari buruzko azterketa arloko arduradunak argitu duenez, Euskadin garatutako gida “autonomia-erkidego batekin landu dugun lehenengo pilotua da”. Haren hitzetan, egun, 736 milioi pertsona muturreko pobrezian bizi dira, “baina 2000an egoera horretan 1.600 milioi pertsona zeudela kontuan hartzen badugu, aurrera egin dugula esan dezakegu”. Aldiz, 1990az geroztik, isurpen kutsagarriak % 50 gehitu direla adierazi du. Horren harira gogoratu du, 2015eko irailaren 25ean 17 helburu eta 169 helmuga bilduz onartu zen 2030eko Agendaren arabera, 2030erako munduan ez litzatekeke pertsona bakar bat ere muturreko pobrezian egon behar.
“Hau baliagarria da gizartearentzat eta enpresentzat ere bai, izan ere, jardunbide egokiak gure jardueran txertatzea lortu nahi dugu”, adierazi du, eta jarraian, “2030era arte 12 bilioi dolar ere sorraraz dezaketen garapen iraunkorrari lotutako 60 negozio-aukera” identifikatu direla ziurtatu du.
Carricondoren esanetan, IBEX 35eko enpresen % 31k “hornitzaileekiko kode etikoa du, eta % 63k alderdi sozialen eta giza-eskubideen araberako ebaluazioa egiten die”.
Euskadin martxoan abiarazi den kudeaketa-plataformari dagokionez, 400 jardunbide egoki baino gehiago bildu direla adierazteaz gain, behar bezala erabiltzeko modua argitu du. “Garapen iraunkorreko helburuak zehaztu ondoren, ebaluatu egin behar ditugu. Gero, denbora-muga duten helburu kuantifikagarriak finkatu behar dira. Helburua ez da soilik konpromisoa hartzea, ekintzara igarotzea baizik. Eta garrantzitsua da egindako lanaren berri izatea”.
Lotutako albisteak
Euskal sektore aeroespazialak loturak estutu ditu Estatu Batuetako industriarekin
Euskadiko enpresa eta zentro teknologikoen ordezkaritza batek Estatu Batuak bisitatu ditu sektorearen egungo egoera ezagutu eta herrialdeko eragile estrategikoekin harreman berriak finkatzeko
Euskadik nazioarteko estrategia indartu du Bruselan
Basque Trade & Investmenten ordezkaritza batek Belgikako hiribururako misioa egin du aste honetan, Europar Batasuneko politiken, finantzaketa-mekanismoen eta hainbat sektoretako negozio-aukeren ezagutzan sakontzeko
Imanol Pradales: “Bizi dugun une historikoan, munduak eskaintzen dizkigun aukera guztiak aprobetxatzen jarraitzeko erabakia eta anbizioa dugu, baita Estatu Batuetan ere”
Sektore aeroespazialeko hainbat euskal enpresatako ordezkariekin eta Basque Trade & Investment (BT&I) Agentziaren ordezkari batzuekin elkartu da Imanol Pradales Lehendakaria, Washingtonen
Euskadik Brasilgo itsas-sektore eolikoko erakunde nagusiak hartu ditu hango merkatuaren garapena bultzatzeko misioan
Flanders Investment & Trade eta Euskadiko Energia Klusterraren lankidetzaz antolatutakoa
TH Company, munduko liderra arrantza sektorerako makinetan Mungiatik
Mundu osoko 500 atunketari baino gehiagok dute enpresa horren teknologia eta % 75eko merkatu-kuota du.