Eusko Jaurlaritzak bulegoa inauguratu du Milanen, eta Alessandro Mattinzzoli Lonbardiako Ekonomiaren Garapeneko ministroarekin batu da
Bulegoa funtsezkoa izango da, euskal enpresek Italian duten presentzia sendotzeko
Arantxa Tapia sailburuak Euskadiko eta Italiako industriek dituzten antzekotasunak nabarmendu ditu, bai eta makina-erremintaren edo aeronautikaren sektoreetan sinergiak batzeko aukerak ere
Milango bulegoa Nazioartekotzeko Euskal Agentziaren nazioarteko sarearen hamazazpigarrena da, SPRI taldearen barruan
Gaur inauguratu da, goizeko 11.30ean, Milango bulegoa; Arantxa Tapia Ekonomiaren Garapeneko eta Azpiegituretako sailburua, Javier Zarraonandia Industriako sailburuordea, Ainhoa Ondarzabal Nazioartekotzeko Euskal Agentziako zuzendaria eta Ainara Isasa Milango bulego berriaren zuzendaria izan dira inaugurazio-ekitaldian. Horiekin batera, Alessandro Matinzzoli Lonbardiako Ekonomiaren Garapeneko ministroa, PROMOSeko (Milango Merkataritza Ganbera) ordezkariak eta Italian presentzia duten euskal enpresen ordezkariak ere izan dira.
Ekitaldian, sailburuak Euskadiren indarguneak aurkeztu ditu eta Euskadik eta Italiak dituzten antzekotasunak nabarmendu ditu, bai eta, besteak beste, makina-erremintaren edo aeronautikaren sektoreetan egon daitezkeen sinergiak ere.
Italia, lehentasunezko herrialdea
Urrutiko merkatuek, besteak beste Ameriketako Estatu Batuek edo Txinak, eskaintzen dituzten aukerez gainera, Europak jarraitzen du Euskadirako merkaturik garrantzitsuena izaten. Alemanian, Frantzian, Erresuma Batuan eta Italian daude gaur egun Euskadiko enpresen harreman gehienak.
Italia azken urteotako euskal esportazioen helmuga diren herrialdeen rankinean 4. eta 6. postuaren bitartean dago, Frantziaren eta Alemaniaren ondoren eta Erresuma Batuarekin eta Herbehereekin txandakatzen, eta BPGd-aren bolumenaren arabera munduko lehen hamar herrialdeen artean dago. Italiaren industria-jarduera, batik bat, iparraldean kontzentratzen da (Milan, Turin eta Venezia); Italiak kultura esportatzaile handia du, eta puntako teknologia du besteak beste makina-erremintaren, automobilgintzaren eta Pharmaren sektoreetan, eta, nahiz eta eremu askotan industria Euskadikoaren antzekoa den, sinergiarako aukera nabarmena da aeronautikaren, biotech-en, fabrikazio aurreratuaren edo robotikaren sektoreetan.
Italia, gainera, Europar Batasuneko nekazaritza-ahalmen garrantzitsuenetako bat da, eta Lonbardia eskualdearekin Euskadik tradizioan harreman estua izan du, elikaduraren eremuan. Euskadik eta Lonbardiak biek ulertzen dute nekazaritzako elikagaien sektoreak eta, bereziki, tokiko produktuekin lotura duen elikagaien industriak hazkuntza-aukerak eskaintzen dituztela, lehen sektorearen garapen dibertsifikatuagoarekin eta orekatuagoarekin.
Bilera Mattinzzoli ministroarekin
Tapia sailburua Lonbardiako Alessandro Mattinzzoli homonimoarekin batu da, inaugurazioaren ondoren, eta bi erakunde-arduradunek izan dute beren eskualdeak batzen dituzten gaiak egiaztatzeko aukera.
Eusko Jaurlaritza eta Lonbardiako Gobernua kide dira Vanguard ekimenean, industrializazio-maila altuko Europako eskualdeen sarean, eta Europa industrializatua eraikitzeak duen garrantzia zabaltzeko lanean ari dira.
Tapia eta Mattinzzoli, halaber, Espainiako eta Italiako estatuetako gobernuetako egoera politikoez eta gertatu berri diren aldaketez mintzatu dira, eta sailburuak nabarmendu du Euskadin egonkortasunerako bide ematen duten politikak ezartzen jarraituko direla, ekonomiarako funtsezko faktore baita.
Bidaia agenda Milanen
Euskadiko erakunde-ordezkaritzak, bihar goizean, topaketa izango du Italian finkatuta dauden euskal enpresekin, eta Italiako merkatura sartzeko erronkak eta zailtasunak, herrialdearen egoera ekonomikoa eta enpresek epe ertainera dituzten ikuspegiak aztertuko dituzte, bai eta Eusko Jaurlaritzak egin ditzakeen laguntza-ekintzetarako aukerak ere.
Bihar, asteazkenean, hilaren 20an, gauean, ordezkaritzak ekitaldi gastronomikoan parte hartuko du; bertan, euskal nekazaritzako elikagaiak sustatuko dira, goi-sukaldaritzaren sektorean, eta, ostegunean, ordezkaritza Bistagnora joango da, Piamonteko eskualdera, Danobaten instalazio berriaren inauguraziora joateko.
Lotutako albisteak
Euskal sektore aeroespazialak loturak estutu ditu Estatu Batuetako industriarekin
Euskadiko enpresa eta zentro teknologikoen ordezkaritza batek Estatu Batuak bisitatu ditu sektorearen egungo egoera ezagutu eta herrialdeko eragile estrategikoekin harreman berriak finkatzeko
Euskadik nazioarteko estrategia indartu du Bruselan
Basque Trade & Investmenten ordezkaritza batek Belgikako hiribururako misioa egin du aste honetan, Europar Batasuneko politiken, finantzaketa-mekanismoen eta hainbat sektoretako negozio-aukeren ezagutzan sakontzeko
Imanol Pradales: “Bizi dugun une historikoan, munduak eskaintzen dizkigun aukera guztiak aprobetxatzen jarraitzeko erabakia eta anbizioa dugu, baita Estatu Batuetan ere”
Sektore aeroespazialeko hainbat euskal enpresatako ordezkariekin eta Basque Trade & Investment (BT&I) Agentziaren ordezkari batzuekin elkartu da Imanol Pradales Lehendakaria, Washingtonen
Euskadik Brasilgo itsas-sektore eolikoko erakunde nagusiak hartu ditu hango merkatuaren garapena bultzatzeko misioan
Flanders Investment & Trade eta Euskadiko Energia Klusterraren lankidetzaz antolatutakoa
TH Company, munduko liderra arrantza sektorerako makinetan Mungiatik
Mundu osoko 500 atunketari baino gehiagok dute enpresa horren teknologia eta % 75eko merkatu-kuota du.