Deustuko Unibertsitateko nazioarteko ikasleek euskal industriaren eta teknologiaren errealitatea ezagutuko dute SPRI taldeari esker

SPRI taldeak, gaur, osteguna, Bilbon egingo die harrera 2019-2020 ikasturteko lehenengo hiruhilekoa Deustuko Unibertsitatean ikasiko duten nazioarteko ikasleei. Bihar, ostirala, Donostian egingo diete harrera.

Euskal kultura ezagutzeaz eta Euskadin turismoa egiteaz gain, ingeniaritza eta enpresen alorreko ikasleek —ehun baino gehiago— aukera izango dute euskal industriaren errealitatea gertutik ezagutzeko, zeina lehiakortasunaren eta berrikuntzaren poloa den. Etorkizunean, halaber, karrera profesionala ere hemen garatu ahal izango dute.

Euskadin dugun industria-kontzentrazio altua ezagutuko dute. Hain zuzen ere, BPGd-ren % 25 baino gehiago izatera iristen da oso nazioartekotuta dauden industria-sektore aitzindariekin, besteak beste, automobilgintza, aeronautika, energia, trenbide, makina-erreminta edo biozientzietako klusterrekin.

Horrez gain, fabrikazio aurreratuaren, energiaren eta biozientzien alorretan Euskal Autonomia Erkidegoak Europan duen espezializazio adimendunaren berri izango dute, bai eta teknologia- eta berrikuntza-zentroetako berrikuntza- eta teknologia-egituraren, Europan aitzindaria den berrikuntza digitaleko poloaren, Basque Industry 4.0 estrategiaren eta ekintzailetza-politika aurreratuaren edo Bind 4.0 programa arrakastatsuaren berri ere. Amaitzeko, euskal parke teknologikoen sarea ezagutuko dute, berrikuntzarako ekosistemak ere badirenak, non 20.000 profesional kualifikatu inguruk teknologikoki aurreratuak diren 550 enpresatan lan egiten duten.

Zenbait herrialdetako unibertsitateekin adostutako hartu-harremanetarako programen bitartez, ikasleak sei hilabete egongo dira Deustuko Unibertsitatean ikasten. Hain zuzen ere, herrialde hauetako ikasleak hartuko ditugu: Argentina, Austria, Belgika, Brasil, Bulgaria, Kanada, Txile, Txina, Kolonbia, Korea, Kroazia, Danimarka, Ekuador, Eslovakia, Ameriketako Estatu Batuak, Filipinak, Finlandia, Frantzia, Grezia, Hungaria, Irlanda, Italia, Japonia, Kazajistan, Letonia, Maroko, Mexiko, Herbehereak, Polonia, Peru, Erresuma Batua, Txekiar Errepublika, Errusia, Suedia, Suitza, Taiwan eta Turkia.

Aukera honi esker, nahi izanez gero, Euskadi hartuko dute kontuan unibertsitatean prestakuntza jaso ondoren profesionalki garatzeko, bai enpresetan, bai euskal teknologia-zentroetan. Horrez gain, hemen enpresak garatzeko aukera izango dute Euskadin ekintzailetzari eskaintzen diogun babesari esker.