Nazioartekotzeko Euskal Agentziak Taiwango negozio aukerak azalduko ditu
Nazioartekotzeko Euskal Agentziak (Basque Trade &Investment) jardunaldi bat antolatu du datorren uztailaren 20rako, bertatik bertara aztertzeko euskal enpresek Taiwanen dituzten negozio aukerak. Ekitaldian hizpide hartuko dira energia berriztagarri, mugikortasun eta bioteknologia sektoreak. Izen-ematea tramitatzeko posta elektroniko bat bidali behar da info@basquetrade.eus helbidera.
Jardunaldia Bilbon egingo da, presentziala izango da, eta aztergai izango dira Taiwanek euskal enpresarientzat eskaintzen dituen sektore interesgarrienetako aukerak eta jardunbide egokiak, euskal enpresek aukera izan dezaten Taiwanen merkatua irekitzeko eta enpresa-trukerako harremanak sortzeko. Nazioartekotzeko Euskal Agentziako kontseilari delegatu Ainhoa Ondarzabalek irekiko du jardunaldia, eta bertan izango dira Taipeiko Ekonomia eta Kultura Bulegoko kide bat, eta baita ere hainbat enpresatako ordezkariak. Enpresa horiek balioan jarriko dituzte Euskadi eta Taiwanen arteko harreman komertziala areagotzera bideratutako kudeaketa-gaitasunak.
Energia berriztagarriei dagokienez, Taiwanek energia sektorea berregituratzeko eta energia berriztagarriak bultzatzeko proiektu bat abiarazi du, arreta berezia eskainiz on- eta off-shore energia eolikoari, energia fotovoltaikoari eta eguzki energia termikoari. Taiwaneko gobernuak helburutzat du zentral nuklearrak ixtea 2025erako, 2005eko isuri maila % 20 murriztea 2030erako eta % 50 2050erako, energia merkatua berehala liberalizatzea, eta eguzki energiaren 20 GW eta energia eolikoaren 6 GW instalatzea. Horretarako, 50.000 milioi eurotik gorako inbertsioak aurreikusi ditu hemendik eta 2025era.
Inbertsio-proiektu handiak egingo dira baita ere mugikortasun sektorean, bereziki metroan, hiru proiektu handi aurreikusi baitira hemendik eta 2030era bitartean. Era berean, Taiwanek bere burdinbideak erabat berritzeko proiektu bat bultzatu du, eta hirugarren eraikuntza faseari ekingo dio laster (Railway Reconstruction Bureau fase hori planifikatzen ari da oraindik).
Azkenik, aukera asko daude orobat bioteknologia arloan. Biztanleria oso zahartua duelarik, Taiwango merkatua munduko lehen 25en artean dago balioari dagokionez, eta menpekotasun handia du inportazioekiko, nahiz eta gobernuak eginahalak egin dituen bertako industria garatzeko. Ekipamendu mediko, kirurgiko, ortopediko, odontologiko edo oftalmologikoen balio-kateak lankidetza-aukera interesgarriak eskaintzen ditu balio erantsi handiko ekipamendu medikoen garapenerako.
Lotutako albisteak
Euskadik Brasilgo itsas-sektore eolikoko erakunde nagusiak hartu ditu hango merkatuaren garapena bultzatzeko misioan
Flanders Investment & Trade eta Euskadiko Energia Klusterraren lankidetzaz antolatutakoa
Hazinnovaren eskutik Estatu Batuetan haztea du helburu Rob-Jor enpresak
Manikurako eta pedikurako produktuak fabrikatzen dituen enpresa arabarra industria mota horretako fabrikatzaile europar bakarrenetakoa da, eta berrikuntzaren eta pertsonalizazioaren alde egiten du Asiako lehiakortasunaren aurka borrokatzeko.
TH Company, munduko liderra arrantza sektorerako makinetan Mungiatik
Mundu osoko 500 atunketari baino gehiagok dute enpresa horren teknologia eta % 75eko merkatu-kuota du.
Soldaduraren balio-kateari buruzko azokaren, UNIREren, bigarren edizioa egingo dute Ficoban
Sektore horrek Estatu osoan egiten duen kongresu bakarra martxoaren 18 eta 19an izango da
Kanpo merkataritzari buruzko prestakuntza behar duzu? Eman izena lehenbailehen nazioartekotzeko BEINT beketan
Programak 3,6 milioi euroko aurrekontua du eta bi urtez prestakuntza ematen die 30 urtetik beherako gazteei, kanpo merkataritzan espezializatu daitezen euskal enpresa eta erakundeen premiei erantzuteko. Eskaerak egiteko epea zabalik egongo da martxoaren 7tik apirilaren 10era.