Txinako sektore automotrizaren hazkundea Europan: Euskadiko enpresentzako erronka

BasqueTradek Txinako fabrikatzaileen inpaktua aztertzen du Europako automobilgintzan, baita Euskadiko enpresentzat dakartzan aukerak eta erronkak ere.

Basque Trade & Investment (BasqueTrade) da Euskadiko enpresak nazioartekotzeko agentzia eta txosten bat argitaratu du txinatar fabrikatzaileek Europako automobilgintzan egiten duten inbertsioaren gorakada aztertzeko.

Dokumentu honen helburua da egungo panorama eta azken urteotako jazoera nagusiak islatzea. Chery, Geely eta BYD markak izan dira besteak beste liderrak eta Europako merkatu automotriza eraldatzen ari dira.

Txinatar fabrikatzaileen hedapena Europan

Txostenak nabarmentzen du kostu baxuko produktuak sustatzeko politiken ondorioz Txinako OEMak Europan sartu izana erronka handia dela Europako fabrikatzaile tradizionalentzat. Enpresa gero eta handiagoen presentziak lehiakortasun handia dakar, hala nola Geelyk Volvo marka erosi du eta BYDk ekoizpen-instalazioak ezarri ditu Hungarian eta Turkian. Gainera, NIO eta Xpeng marka berriak lider jartzen ari dira ibilgailu elektrikoen sektorean eta horrek are gehiago zailtzen du egoera Europako ibilgailuen fabrikatzaileentzat.

Txinako OEMen hedapen-planen barruan hainbat estrategia daude. Tartean, fabrikazio-instalazio berriak zabaltzea, BYDren kasuan bezala, edo dagoeneko existitzen diren fabrikak erostea edo berregokitzea, Cheryk egin duen moduan. Beste taktika garrantzitsu bat da ibilbide eta ospe handia duten Europako fabrikatzaileengan inbertitzea, Geelyk egin duen moduan. Halaber, Txinako OEMak banaketa-sareak sortzen eta indartzen ari dira Europan, bai establezimendu propioak, bai tokiko banatzaileekiko hitzarmenak erabiliz. Horrek Europako merkatura are azkarrago eta modu eraginkorragoan sartzeko aukera ematen die.

Txinako ibilgailuen salmentetan eta ekoizpenean aurreikusitako hazkundea

2031n, Txinako autoen fabrikatzaileek bigarren lekua izango dute Europako merkatuan, % 12ko kuotarekin.

Txinako automobilen salmenta eta ekoizpena asko handitzea aurreikusten da Europan. Txinako fabrikatzaileen ibilgailu arinak 2,11 milioi unitatera iristea espero da 2031rako. Horrek esan nahi du urtean % 7ko hazkundea izango dela 2024 eta 2031 artean. Hazkunde horrekin, Txinako OEMak bigarren lekuan egongo dira Europako merkatu-kuotari dagokionez eta % 12ra iritsiko dira.

Halaber, 2031n, Txinako fabrikatzaileek Europako instalazioetan ekoitzitako ibilgailu arinen kopurua 1,1 milioi unitatetik gorakoa izango da, eta Suedia eta Belgika nabarmenduko dira ekoizpenean. Geely izango da liderra ekoizpenean, eta, gero, BYD eta Chery, instalazio berriak zabaltzeko planak baitituzte Espainian, Turkian eta Hungarian. Gainera, ekoizpen horren % 73 ibilgailu % 100 elektrikoena izango da eta horrek islatuko du Europako sektore automotrizak elektrifikaziorako duen joera.

Txinatar fabrikatzaileen inbertsio milioidunak Europan

2022 eta 2024 erdiaren artean, Txinako fabrikatzaileek funtsezko 35 inbertsio egin zituzten Europan, horietako asko ibilgailu elektrikoentzako bateriak ekoizteko. Ekialdeko Europa funtsezko erkidegoa da inbertsio horiek egiteko, geroz eta garrantzi handiagoa baitu osagarri automotrizak fabrikatzeko garaian.

Inbertsio horiek ez dute soilik Txinako fabrikatzaileen presentzia indartzen Europan, Europako hornikuntza-katearen garrantzia ere nabarmentzen dute, Txinako fabrikatzaileek gero eta rol garrantzitsuagoa baitute bertan.

Txinak Europako hornikuntza-katean duen presentzia gero eta handiagoa da

Eskatu txosten osoa Txinako OEMk Europan izango dituzten etorkizuneko estrategiei buruzko azterketa xehea izateko.

Egun, Txinako 223 enpresa hornitzaile daude Europako automobilgintzaren sektorean eta horietatik % 35 Alemanian daude. Enpresa horietako askok ibilgailuen barruko zatiak ekoizten dituzte eta funtsezkoak dira Europako ekosistema automotrizarentzat.

Gainera, Europako 333 enpresaren bezeroen artean daude Txinako fabrikatzaile nagusiak, hala nola Geely, Chery, BYD, SAIC, NIO eta Xpeng. Geely da Europan hornitzaile gehien dituen marka.

Europako hornitzaileek Txinako hornikuntza-kateetan sartzeko duten erronka

Txinako OEMen ekoizpena Europan handitu egin den arren, Europako hornitzaileak hornikuntza-kateetan sartzea erronka da oraindik ere. Egun, Txinako fabrikatzaileek Txinan dituzte zentralizatuta erabaki estrategikoak, nahiz eta Europan tokiko bulegoak jartzen hasi diren merkatuaren baldintzetara eta bezeroen lehentasunetara hobeto egokitzeko.

Epe laburrean zaila da Europako hornitzaileak Txinako OEMen hornikuntza-kateetan integratzea. Hala ere, Txinako ekoizpenak Europan gora egin ahala, aukera berriak sortzea espero da, osagarri handiagoen fabrikazioaren arloan batez ere.

Dokumentuak ohartarazten du Euskadiko enpresek harreman sendoak izan behar dituztela Txinako merkatuan. Dagoeneko herrialde horretan esperientzia dutenek, bai ekoizpen-instalazioen, bai aurretiazko harreman komertzialen bitartez, abantaila izango dute Europan lankidetzan aritzeko etorkizunean.

Txinako fabrikatzaileek Europan egindako inbertsioen azterketak erakusten du ikuspegi partikular bat dagoela Europa Ekialdean, baina Alemania da oraindik ere erosketak egiteko leku nagusia.

Testuinguru horretan, Euskadiko enpresek kontuan hartu beharko dute eragile berri horiekin harremanak egiteko aukera eta oraindik erabat ustiatu gabeko hobiak aurkitu beharko dituzte hornikuntza-katean. SPRI Taldeak antolatutako misio komertzialaren moduko ekimenei esker, Euskadiko automobilgintzaren sektorea negozio-aukera berriak bilatzen ari da Txinan, funtsezko merkatua baita bai ekoizpenarentzat, bai teknologia berrien garapenarentzat.

Txosten osoa eska dezakezu hemen.

Zerikusia duten beste txosten batzuk: