BRTA aliantzak berrikuntza EAEko enpresa txiki eta ertainetara (ETE) hurbiltzeko ekimen bat martxan jarri du
BRTA (Basque Research & Technology Alliance) aliantzak berrikuntza EAEko enpresa txiki eta ertainetara hurbiltzeko ekimen bat aurkeztu du gaur, ostirala, Donostiako Parke Zientifiko Teknologikoan. Rikardo Bueno Zabalo, BRTAko zuzendari nagusiak, Garbiñe Manterola Agirrezabalaga, BRTAko Transferentzia arduradunak, Soraya Romo BCARE enpresako zuzendari nagusiak eta Jon Lasa BRANKA enpresako gerenteak parte hartu dute aurkezpenean.
Rikardo Bueno BRTA aliantzako zuzendari nagusiak eman dio hasiera ekitaldiari. Jarraian, Garbiñe Manterola BRTAko Transferentzia arduradunak hartu du hitza eta ekimenaren edo kanpainaren helburuak eta nondik norakoak azaldu ditu. “Enpresa batek lehiakorra izan nahi badu, berritu beharra du. Gehienetan, berrikuntza-prozesu hori ez da bakarrik egiteko ibilbide bat, bidelagunak ezinbestekoak dira; zorionez, BRTA aliantzak bidelagun izan daitezkeen 17 zentro ditu esku-eskura. Horregatik, kanpaina honen bitartez bidelagun horiek hobeto ezagutzen, identifikatzen eta bidelagun horiekin lan egiteko moduak erakusten saiatuko gara”, adierazi du Garbiñe Manterolak.
“BRTA aliantza osatzen duten 17 zentroak hasiera-hasieratik izan dira euskal ETE askoren bidelagun, beraien produktuak eta prozesuak berritzen lagundu baitie. Hori dela eta, ekimen honen bitartez, mezu hori Euskadiko ETE guztietara zabaldu nahi dugu, berrikuntzaren aldeko apusturako bidea erraztuz”, azpimarratu du BRTAko Transferentzia arduradunak. Izan ere, “berritzaile izatea izaera kontua da, ez da tamaina kontua. Izaerak egiten zaituela handi sinetsita gaude”, gehitu du.
Ondoren, berrikuntzaren zurrunbiloan dagoeneko sartuta dauden zenbait enpresa txiki eta ertainen esperientziak ezagutu ditugu bertan lanean diharduten pertsonen eskutik. Esperientzia horiek berritzen hasi nahi duten enpresa horiek inspirazio-iturri izan daitezen.
Soraya Romo, BCARE enpresako —energia sektoreko arabar enpresa— zuzendari nagusia da. “Gure helburua da energia biltegiratzeko irtenbide onenak eskaintzea bezeroei, eta gainera, teknologia hori garatzen laguntzea”, dio Soraya Romok. Horretarako, “BRTAko zentroekin harreman estua dugu eta lankidetza horri esker oso berritzailea den produktu bat merkaturatu dugu. Beraz, nik uste dut enpresa guztiek, tamaina edozein dela ere, Zientziako, Teknologiako eta Berrikuntzako Euskal Sareko zentroekin lan egin beharko luketela produktu berritzaileak garatzeko, enpresa moduan hazteko eta zientziaren zein ikerketaren alorreko puntako adituekin lan egiteko; oro har, gizarteak aurrera egiteko, alegia”, adierazi du Soraya Romok.
Jon Lasa, berriz, BRANKA enpresako gerentea da. 2015ean sortutako oinarri teknologikoko enpresa txiki bat da BRANKA. “Berrikuntza beti izan da gure estrategiaren oinarrizko gako bat. Berrikuntzaren aldeko apustua egin dugu hasiera-hasieratik, eta uste dugu horri esker gaudela gaur egun gauden tokian. Beraz, berrikuntza beharrezkoa dela esango nieke zalantzan dauden enpresa horiei”, dio Jon Lasa BRANKAko gerenteak. Gainera, “BRTAko zentroekin lan egiteak ate asko ireki dizkigu bai merkatuaren eta bai posizionamenduaren aldetik”, gehitu du.
Rikardo Bueno BRTAko zuzendari nagusiak itxi du aurkezpena eta azpimarratu du “ezinbestekoa dela uztartzea administrazio publikoa, ikerkuntza eta teknologia eta sarea osatzen duten enpresak —bereziki, enpresa txiki eta ertainak—sare industrial berritzaile, lehiakor eta sendo bat osatzeko”.
BRTA
2019an sortu zen Basque Research and Technology Alliance (BRTA) aliantza eta berau osatzen duten zentroen helburua da ikerkuntzan eta teknologian oinarritutako ezagutza transferitzea euskal industriari eta enpresei, betiere lurraldearen ekonomia indartzeko helburuarekin. 4 ikerketa-zentro kooperatibok eta 13 zentro teknologikok osatzen dute aliantza: CIC bioGUNE, CIC nanoGUNE, CIC biomaGUNE, CIC energiGUNE, Azterlan, Azti, Ceit, Cidetec, Gaiker, Ideko, Ikerlan, Leartiker, Lortek, Neiker, Tecnalia, Tekniker eta Vicomtech.
Lotutako albisteak
Ceit zentro teknologikoak 300 enplegu baino gehiago sortzen dituzten 20 spin-off sustatu ditu eta 30 M € inguruko inbertsioa ekarri dute
Mikel Jauregi sailburuak Ceit bisitatu du, ikerketa aplikatuko eta teknologia enpresara transferitzeko erreferentziazko zentro teknologikoa
Sei euskal ikerketa-erakundek bat egin dute ITTHACAn zahartze osasuntsua sustatzeko
Elkartek programak finantzatutako proiektu honek biomarkatzaileak, iragarpen-ereduak eta osasunaren zuzeneko monitorizazioa erabiltzen ditu.
Sustatu berrikuntza-proiektuak zure enpresan Fast Track Innobideak ekimenarekin
Fast Track Innobideak Euskadiko enpresa berritzaileen kopurua handitzeko eta sustatzeko sortu zen. Merkatuan ondasun edo zerbitzu berriak sartu dituzten edo enpresan negozio-prozesuak hobetzen dituzten berrikuntza-jarduerak babesten ditu, enpresa lehiakorrago bihurtzeko.
Industriarako soluzio teknologiko aurreratuen garapenean erreferentea den ULMA kooperatiba taldea bisitatu du Mikel Jauregi sailburuak
Oil&Gaseko negoziorako brida homologatuen fabrikazioan munduko liderra den ULMA Forged Solutionsen lantegi nagusian ibili da eta "ziurgabetasuna nagusi den une honetan, ULMA kooperatiba-taldea industriaren, inbertsioaren, berrikuntzaren eta kalitatezko enpleguaren aldeko apustua nabarmena egiten ari da" nabarmendu du
Connect Group, zentro teknologikoa Donostian duen multinazionala
Donostiako lantegiak SPRI Taldearen BDIH Konexio programaren laguntza jaso du, eta urtean bi milioi txartel elektroniko diseinatu eta fabrikatzen ditu
Eusko Jaurlaritzak Bikaintek programa zabaldu du enpresetan ikerlariak kontratatzea sustatzeko
2025erako planak 5,7 milioi euroko aurrekontua du eta urtean 60.000 euro bitarteko dirulaguntzak eskaintzen ditu kontratazio bakoitzarentzat
Lehendakariak I+Med laborategiko instalazio berriak bisitatu ditu, munduko lehen Nanohidrogel Adimendunen Institutu Biomedikoa
"Gure helburua da gero eta ikertzaile eta ekintzaile gehiago egoteko baldintza egokienak sortzea"
Bianditz, esku-erremintak, doitasuneko piezak eta kautxuzko injekzio-moldeak fabrikatzen dituen 60 urteko enpresa
Irunen kokatuta dagoen konpainiak, azken urtean fakturazioa % 30 handitu duenak, SPRI Taldearen zibersegurtasun-programako laguntza jaso du
“Innovation Land” lelopean, Euskadik Transfiere 2025 Europako zientzia, teknologia eta berrikuntzarako fororik handienean parte hartuko du
Euskadik presentzia nabarmena izango du programa ofizialean, Basque Research and Technology Alliance (BRTA) aliantzako, SPRI Taldeko, Tecnaliako eta ZITUko arduradunek parte hartuko baitute
TH Company, munduko liderra arrantza sektorerako makinetan Mungiatik
Mundu osoko 500 atunketari baino gehiagok dute enpresa horren teknologia eta % 75eko merkatu-kuota du.